Nsangu ya Mbote ya Matayi 13:1-58
-
BIFWANI YINA KE ZONZILAKA KIMFUMU (1-52)
-
Muntu yina ke kundaka (1-9)
-
Samu na yinki Yesu vanda sadila bifwani (10-17)
-
Yesu me lakisa yinki zola zonza kifwani ya muntu yina ke kundaka (18-23)
-
Bambuma ya ble mpe matiti ya yimbi (24-30)
-
Mbuma ya mutarde mpe levire (31-33)
-
Kusadila bifwani ke lungisaka mbikudulu (34, 35)
-
Yesu me lakisa yinki zola zonza kifwani ya bambuma ya ble mpe matiti ya yimbi (36-43)
-
Kimvwama yina ba bumbaka mpe ditadi ya ntalu (44-46)
-
Mpwasa (47-50)
-
Bima ya ntalu ya malu-malu na ya ntama (51, 52)
-
-
Ba me manga Yesu na bwala ya yandi (53-58)
13 Kilumbu yina, Yesu basikaka na yinzo mpe vandaka ya kuvanda pene-pene na nzadi ya mungwa.*
2 Bantu mingi vukanaka pene-pene ya yandi. Na yawu, yandi kotaka na bwatu mpe vandaka. Mpe bantu nyonso vandaka na zyelo ya nzadi ya mungwa.
3 Yandi zonzilaka bawu mambu mingi na nzila ya bifwani. Yandi zonzaka: “Muntu mosi yina ke kundaka bambuma, kwendaka kunda bambuma.
4 Ntangu yandi vanda kunda, bambuma ya nkaka kubwaka na nzila. Bandeke kwizaka mpe kudyaka yawu.
5 Bambuma ya nkaka kubwaka na kati ya matadi, mpe ya menaka na mbangu, samu ntoto vandaka ve sunda.
6 Kasi ntangu ntangu basikaka, ya yokaka bayinti, mpe bayinti yumaka samu ya vandaka ve na myanzi.
7 Bambuma ya nkaka kubwaka na kati ya bansende. Bansende menaka, mpe fyetaka yawu.
8 Bambuma ya nkaka kubwaka na ntoto ya mbote, mpe ya bandaka kubuta bambuma. Yinti yayi butaka bambuma 100, ya nkaka 60, mpe ya nkaka 30.
9 Bika ti muntu yina ke na makutu kuwa.”
10 Na manima, bilandi kwizaka mpe yufulaka yandi: “Samu na yinki nge ke na sadilaka bifwani samu na kuzonza na bawu?”
11 Yandi vutulaka: “Beno kuzwaka bweso ya kubakula mansweki ya santu ya Kimfumu ya mazulu, kasi bawu ve.
12 Muntu yina ke na bima, ba ke bwela dyaka yandi, mpe yandi ke vanda na yawu ya kulutila. Kasi muntu yina ke na ata kima, ata bima yina yandi ke na yawu, ba ke katula yandi yawu.
13 Ni na yawu mu ke sadilaka bifwani samu na kuzonza na bawu, samu ba ke na talaka, kasi ba ke na kati ya kidiba. Ba ke na kuwaka, kasi ya mpamba. Mpe ba ke na lendaka ve kubakula.
14 Mbikudulu ya Izaya ke na lunganaka na bawu. Ya ke zonzaka, ‘Ya tsyeleka, beno ke kuwa, kasi beno ke bakula ve. Mpe beno ke tala, kasi beno ke vanda na kati ya kidiba,
15 samu bantima ya bantu yayi me kuma ngolo. Ba me kanga makutu mpe meso ya bawu samu ti ba kuwa ve na makutu ya bawu, ba tala ve na meso ya bawu, ba zaba ve nsasa ya yawu na bantima ya bawu, mpe ba vutuka ve na sika ya munu samu mu belusa bawu.’
16 “Kasi kilengi na beno samu meso ya beno ke talaka, mpe makutu ya beno ke kuwaka.
17 Ya tsyeleka mu ke na zonzaka na beno ti bambikudi mingi mpe bantu mingi ya lunungu* vandaka na nsatu ya kutala bamambu yina beno ke na talaka, kasi ba talaka ve yawu, mpe ba vandaka na nsatu ya kuwa bamambu yina beno ke na kuwaka, kasi ba kuwaka ve yawu.
18 “Ntangu yayi, beno kuwa kifwani ya muntu yina kundaka.
19 Ntangu muntu ke kuwaka mambu ya Kimfumu, kasi ke bakulaka ve yawu, muntu ya yimbi ke kwizaka mpe ke katulaka mambu yina ba kundaka na ntima ya yandi. Ni yawu zola zonza bambuma yina kubwaka na nzila.
20 Samu na bambuma yina ba kundaka na ntoto yina ke na matadi, ya ke ni muntu yina me kuwa mambu ya Nzambi, mpe me ndima yawu na mbala mosi na kilengi.
21 Kasi samu yandi ke ve na myanzi na kati ya yandi, yandi ke kula kaka samu na mwa ntangu fioti. Mpe ntangu yandi ke kutana na bankwamusu to ba ke talisa yandi mpasi samu na mambu ya Nzambi, yandi ke bula dibaku na mbala mosi.
22 Samu na bambuma yina kubwaka na kati ya bansende, ya ke muntu yina kuwaka mambu ya Nzambi, kasi manyongi samu na mambu ya yinza* yayi, mpe ngolo yina bimvwama ke na yawu ya kuvuna bantu, ke fyetaka mambu ya Nzambi, mpe ya ke buta dyaka ve bambuma.
23 Samu na bambuma yina kubwaka na ntoto ya mbote, ya ke muntu yina ke kuwaka mambu ya Nzambi mpe ke zabaka nsasa ya yawu. Yandi ke buta bambuma, yinti yayi bambala 100, ya nkaka bambala 60, mpe ya nkaka 30.”
24 Yandi pesaka bawu kifwani ya nkaka mpe zonzaka: “Kimfumu ya mazulu ke mutindu muntu yina me kwenda kunda bambuma ya mbote na bilanga ya yandi.
25 Ntangu bantu vanda lala, mbeni ya yandi kwizaka mpe kundaka matiti ya yimbi na kati-kati ya matiti ya ble mpe kwendaka.
26 Ntangu matiti ya ble menaka mpe butaka bambuma, matiti ya yimbi mpe basikaka.
27 Na yawu, bisadi ya mfumu ya yinzo kwizaka mpe zonzaka na yandi, ‘Mfumu, nge kundaka bambuma ya mbote na bilanga ya nge. Wapi kisika matiti ya yimbi me katuka?
28 Yandi zonzaka na bawu, ‘Mbeni mosi muntu me sala yawu.’ Bisadi zonzaka na yandi, ‘Nge me zola ti beto kwenda mpe beto timuna yawu?’
29 Yandi zonzaka, ‘Ve, samu ti kana beno sala yawu, ntangu beno ke katula matiti ya yimbi, beno ke katula mpe matiti ya ble.
30 Beno bika ya kula kintwadi tii ntangu ya kubuka bambuma. Mpe na ntangu ya kubuka bambuma mu ke zonza na bisadi: Beno katula ntete matiti ya yimbi, mpe beno kanga yawu na bikunku samu na kuyoka yawu. Na manima beno vukisa bambuma ya ble na yinzo ya munu ya kubumba bambuma.’”
31 Yandi pesaka bawu kifwani ya nkaka, mpe zonzaka: “Kimfumu ya mazulu ke mutindu mbuma ya mutarde, yina muntu kuzwaka mpe kundaka na bilanga ya yandi.
32 Ya tsyeleka, ya ke mbuma ya kulutila fioti na bambuma nyonso. Kasi ntangu ya ke menaka, ya ke lutilaka yinda na bima nyonso yina ba me kunda na bilanga. Mpe ya ke kumaka yinti, kisika yina bandeke ya mazulu ke kwizaka mpe ke lalaka.
33 Yandi pesaka bawu kifwani ya nkaka: “Kimfumu ya mazulu ke mutindu levire yina kento me baka mpe me vukisa na bakilo mingi ya farine,* mpe ya me vimbisa kiputi nyonso.”
34 Mambu nyonso yina Yesu vanda longa na bantu, ya vandaka na nzila ya bifwani. Ya tsyeleka, yandi vanda zonzaka na bawu kaka na nzila ya bifwani.
35 Ya vandaka samu na kulungisa mambu yina mbikudi zonzaka: “Mu ke fungula yinwa ya munu samu na kuzonzila bifwani. Mu ke zabisa bamambu yina ke ya kubumbana katuka kubanda.”*
36 Ntangu yandi zonzaka na bantu na kukwenda, yandi kotaka na kati ya yinzo. Bilandi ya yandi kwizaka na sika ya yandi mpe zonzaka: “Zonzila beto yinki zola zonza kifwani ya matiti ya yimbi na kati ya bilanga.”
37 Yandi vutulaka na bawu: “Muntu yina kundaka mbuma ya mbote ke ni Mwana ya muntu.
38 Bilanga ke ni yinza. Mbuma ya mbote ke ni bana ya Kimfumu. Matiti ya yimbi ke ni bana ya muntu ya yimbi.
39 Mpe mbeni yina kundaka yawu ke ni Dyabulu. Ntangu ya kubuka bambuma ke ni nsuka ya yinza* mosi. Mpe bantu yina ke buka bambuma ke ni bambazi.
40 Na yawu, kaka mutindu ba ke katulaka matiti ya yimbi mpe ke yokaka yawu na tiya, ni mutindu yina mpe ya ke salama na nsuka ya yinza.*
41 Mwana ya muntu ke filisa bambazi ya yandi, mpe ba ke katula na kati ya Kimfumu ya yandi bantu nyonso yina ke salaka ti bampangi bula dibaku, mpe bantu yina ke salaka bamambu ya yimbi,
42 mpe ba ke losa bawu na tiya ya nene. Ni kuna ba ke dila, mpe ba ke kwetisa meno ya bawu.
43 Na ntangu yina, bantu ya lunungu* ke ngenga na ngolo mutindu ntangu na kati ya Kimfumu ya Tata ya bawu. Bika ti muntu yina ke na makutu kuwa.
44 “Kimfumu ya mazulu ke mutindu kimvwama yina ba bumbaka na kati ya bilanga. Muntu yina me tala yawu me bumba dyaka yawu. Na kilengi nyonso yina yandi ke na yawu, yandi me kwenda mpe me tekisa bima ya yandi nyonso, mpe yandi me sumba bilanga yina.
45 “Kimfumu ya mazulu ke mpe mutindu muntu ya mumbungu* yina ke sosaka matadi ya ntalu.
46 Ntangu yandi ke tala ditadi mosi ya ntalu mingi, yandi ke kwenda mpe na mbala mosi yandi ke tekisa bima nyonso yina yandi ke na yawu, mpe ke sumba ditadi ya ntalu yina.
47 “Kimfumu ya mazulu ke dyaka mutindu mpwasa* yina ba me losa na kati ya nzadi ya mungwa, mpe yina me kanga bambisi ya mitindu nyonso.
48 Ntangu ya me fuluka, bilobi-mbisi ke benda yawu tii na zyelo ya nzadi ya mungwa. Ba ke vanda, ba ke tula bambisi ya mbote na bitunga, kasi bambisi ya yimbi, ba ke losa yawu.
49 Ni mutindu yina ya ke salama na nsuka ya yinza.* Bambazi ke kwiza mpe ba ke kabula bantu ya yimbi na bantu ya lunungu.*
50 Mpe ba ke losa bantu ya yimbi na kati ya tiya ya nene. Ni kuna ba ke dila mpe ba ke kwetisa meno ya bawu.”
51 Yandi yufulaka bawu: “Beno me bakula mambu nyonso yayi?” Ba vutulaka yandi: “Ee.”
52 Yesu zonzaka na bawu: “Samu ya ke mutindu yina, konso mulongi yina ba me longa mambu yina me tadila Kimfumu ya mazulu, ke mutindu mfumu ya yinzo yina me basisa na kati ya bima ya yandi ya ntalu, bima ya malu-malu mpe bima ya ntama.”
53 Ntangu Yesu manisaka na kuzonzila bifwani yayi, yandi katukaka na kisika yina.
54 Ntangu yandi kumaka na bwala ya yandi, yandi bandaka kulonga bantu na yinzo ya bawu ya lusambu. Na yawu, ba vandaka yituka mingi mpe zonzaka: “Wapi kisika muntu yayi me kuzwa dwenga ya mutindu yayi? Na nani yandi me kuzwa ngolo ya kusala bimangu yayi?
55 Ni yandi ve ke mwana ya kisadi-mabaya? Nkumbu ya mama ya yandi ke ve ni Maria? Mpe baleki ya yandi ya bakala ke ve ni Zaki, Yozefi, Simoni na Yuda?
56 Mpe baleki ya yandi ya bakento bawu nyonso ke ve na beto awa? Na yawu, na nani yandi me kuzwa mambu nyonso yayi?”
57 Na yawu, ba bandaka kubula dibaku samu na yandi. Yesu zonzaka na bawu: “Ba ke zitisaka mbikudi bisika nyonso, kasi kaka ni na bwala ya yandi mpe na yinzo ya yandi ba ke zitisaka ve yandi.”
58 Na yawu, Yesu salaka ve bimangu mingi kuna samu ba vandaka ve na kiminu.
Banote
^ To: “Mubu.”
^ To: “Kudedama.”
^ To: “Mambu ya ntangu.” Tala Yina ya zola zonza.
^ To: “Bitezolo tatu ya seya.” Seya mosi ke pesaka balitre 7,33.
^ To ya lenda vanda: “Kubanda ya yinza.”
^ To: “Mambu ya ntangu.” Tala Yina ya zola zonza.
^ To: “Nsuka ya mambu ya ntangu.” Tala Yina ya zola zonza.
^ To: “Kudedama.”
^ Na Greke: “Muntu ya mumbungu yina ke kwendaka bisika mingi.”
^ To: “Filet.”
^ To: “Nsuka ya mambu ya ntangu.” Tala Yina ya zola zonza.
^ To: “Kudedama.”
