Nsangu ya Mbote ya Matayi 14:1-36
14 Na ntangu yina, Erode mfumu ya Galile, kuwaka nsangu ya Yesu.
2 Yandi zonzaka na bisadi ya yandi: “Ya ke Yoane Mubotiki. Yandi me vumbuka na lufwa, mpe ni na yawu yandi ke na ngolo ya kusala bimangu.”
3 Tekila mambu yayi, Erode* bwilaka Yoane. Yandi kangaka Yoane na basinga ya bisengo, mpe tulaka yandi na boloko samu na Erodiade, kento ya mpangi ya yandi Filipe,
4 samu Yoane vanda zonzaka na yandi: “Nge ke ve na muswa ya kukumisa yandi kento ya nge.”
5 Kasi ata ti Erode vandaka na nsatu ya kufwa Yoane, yandi vandaka na boma ya bantu, samu ba vanda talaka Yoane mutindu mbikudi.
6 Kasi ntangu mukembo ya kilumbu ya kubutuka ya Erode vanda salama, mwana ya kento ya Erodiade binaka, mpe yandi sepelisaka mingi Erode.
7 Na yawu, Erode zengaka ndefi ti yandi ke pesa yandi nyonso yina yandi ke lomba.
8 Mwana ya kento yayi kuwaka mama ya yandi, mpe zonzaka: “Pesa munu awa, yintu ya Yoane Mubotiki na kati ya ndonga.”
9 Mfumu kumaka na mawa, kasi samu na ndefi yina yandi zengaka na mantwala ya bantu yina vandaka kudya* na yandi, yandi tumisaka ba pesa mwana ya kento yina yintu ya Yoane.
10 Na yawu, yandi filisaka muntu na kukwenda zenga yintu ya Yoane na boloko.
11 Ba nataka yintu ya Yoane na ndonga, mpe ba pesaka yawu na mwana ya kento yina. Yandi nataka yawu na mama ya yandi.
12 Na manima, bilandi ya Yoane kwendaka baka mvumbi ya yandi, mpe ba kundaka yandi. Ba kwendaka zabisa Yesu mambu yina salamaka.
13 Ntangu Yesu kuwaka yawu, yandi katukaka kuna, kotaka na bwatu, mpe kwendaka na kisika yina bantu vandaka ve, samu na kuvanda yandi mosi. Ntangu bantu zabaka yawu, ba katukaka na bambanza ya bawu, mpe landaka yandi na makulu.
14 Ntangu Yesu basikaka na bwatu, yandi talaka bantu mingi. Yandi kuzwaka kyadi samu na bawu, mpe yandi belusaka ba yina vanda beela.
15 Kasi ntangu nkokila kumaka, bilandi ya Yesu kwizaka pene-pene ya yandi, mpe zonzaka: “Kisika yayi ke ntama na bwala, mpe mpimpa me kuma. Zonza na bantu yayi na kukwenda na babwala, samu na kusumba madya.”
16 Kasi Yesu zonzaka na bawu: “Ba ke kwenda ve. Beno pesa bawu beno mosi kima ya kudya.”
17 Bilandi zonzaka na yandi: “Beto ke ve na kima awa, kaka mampa tanu na bambisi zole.”
18 Yesu zonzaka: “Beno natina munu yawu.”
19 Na manima yandi zonzaka na bimvuka ya bantu na kuvanda na zulu ya matiti. Yandi bakaka mampa tanu mpe bambisi zole yina, yandi talaka na zulu mpe sambilaka. Na manima yandi zengaka mampa, yandi pesaka yawu na bilandi, mpe bilandi kabulaka yawu na bantu.
20 Bantu nyonso kudyaka mpe yukutaka. Na manima, bilandi lokotaka bitini ya mampa yina bikanaka. Ba fulusaka bitunga 12.
21 Lutangu ya bantu yina kudyaka lenda vanda babakala 5 000, na bakento mpe bana ya fioti.
22 Na mbala mosi, Yesu zonzaka na bilandi ya yandi na kukota na bwatu, mpe na kutekila na simu ya nkaka ya maza, mpe yandi bikanaka samu na kuzonza na bimvuka ya bantu na kuvutuka.
23 Na manima ya kuvutula bimvuka ya bantu, yandi kwendaka yandi mosi na zulu ya mongo samu na kusambila. Ntangu mpimpa kumaka, yandi vandaka kuna kaka yandi mosi.
24 Bwatu kumaka ntama mingi* na ntoto. Bilandi ya yandi vanda nwana samu na kunata bwatu, samu ti bimpo* ya maza mpe mupepe vanda nwanisa bawu.
25 Tekila bwisi kutsya,* Yesu kwendaka na sika ya bilandi ya yandi. Yandi vanda tambula na zulu ya nzadi ya mungwa.*
26 Ntangu bilandi talaka ti Yesu vanda tambula na zulu ya nzadi ya mungwa, ba kumaka na boma, mpe ba zonzaka: “Ya ke kimona-meso!” Mpe ba bandaka kuganga samu ti ba vandaka na boma.
27 Kasi na mbala mosi Yesu zonzaka na bawu: “Beno vanda na bukindi. Ya ke munu. Beno tala ve boma.”
28 Piere vutulaka: “Mfumu kana ya ke nge, zonza na munu na kukwiza kisika nge kele na zulu ya maza.”
29 Yesu zonzaka: “Kwiza!” Na yawu, Piere basikaka na bwatu, tambulaka na zulu ya maza, mpe kwendaka na sika ya Yesu.
30 Kasi, ntangu yandi talaka ti mupepe vandaka ngolo, yandi kumaka na boma. Ntangu yandi bandaka kudyama, yandi zonzaka na ndinga ya ngolo: “Mfumu, vuukisa munu.”
31 Na mbala mosi, Yesu pesaka yandi diboko, simbaka yandi mpe zonzaka: “Nge ke na kiminu ya fioti. Samu na yinki nge me bika ntembe lwata nge?”
32 Na manima, ba kotaka na bwatu, mpe mupepe ya ngolo manisaka.
33 Ba yina vandaka na bwatu, fukamaka* na mantwala ya Yesu, mpe zonzaka: “Ya tsyeleka, nge ke Mwana ya Nzambi.”
34 Ntangu ba manisaka kusabuka maza, ba kumaka na bwala ya Genezareti.
35 Ntangu bantu ya kisika yina talaka ti ya vandaka Yesu, ba filisaka nsangu na bizunga nyonso ya bwala yina. Mpe bantu natinaka yandi ba yina nyonso vanda beela.
36 Bantu vanda bondila yandi na kubika ti ba simba kaka nsongi ya kinkuti ya yandi. Ba yina nyonso vanda simba yawu, vanda beluka.
Banote
^ Ya kele ni Erode Antipase. Tala Yina ya zola zonza.
^ To: “Ya kuyalumuna na mesa.”
^ Na Greke: “Basitade mingi.” Sitade mosi kele bametre 185.
^ To: “Ba vagues.”
^ Ya kele, kubanda pene-pene na ngunga ya tatu ya mpimpa tii kubasika ya ntangu pene-pene na ngunga ya 6 ya suka.
^ To: “Mubu.”
^ To: “Lakisaka buzitu.”
