Nsangu ya Mbote ya Matayi 15:1-39
15 Bafarize na milongisi ya Musiku katukaka na Yeruzalemi mpe kwizaka tala Yesu. Ba yufulaka yandi:
2 “Samu na yinki bilandi ya nge ke tumamaka ve na misiku ya bankooko? Na kifwani, ba ke sukulaka* ve maboko ya bawu tekila ba kudya.”
3 Yesu vutulaka: “Samu na yinki beno ke tumamaka ve na misiku ya Nzambi, samu na misiku ya bankooko ya beno?
4 Na kifwani, Nzambi zonzaka, ‘Zitisa tata ya nge na mama ya nge,’ mpe ‘Ba fwana kufwa muntu yina ke finga* tata to mama ya yandi.’
5 Kasi beno, beno ke zonzaka, ‘Konso muntu yina ke zonzaka na tata to na mama ya yandi, “Bima yina mu zola pesa nge samu na kusadisa nge, mu pesaka nsilulu ti mu ke pesa yawu na Nzambi,”
6 yandi me fwana ve kusadisa tata ya yandi.’ Ni faso yina beno ke na manisaka mfunu ya mambu ya Nzambi samu na misiku ya bankooko ya beno.
7 Beno bantu ya luvunu,* Izaya bikulaka mambu ya tsyeleka samu na beno, ntangu yandi zonzaka mambu yayi,
8 ‘Bantu yayi ke zitisaka munu kaka na bikoba ya bawu, kasi bantima ya bawu ke ntama mingi na munu.
9 Ba ke na sambilaka munu, kasi ya ke ya mpamba, samu malongi ya bawu ke misiku yina ke katukaka na bantu.’”
10 Na manima, yandi bokilaka kimvuka ya bantu pene-pene na yandi mpe zonzaka: “Beno kuwa mpe beno bakula mambu yayi mbote-mbote.
11 Ya ke ve ni bima yina ke kotaka na yinwa ya muntu ke salaka ti yandi kuma mvindu, kasi ni bima yina ke basikaka na yinwa ya yandi.”
12 Na manima, bilandi kwizaka mpe zonzaka na yandi: “Nge zaba ti Bafarize bulaka dibaku ntangu ba kuwaka mambu yina nge zonzaka?”
13 Yesu vutulaka: “Konso yinti yina Tata ya munu ya mazulu kundaka ve, ba ke timuna yawu.
14 Beno bika bawu. Ba ke bantwadisi yina ke na meso ya kufwa. Kana muntu ya meso ya kufwa ke na twadisaka muntu ya meso ya kufwa, bawu nyonso zole ke kubwa na dibulu.”
15 Piere zonzaka na Yesu: “Zonzila beto yinki zola zonza kifwani yina.”
16 Yesu zonzaka: “Beno mpe, beno ke ntete ve na mayela?
17 Beno zaba ve ti, konso kima yina ke kotaka na yinwa ke lutaka na kivumu, mpe na manima, ya ke basikaka na nzutu?
18 Kasi konso mambu yina ke basikaka na yinwa ke katukaka na ntima, mpe ni yawu ke salaka ti muntu kuma mvindu.
19 Na kifwani, ni na ntima ke katukaka mabanza ya yimbi: kufwa bampangi, kinsuza,* kuyiba, kimbangi ya luvunu, mpe kuvweza.
20 Ni bamambu yayi ke salaka ti muntu kuma mvindu. Kasi kudya ata kusukula* maboko ke kumisaka ve muntu mvindu.”
21 Yesu katukaka kuna mpe kwendaka na kizunga ya Tire mpe Sidoni.
22 Kento mosi ya bwala ya Finisi yina vanda vandaka kuna, kwizaka na sika ya Yesu mpe vanda zonza na ngolo: “Mfumu, Mwana ya Davidi, tadila munu kyadi. Mpeve mosi ya yimbi ke na nyokolaka mingi mwana ya munu ya kento.”
23 Kasi Yesu zonzaka na yandi ata kima. Bilandi ya Yesu kwizaka pene-pene ya Yesu mpe vanda lomba yandi: “Zonza na yandi na kukwenda, samu yandi ke na bikaka ve kusala makelele na manima ya beto.”
24 Yesu vutulaka: “Ba filisaka munu kaka na sika ya mameme ya kuzimbana ya yinzo ya Izraele.”
25 Kento yango kwizaka fukama* na mantwala ya Yesu mpe zonzaka: “Mfumu sadisa munu!”
26 Yesu zonzaka: “Ya ke ve mbote na kubaka dimpa ya bana mpe kulosila yawu na bana ya bayimbwa.”
27 Kento yango vutulaka: “Ee Mfumu, kasi bana ya bayimbwa ke kudyaka madya yina ke kubwaka na yisi ya mesa ya bamfumu ya bawu.”
28 Yesu zonzaka na yandi: “O kento, nge ke na kiminu ya nene. Bika ti ya salama mutindu nge zola.” Mpe kaka na ntangu yina, mwana ya yandi ya kento belukaka.
29 Ntangu Yesu katukaka na kisika yina, yandi kwendaka pene-pene na nzadi ya mungwa* ya Galile. Na manima, yandi kwendaka na zulu ya mongo, mpe vandaka kuna.
30 Bantu mingi kwizaka na sika ya yandi. Ba natinaka yandi bantu yina vandaka na makulu mpe maboko ya kufwa, ba yina vandaka na meso ya kufwa, mababa, mpe bantu mingi yina vandaka na bimbevo ya nkaka. Ba tulaka bawu na makulu ya Yesu, mpe yandi belusaka bawu.
31 Bantu yina vandaka kuna pamukaka na kutala ti mababa bandaka kuzonza, bantu ya maboko ya kufwa belukaka, bantu ya makulu ya kufwa bandaka kutambula, mpe bantu ya meso ya kufwa bandaka kutala. Ni na yawu, ba kembilaka Nzambi ya Izraele.
32 Yesu bokilaka bilandi ya yandi mpe zonzaka: “Mu ke na kyadi samu na bantu yayi, samu ba me lutisa bilumbu tatu na munu awa, mpe ba ke ve na kima ya kudya. Mu zola ve kuvutula bawu nsatu, samu ba lenda lemba na nzila.
33 Kasi bilandi zonzaka na yandi: “Kisika yayi beto kele ke ntama na babwala. Wapi kisika beto ke kuzwa mampa samu bantu nyonso yayi kudya mpe yukuta?”
34 Na yawu, Yesu zonzaka na bawu: “Beno ke na mampa yikwa?” Ba zonzaka: “Mampa 7 na mwa bambisi ya fioti.”
35 Na manima ya kuzonza na bantu na kuvanda na ntoto,
36 yandi bakaka mampa 7 yina na bambisi. Yandi vutulaka matondo na Nzambi samu na yawu, mpe zengaka yawu. Yandi pesaka yawu na bilandi ya yandi, mpe bilandi pesaka yawu na bantu.
37 Bantu nyonso kudyaka mpe yukutaka. Ba lokotaka bitunga* 7 ya nene ya kufuluka na mampa yina bikanaka.
38 Lutangu ya babakala yina kudyaka vandaka 4 000, na bakento mpe bana ya fioti.
39 Ntangu bantu nyonso yayi kwendaka, Yesu kotaka na bwatu mpe kwendaka na kizunga ya Magadani.
Banote
^ Bafarize na Bazwife ya nkaka vanda sukulaka maboko na kulandaka bansalulu ya bawu.
^ To: “Ke zonzila yimbi ya.”
^ To: “Bantu yina ke mbote kaka na meso.”
^ Ndinga ya Greke ke sadilaka banzonzolo zole: moi·khei′a mpe por·nei′a. Tala Yina ya zola zonza.
^ Bafarize na Bazwife ya nkaka vanda sukulaka maboko na kulandaka bansalulu ya bawu.
^ To: “Kulakisa buzitu.”
^ To: “Mubu.”
^ To: “Bitunga ya kubumba madya.”
