Nsangu ya Mbote ya Matayi 18:1-35
18 Na ntangu yina, bilandi kwizaka pene-pene ya Yesu mpe yufulaka yandi: “Nani ya tsyeleka me lutila na Kimfumu ya mazulu?”
2 Na yawu, Yesu bokilaka mwana ya fioti mpe telemisaka yandi na kati-kati ya bawu,
3 mpe yandi zonzaka: “Ya tsyeleka mu ke na zonzaka na beno ti kana beno soba* ve mpe beno kuma ve mutindu bana ya fioti, beno ke kota ata fioti ve na Kimfumu ya mazulu.
4 Na yawu, muntu yina me lutila na kati ya Kimfumu ya mazulu, ni muntu yina ke kuluka mpe ke kuma mutindu mwana yayi.
5 Mpe muntu yina me yamba mwana ya fioti mutindu yandi yayi na nkumbu ya munu, me yamba munu mpe.
6 Kasi konso muntu yina ke salaka ti mosi ya bana ya fioti yayi yina ke na kiminu na munu bula dibaku, ya ke vanda mbote ba kanga yandi ditadi ya nene* na laka mpe ba losa yandi na nzadi ya mungwa.*
7 “Kyadi na yinza samu na bima yina ke salaka ti bantu bula dibaku! Ya tsyeleka, beto lenda kima ve yawu, kasi kyadi na muntu yina ke salaka ti bampangi bula dibaku.
8 Na yawu, kana diboko ya nge, to dikulu ya nge ke salaka ti nge bula dibaku, zenga yawu mpe losa yawu ntama na nge. Ya me lutila mbote na nge na kuzwa luzingu na diboko mosi to dikulu mosi, na kisika ba losa nge na maboko mpe makulu nyonso zole na kati ya tiya ya ntangu nyonso.
9 Dyaka, kana disu ya nge ke salaka ti nge bula dibaku, katula yawu, mpe losa yawu ntama na nge. Ya me lutila mbote na nge na kuzwa luzingu na disu mosi, na kisika ba losa nge na meso nyonso zole na kati ya tiya ya Gehena.*
10 Beno sala keba na kusafula ata muntu mosi ve na kati ya bana ya fioti yayi, samu mu ke na zonzaka na beno ti bambazi ya bawu na mazulu, ke talaka ntangu nyonso kizizi ya Tata ya munu yina ke na mazulu.
11 *——
12 “Beno me kanisa yinki? Kana muntu ke na mameme 100 mpe dimeme mosi me zimbana, yandi ke bika kwandi ve mameme 99 na zulu ya bamongo samu na kukwenda sosa dimeme yina me zimbana?
13 Mpe kana yandi tala yawu, ya tsyeleka mu ke na zonzaka na beno ti, nsayi yina ke vanda na yandi samu na dimeme yayi ke lutila nsayi ya yandi samu na mameme 99 yina zimbanaka ve.
14 Mutindu mosi mpe, Tata ya munu* yina ke na mazulu zola ti ata mosi na kati ya bana ya fioti yayi kufwa.
15 “Dyaka, kana mpangi ya nge me sala disumu, kwenda tala yandi mpe zonzila yandi yawu kaka beno zole. Kana yandi kuwa nge, nge me vutula mpangi ya nge na nzila ya mbote.
16 Kasi, kana yandi kuwa ve, baka muntu mosi to zole, samu ti ya me fwana kuvanda na bambangi* zole to tatu samu na kulakisa kana mambu ke tsyeleka to ve.
17 Kana yandi kuwa ve bawu, zonzila yawu na dibuundu. Kana yandi kuwa ve dibuundu, bika ti yandi kuma mutindu muntu ya makanda, mpe kilokoti-mpaku.
18 “Ya tsyeleka mu ke na zonzaka na beno ti mambu nyonso yina beno ke kanga na ntoto, ba kangaka yawu na zulu. Mpe mambu nyonso yina beno ke fungula na ntoto, ba fungulaka yawu na zulu.
19 Dyaka, mu ke na zonzaka na beno ti kana bantu zole na kati ya beno me wisana awa na ntoto samu na kulomba mambu ni mambu na lusambu, Tata ya munu yina ke na mazulu ke pesa bawu yawu.
20 Samu ti kisika yina bantu zole to tatu me vukana na nkumbu ya munu, mu ke na kati-kati ya bawu.”
21 Na manima, Piere kwizaka mpe zonzaka na yandi: “Mfumu, bambala yikwa mu me fwana kulemvokila mpangi ya munu yina me sala munu yimbi, tii bambala 7?”
22 Yesu zonzaka na yandi: “Mu ke na zonzaka na nge ti, kaka bambala 7 ve, kasi tii bambala 77.
23 “Ni na yawu Kimfumu ya mazulu ke faso mfumu yina vanda sosa kuyidika bamambu ya mbongo na bisadi ya yandi.
24 Ntangu yandi bandaka, ba natinaka yandi bakala mosi yina vanda defa yandi batalanta 10 000.*
25 Kasi samu yandi vandaka ve na kima ya kufuta, mfumu ya yandi zonzaka ba baka yandi, kento ya yandi, bana ya yandi, mpe bima nyonso yina vandaka na yandi, ba tekisa bawu mpe ba futa mfuka ya yandi.
26 Kasi kisadi fukamaka, mpe bondilaka yandi, ‘Bikila munu mwa ntangu, mpe mu ke futa nyonso yina mu ke na defaka nge.’
27 Mfumu talaka yandi kyadi, yandi bikaka yandi mpe katulaka mfuka nyonso yina yandi vanda defa.
28 Kasi ntangu kisadi yango basikaka, yandi talaka mpangi ya yandi ya kisalu yina vanda defa yandi badenie* 100. Yandi simbaka yandi, nyemaka yandi na laka, mpe bandaka kuzonza, ‘Futa munu nyonso yina nge ke na defaka munu.’
29 Mpangi ya yandi fukamaka na mantwala ya yandi mpe bandaka kubondila yandi, ‘Bikila munu mwa ntangu, mpe mu ke futa yina mu ke na defaka nge.’
30 Kasi yandi mangaka mpe losaka mpangi ya yandi na boloko, tii ntangu yandi zola lenda kufuta mfuka ya yandi.
31 Ntangu bampangi ya yandi ya nkaka ya kisalu kuwaka mambu yina salamaka, ba kumaka na kyadi mingi, mpe ba kwendaka zonzila mambu nyonso yina salamaka na mfumu ya bawu.
32 Na manima, mfumu bokilaka kisadi yango mpe zonzaka na yandi, ‘Kisadi ya yimbi, mu me katula mfuka nyonso ya nge ntangu nge bondilaka munu.
33 Nge me fwana ve kutadila mpangi ya nge kyadi mutindu mu tadilaka nge kyadi?’
34 Mfumu fulukaka na nkele, mpe pesaka yandi na maboko ya bantu yina ke kengidilaka boloko, tii ntangu kisadi zola lenda kufuta nyonso yina yandi vanda defa yandi.
35 Tata ya munu yina ke na mazulu ke sala mpe mutindu yina samu na beno, kana mosi na mosi na kati ya beno lemvokila ve mpangi ya yandi na ntima mosi.”
Banote
^ To: “Baluka.”
^ To: “Ditadi ya nene yina ba ke kangaka na mbuluku samu yandi nika bambuma.”
^ To: “Mubu.”
^ Tala Yina ya zola zonza.
^ Tala Yina ba me bwela A3.
^ To ya lenda vanda: “Beno.”
^ Na Greke: “Bayinwa.”
^ Batalanta 10 000 ya arza ke pesaka badenie 60 millions. Tala Yina ba me bwela B14.
^ Tala Yina ya zola zonza, mpe Yina ba me bwela B14.
