Nsangu ya Mbote ya Matayi 16:1-28
16 Bafarize na Basaduse kwendaka pene-pene ya Yesu, mpe samu na kumeka yandi, ba lombaka na yandi na kulakisa bawu kidimbu mosi yina me katuka na mazulu.
2 Yandi zonzaka na bawu: “Ntangu bwisi ke bandaka kuyila, beno ke zonzaka, ‘Kilumbu ya mbasi ke vanda kitoko samu zulu ke mbwaki,’
3 mpe ntangu bwisi ke bandaka kutsya, beno ke zonzaka, ‘Bubu yayi, madidi ke vanda, mpe mvula ke noka, samu zulu ke mbwaki mpe matuti ke mingi.’ Beno me zaba kubangula bidimbu ya zulu, kasi beno ke na lendaka ve kubangula bidimbu ya bantangu.
4 Bantu ya yimbi mpe ya kinsuza* ya ntangu yayi ke na sosaka kidimbu, kasi kidimbu yina ba ke pesa bawu, ke kaka ni kidimbu ya Yona.” Na yawu, yandi bikaka bawu kuna mpe yandi kwendaka.
5 Ntangu bilandi kwendaka na simu ya nkaka ya maza, ba zimbanaka kunata mampa.
6 Yesu zonzaka na bawu: “Beno fungula meso mpe beno sala keba na levire ya Bafarize na Basaduse.”
7 Na yawu ba bandaka kukanisa bawu mosi, mpe kuzonza: “Beto me kwiza ve na mampa.”
8 Yesu zabaka yina ba vanda kanisa. Yandi zonzaka na bawu: “Samu na yinki beno ke na sololaka beno na beno na yina beno me nata ve mampa, beno bantu ya kiminu ya fioti?
9 Nabunu beno benda mayela? Beno ke na zabaka dyaka ve mampa tanu yina dikisaka bantu* 5 000, mpe bitunga yikwa beno fulusaka,
10 to mampa 7 yina dikisaka babakala 4 000, mpe bitunga* ya nene yikwa beno fulusaka?
11 Wa’ faso beno ke na lendaka ve kuzaba ti mu vanda zonzila ve mampa? Kasi beno sala keba na levire ya Bafarize na Basaduse.”
12 Na yawu ba kwizaka zaba ti yandi vandaka zonza na bawu na kusala keba na malongi ya Bafarize na Basaduse, kasi ve na levire ya mampa.
13 Ntangu yandi kumaka na Sezarea ya Filipi, Yesu yufulaka na bilandi ya yandi: “Samu na bantu, Mwana ya muntu ke nani?”
14 Ba vutulaka: “Ya ke na ba yina ke zonzaka ti nge ke Yoane Mubotiki, ba ya nkaka Eli, mpe ba ya nkaka Yeremia to mosi ya bambikudi.”
15 Yandi yufulaka bawu: “Kasi na beno, mu ke nani?”
16 Simoni Piere vutulaka: “Nge ke Kristo, Mwana ya Nzambi ya moyo.”
17 Yesu vutulaka na yandi: “Kilengi na nge Simoni mwana ya Yona, samu ti ya ke ve ni nzutu mpe menga* me lakisa nge yawu, kasi ni Tata ya munu yina ke na mazulu.
18 Dyaka, mu ke na zonzaka na nge: Nge ke Piere, mpe ni na zulu ya ditadi yayi mu ke tunga dibuundu ya munu, mpe bamwelo ya Ndyamu* ke nunga ve yawu.
19 Mu ke pesa nge bafungula ya Kimfumu ya mazulu. Konso kima yina nge ke kanga awa na ntoto, ba kangaka yawu na mazulu, mpe konso kima yina nge ke fungula awa na ntoto, ba fungulaka yawu na mazulu.”
20 Na manima, yandi niminaka bilandi na ngolo nyonso na kuzonzila na ata muntu ti yandi ke Kristo.
21 Banda ntangu yina, Yesu bandaka kuzonzila na bilandi ya yandi ti yandi me fwana kukwenda na Yeruzalemi, mpe bakuluntu, bamfumu ya banganga-nzambi, mpe milongisi ya Musiku ke talisa yandi mpasi mingi mpe ke kufwa yandi, mpe kilumbu ya tatu, Nzambi ke vumbula yandi.
22 Na yawu, Piere nataka yandi na lweka, mpe bandaka kungala yandi: “Mfumu, kuzonza ve mambu ya mutindu yayi. Ya ke kumina ve nge ata fioti.”
23 Kasi Yesu pesaka Piere mukongo mpe zonzaka: “Luta na manima ya munu, Satana! Nge ke kima yina ke na budisaka munu dibaku, samu ti makanisi ya nge ke ve makanisi ya Nzambi, kasi ya bantu.”
24 Mpe Yesu zonzaka na bilandi ya yandi: “Kana muntu zola kulanda munu, bika yandi kukimanga, yandi baka yinti ya yandi ya mpasi* mpe tatamana na kulanda munu.
25 Ntembe ve, muntu yina ke sosa kuvuukisa luzingu ya yandi ke zimbisa yawu, kasi muntu yina ke zimbisa luzingu* ya yandi samu na munu ke kuzwa yawu.
26 Ya tsyeleka, wapi mambu ya mbote muntu ke kuzwa, kana yandi kuzwa yinza nyonso kasi zimbisa luzingu* ya yandi? To wapi kima muntu ke pesa samu na kusumba luzingu* ya yandi?
27 Ya tsyeleka, Mwana ya muntu ke kwiza na nkembo ya Tata ya yandi na bambazi ya yandi, mpe yandi ke futa konso muntu bansalulu ya yandi.
28 Ya tsyeleka, mu ke na zonzaka na beno ti, bantu ya nkaka yina ke awa ke kufwa ve tekila ba tala Mwana ya muntu kukwiza na Kimfumu ya yandi.”
Banote
^ To: “Mpe yina ke ve ya kukwikama.”
^ To: “Babakala.”
^ To: “Bitunga ya kubumba madya.”
^ To: “Samu ti ni muntu ve.”
^ To: “Hadesi.” Ya ke ndyamu ya bantu nyonso. Tala Yina ya zola zonza.
^ Tala Yina ya zola zonza.
^ To: “Mwela.”
^ To: “Mwela.”
^ To: “Mwela.”
