Nsangu ya Mbote ya Matayi 17:1-27
17 Na manima ya bilumbu 6, Yesu bakaka Piere, Zaki na mpangi ya yandi Yoane, mpe yandi nataka bawu na zulu ya mongo mosi ya yinda, kisika yina ba vandaka kaka bawu mosi.
2 Mpe yandi kitukaka na mantwala ya bawu. Kizizi ya yandi bandaka kungenga mutindu ntangu, mpe bilele ya yandi kumaka ya kungenga* mutindu nsemo.
3 Mpe kuna, Moyize na Eli basikilaka bawu, mpe ba vanda solola na Yesu.
4 Na yawu, Piere zonzaka na Yesu: “Mfumu, ya ke mbote na yina beto kele awa. Kana nge me zola, mu ke yidika awa bayinzo tatu ya bilele, mosi samu na nge, mosi samu na Moyize, mpe mosi samu na Eli.”
5 Piere manisaka ve kuzonza ntangu dituti mosi yina vanda ngenga fukaka bawu, mpe ndinga mosi wakanaka na kati ya dituti mpe zonzaka: “Yayi ni Mwana ya munu yina mu ke zolaka mingi. Mu me ndima yandi. Beno kuwa yandi.”
6 Ntangu bilandi kuwaka yawu, ba tulaka kizizi na ntoto mpe kumaka na boma ya kulutila.
7 Yesu kwizaka pene-pene ya bawu, simbaka bawu mpe zonzaka: “Beno telama. Beno vanda ve na boma.”
8 Ntangu ba nangunaka meso, ba talaka kaka Yesu yandi mosi.
9 Ntangu ba vanda katuka na zulu ya mongo, Yesu zonzaka na bawu: “Beno zonzila kimona-meso yayi na ata muntu tii ntangu Mwana ya muntu ke vumbuka na lufwa.”
10 Na yawu, bilandi yufulaka yandi: “Kasi samu na yinki milongisi ya Musiku ke zonzaka ti Eli me fwana kukwiza ntete?”
11 Yandi vutulaka: “Ya tsyeleka, Eli ke na kwizaka, mpe yandi ke bongisa mambu nyonso.
12 Kasi mu ke na zonzaka na beno ti Eli kwizaka, kasi ba zabaka ve ti ya vandaka ni yandi, mpe ba salaka yandi mambu nyonso yina ba zolaka. Ni mutindu yina mpe Mwana ya muntu ke tala mpasi na maboko ya bawu.”
13 Na yawu, bilandi kwizaka zaba ti yandi vanda zonzila bawu Yoane Mubotiki.
14 Ntangu yandi kumaka pene-pene na kimvuka ya bantu, bakala mosi kwizaka pene-pene ya yandi, fukamaka mpe zonzaka:
15 “Mfumu, tala mwana ya munu ya bakala kyadi. Yandi ke na maladi ya ndeke, mpe ke na mpasi. Bantangu ya nkaka yandi ke kubwaka na tiya, mpe bantangu ya nkaka yandi ke kubwaka na maza.
16 Mu nataka yandi na bilandi ya nge, kasi ba me lenda ve kubelusa yandi.”
17 Yesu zonzaka: “Beno bantu ya ntangu yayi, beno ke bantu ya yimbi mpe yina ke ve na kiminu. Tii wapi ntangu mu ke vanda kaka na beno? Tii wapi ntangu mu fwana kukanga ntima na bamambu ya beno? Beno nata yandi na sika ya munu.”
18 Yesu ngalaka mpeve yina, mpe ya basikaka na kati ya mwana yango. Mpe na mbala mosi mwana belukaka.
19 Na manima, bilandi kwizaka na Yesu na kisika yina ba vandaka bawu mosi, mpe ba yufulaka yandi: “Samu na yinki beto me lenda ve kubingisa mpeve ya yimbi yina?”
20 Yandi vutulaka bawu: “Ya kele samu beno ke na kiminu ya fioti. Ya tsyeleka, mu ke na zonzaka na beno ti kana kiminu ya beno ke nene mutindu mbuma ya mutarde, beno ke zonza na mongo yayi, ‘Katuka awa, kwenda kuna,’ mpe ya ke kwenda. Na yawu, ya ke vanda ve na kima mosi yina beno ke lenda ve kusala.”
21 *——
22 Ntangu ba vukanaka na Galile, Yesu zonzaka na bawu: “Ba ke teka Mwana ya muntu na maboko ya bantu.
23 Ba ke kufwa yandi, kasi na kilumbu ya tatu, Nzambi ke vumbula yandi.” Ntangu bilandi kuwaka mambu yina yandi zonzaka, ba kumaka na kyadi mingi.
24 Ntangu ba kumaka na Kapenawume, bantu yina vanda lokotaka mpaku samu na yinzo ya Nzambi,* kwendaka pene-pene ya Piere, mpe yufulaka yandi: “Mulongi ya beno ke futaka kwandi mpaku samu na yinzo ya Nzambi?”
25 Yandi vutulaka: “Ee, yandi ke futaka.” Kasi ntangu Piere kotaka na yinzo, Yesu tekilaka kuzonza na yandi: “Simoni, nge me kanisa yinki? Na banani bamfumu ya ntoto yayi ke lombaka bampaku ya mutindu na mutindu? Na bana ya bawu to na banzenza?”
26 Yandi vutulaka: “Na banzenza.” Yesu zonzaka na yandi: “Na yawu, bana ya mfumu ke futaka ve mpaku.
27 Kasi samu beto sala ve ti ba bula dibaku, kwenda na nzadi ya mungwa,* mpe losa ndoba. Fungula yinwa ya mbisi ya ntete yina nge ke kuzwa. Nge ke tala mbongo mosi ya kisengo.* Baka yawu, mpe kwenda futa mpaku samu na nge na munu.”
Banote
^ To: “Mpembe.”
^ Tala Yina ba me bwela A3.
^ Na Greke: “Badrakme zole ya mbongo mosi ya kisengo yina ke pesaka difuta ya bilumbu zole ya kisalu.” Tala Yina ba me bwela B14.
^ To: “Mubu.”
^ Na Greke: “Statere mosi.” Bantu ke zonzaka ti ya vandaka badrakme 4. Tala Yina ba me bwela B14.
