Nsangu ya Mbote ya Matayi 12:1-50
-
Yesu ke “Mfumu ya saba” (1-8)
-
Yesu me belusa bakala mosi yina vandaka na diboko ya kuyuma (9-14)
-
Kisadi yina Nzambi ke zolaka (15-21)
-
Yesu me bingisa bampeve ya yimbi na ngolo ya mpeve ya santu (22-30)
-
Disumu yina ba lenda lemvokila ve (31, 32)
-
Yinti ke zabanaka na bambuma ya yawu (33-37)
-
Kidimbu ya Yona (38-42)
-
Ntangu mpeve ya yimbi ke vutukaka (43-45)
-
Mama na bampangi ya Yesu (46-50)
12 Kilumbu mosi, Yesu na bilandi ya yandi vanda luta na bilanga kilumbu ya saba. Bilandi ya yandi kumaka na nsatu mpe ba bandaka kubuka bambuma ya ble mpe kudya yawu.
2 Ntangu Bafarize talaka faso yina, ba zonzaka na yandi: “Tala! Bilandi ya nge ke na salaka mambu yina Musiku ke niminaka na kusala kilumbu ya saba.”
3 Yandi zonzaka na bawu: “Beno tangaka ve mambu yina Davidi salaka ntangu yandi na bantu ya yandi kumaka na nsatu?
4 Yandi kotaka na yinzo ya Nzambi, mpe ba kudyaka mampa yina ba ke pesaka mutindu munkayulu na Nzambi.* Musiku vanda pesa ve yandi na ba yina vandaka na yandi nzila na kudya mampa yina, kasi kaka banganga-nzambi.
5 Dyaka, beno tangaka ve na kati ya Musiku ti na kilumbu ya saba banganga-nzambi na tempelo ke zitisaka ve saba, kasi ba ke salaka ve mambu ya yimbi?
6 Kasi mu ke na zonzaka na beno ti awa, ya ke na mambu ya kulutila mfunu na tempelo.
7 Kana beno bakulaka yinki zola zonza, ‘Mu zola kyadi, kasi ve munkayulu,’ beno zola zonza ve ti bantu yayi me sala mambu ya yimbi.
8 Samu Mwana ya muntu ke Mfumu ya saba.”
9 Ntangu yandi katukaka kuna, yandi kwendaka na yinzo ya bawu ya lusambu.
10 Kuna, ya vandaka na bakala mosi yina vandaka na diboko ya kuyuma.* Na yawu ba yufulaka yandi: “Musiku ke pesaka kwandi nzila ya kubelusa muntu kilumbu ya saba?” Ya vandaka samu na kuzwa mambu ya kufunda yandi.
11 Yandi zonzaka na bawu: “Kana beno ke na dimeme mosi, mpe dimeme yango me kubwa na dibulu na kilumbu ya saba, ya ke kwandi na muntu na kati ya beno yina ke kwenda baka ve yawu, mpe kubasisa yawu na dibulu?
12 Muntu ke ve mfunu mingi kulutila dimeme? Ni na yawu Musiku ke pesaka nzila ya kusala mambu ya mbote na kilumbu ya saba.”
13 Na yina, yandi zonzaka na bakala yina: “Tamba diboko ya nge.” Yandi tambaka diboko, mpe diboko ya yandi vutukaka mbote faso diboko ya nkaka.
14 Kasi Bafarize basikaka mpe ba salaka mfundu samu na kusosa faso ya kufwa Yesu.
15 Ntangu Yesu zabaka mambu yayi, yandi katukaka na kisika yina. Bantu mingi landaka yandi, mpe yandi belusaka bawu nyonso.
16 Kasi yandi niminaka bawu na ngolo nyonso na kuzonzila na bantu ya nkaka nani yandi kele,
17 samu na kulungisa mambu yina Nzambi zonzaka na nzila ya mbikudi Izaya:
18 “Beno tala kisadi ya munu yina mu me soola, ni yandi mu ke zolaka mingi, mpe ni yandi mu me* ndima. Mu ke tula mpeve ya munu na zulu ya yandi mpe yandi ke lakisa lunungu na makanda.
19 Yandi ke swanisa ve muntu, mpe ke zonza ve na ndinga ya ngolo. Ata muntu mosi ke kuwa ndinga ya yandi na babala-bala ya nene.
20 Yandi ke zenga ve yinti ya didyadya yina ke ya kukondama. Mpe yandi ke kufwa ve tiya na singa ya mwinda yina ke na pelaka ve mbote, tii ntangu yandi ke sala ti lunungu nunga.
21 Ya tsyeleka, makanda ke kuzwa kivuvu na nkumbu ya yandi.”
22 Na manima, ba natinaka yandi bakala mosi yina vandaka na mpeve ya yimbi. Yandi vandaka dibaba mpe yandi vandaka na meso ya kufwa. Yesu belusaka yandi mpe dibaba yango lendaka kutala mpe kuzonza.
23 Na yawu, bantu nyonso yina vandaka kuna pamukaka mpe bandaka kuzonza: “Muntu yayi ke ve Mwana ya Davidi?”
24 Ntangu Bafarize kuwaka yawu, ba zonzaka: “Muntu yayi ke bingisaka bampeve ya yimbi na ngolo ya Bezebule,* mfumu ya bampeve ya yimbi.”
25 Samu yandi zabaka makanisi ya bawu, Yesu zonzaka na bawu: “Konso kimfumu yina ke ya kukabuka ke kufwaka. Mpe konso mbanza to yinzo yina ke ya kukabuka ke lenda ve kusikama.
26 Faso mosi mpe, kana Satana bingisa Satana, yandi ke kuma ya kukabuka. Na yawu, wa’ faso kimfumu ya yandi ke lenda kuvanda ya kusikama?
27 Dyaka, kana mu ke bingisaka bampeve ya yimbi na ngolo ya Bezebule, na ngolo ya nani bana ya beno ke bingisaka bawu? Ni samu na yawu ba ke vanda bazuzi ya beno.
28 Kasi, kana ya ke ni na ngolo ya mpeve ya Nzambi mu ke bingisaka bampeve ya yimbi, ya tsyeleka, Kimfumu ya Nzambi me kuma na sika ya beno.
29 Dyaka, wa’ faso muntu lenda kota na ngolo na yinzo ya muntu mosi ya ngolo mpe kubaka bima ya yandi, kana yandi kanga ntete ve muntu ya ngolo yina basinga? Kaka na manima ya kusala faso yina yandi ke lenda kuyiba bima ya yinzo ya muntu yina.
30 Muntu yina ke ve kintwadi na munu ke mbeni ya munu, mpe muntu yina ke vukisaka ve bantu na munu ke mwangisaka.
31 Ni na yawu mu ke na zonzaka na beno ti ba ke lemvokila masumu mpe bifingu ya mutindu nyonso. Kasi ba ke lemvokila ve muntu yina ke vweza mpeve ya santu.
32 Na kifwani, konso muntu yina ke zonzaka mambu ya yimbi na yina me tadila Mwana ya muntu, ba ke lemvokila yandi. Kasi konso muntu yina ke zonzaka mambu ya yimbi na yina me tadila mpeve ya santu, ba ke lemvokila ve yandi, ya vanda na yinza* yayi to na yina ke kwiza.
33 “Beno lenda sala ti yinti vanda mbote, mpe bambuma ya yawu vanda mbote, to kusala ti yinti vanda ya kubola mpe bambuma ya yawu vanda ya kubola. Ntembe ve, ba ke zabilaka yinti na bambuma ya yawu.
34 Bana ya bampidi,* wa’ faso beno lenda zonza mambu ya mbote ntangu beno ke bantu ya yimbi? Ya tsyeleka, yinwa ke zonzaka mambu yina ke ya kufuluka na ntima.
35 Muntu ya mbote ke zonzaka mambu ya mbote, samu ntima ya yandi ke na mambu ya mbote. Kasi muntu ya yimbi ke zonzaka mambu ya yimbi, samu ntima ya yandi ke na mambu ya yimbi.
36 Mu ke na zonzaka na beno ti na Kilumbu ya Lusambusu, ba ke fundisa bantu samu na mambu nyonso ya buzoba yina ba ke zonzaka.
37 Ya tsyeleka, ni na mambu yina nge ke zonzaka, Nzambi ke ndima ti nge ke muntu ya lunungu,* mpe ni na mambu yina nge ke zonzaka, Nzambi ke bokila nge muntu ya yimbi.”
38 Na manima, ndambu ya milongisi ya Musiku na Bafarize zonzaka na yandi: “Mulongi, lakisa beto kidimbu.”
39 Yandi vutulaka na bawu: “Bantu ya yimbi mpe ya kinsuza* ya ntangu yayi ke na sosaka kidimbu. Kasi kidimbu yina ba ke pesa bawu, ni kaka kidimbu ya mbikudi Yona.
40 Faso Yona lutisaka bilumbu tatu mpe bampimpa tatu na kati ya kivumu ya mbisi, mutindu mosi mpe Mwana ya muntu ke lutisa bilumbu tatu mpe bampimpa tatu na yisi ya ntoto.
41 Na Kilumbu ya Lusambusu, bantu ya Ninive ke vumbuka kintwadi na bantu ya ntangu yayi, mpe ba ke lakisa ti bantu ya ntangu yayi ke bantu ya yimbi, samu ti bawu, ba balulaka bantima ntangu Yona samunaka. Kasi beno tala, ya ke na muntu awa yina me lutila Yona.
42 Na Kilumbu ya Lusambusu, mfumu ya kento ya sude ke vumbuka kintwadi na bantu ya ntangu yayi, mpe yandi ke lakisa ti bantu ya ntangu yayi ke bantu ya yimbi, samu yandi katukaka ntama samu na kuwa mayela ya Salomoni. Kasi beno tala, ya ke na muntu awa yina me lutila Salomoni.
43 “Ntangu mpeve ya yimbi ke basikaka na muntu, yandi ke lutaka na bisika yina ke ya kuyuma, samu na kusosa kisika ya kupema. Kasi yandi ke kuzwaka ve yawu.
44 Na manima, yandi ke zonzaka, ‘Mu ke vutuka na yinzo ya munu, kisika yina mu katukaka.’ Kasi ntangu yandi ke kumaka kuna, yandi ke talaka ti muntu ke ve na kati ya yinzo, ba me kombola yinzo mpe ba me bongisa yawu.
45 Na manima, yandi ke kwenda baka bampeve ya nkaka 7 kulutila yandi yimbi. Ba ke kota, mpe ba ke vanda kuna. Mpe luzingu ya muntu yina ke kuma yimbi kulutila mbala ya ntete. Ni faso yina mpe ya ke salama samu na bantu ya yimbi ya ntangu yayi.”
46 Ntangu yandi vanda zonza ntete na bantu mingi yina vandaka kuna, mama ya yandi na baleki ya yandi vandaka na ngaanda, mpe ba vanda sosa kusolola na yandi.
47 Na yawu, muntu mosi zonzaka na yandi: “Mama ya nge na baleki ya nge ke na ngaanda, ba ke na sosaka kusolola na nge.”
48 Yandi vutulaka na yandi: “Nani ke mama ya munu, mpe nani ke bampangi ya munu?”
49 Yandi lakisaka na diboko bilandi ya yandi mpe zonzaka: “Tala, mama ya munu mpe bampangi ya munu, bawu yayi.
50 Konso muntu yina ke salaka luzolo ya Tata ya munu yina ke na mazulu, ni yandi muntu ke mpangi ya munu ya bakala, mpangi ya munu ya kento mpe mama ya munu.”
Banote
^ To: “Mampa ya kulakisa.” Tala Yina ya zola zonza.
^ To: “Ya kufwa.”
^ To: “Mwela ya munu me.”
^ Nkumbu yina ba ke sadilaka samu na Satana.
^ To: “Mambu ya ntangu.” Tala Yina ya zola zonza.
^ Ya ke mutindu mosi ya banyoka.
^ To: “Kudedama.”
^ To: “Yina ke ve ya kukwikama.”
