Nsangu ya Mbote ya Matayi 19:1-30
19 Ntangu Yesu manisaka kuzonza bamambu yayi, yandi katukaka na Galile, mpe kwendaka na bandilu ya Zude, na simu ya nkaka ya maza ya Yordani.
2 Bantu mingi landaka yandi, mpe yandi belusaka bawu kuna.
3 Bafarize kwizaka kisika yina yandi vandaka samu na kumeka yandi. Ba yufulaka yandi: “Bakala ya kukwela lenda kufwa kwandi dikwela na kento ya yandi samu na mambu ni mambu?
4 Yesu vutulaka bawu: “Beno tangaka ve ti muntu yina yidikaka bawu na mbandukulu salaka bawu bakala na kento,
5 mpe yandi zonzaka, ‘Ni na yawu bakala ke bika tata na mama ya yandi, mpe yandi ke kangama na kento ya yandi, mpe bawu zole ke kuma musuni* mosi?’
6 Na yina, ba ke dyaka ve zole, kasi muntu mosi. Ni na yawu, bika ti ata muntu kabula yina Nzambi me vukisa.”*
7 Bafarize zonzaka na Yesu: “Na yawu, samu na yinki Moyize zonzaka ti bakala fwana kupesa kento mukanda ya kubingisa yandi, mpe kufwa makwela na yandi?”
8 Yesu zonzaka na bawu: “Moyize pesaka nzila ya kufwa makwela na bakento ya beno, samu na ntima ngolo ya beno. Kasi ni mutindu yina ve ya vandaka na kubanda.
9 Mu ke na zonzaka na beno ti konso muntu yina ke kufwa makwela na kento ya yandi samu na mambu yina ke ve kinsuza* mpe kwelana na kento ya nkaka, yandi me sala kinsuza.”*
10 Bilandi ya yandi zonzaka na yandi: “Kana ya ke mutindu yina samu na bakala na kento ya yandi, ya ke ve mbote na kukwela.”
11 Yandi vutulaka na bawu: “Bantu nyonso ve ke ndimaka mambu yayi, kasi kaka bantu yina ke na dikabu yina.
12 Ya ke na ba yina ke kwelaka ve, samu banda kubutaka ya bawu, ya ke na kima yina ke simbaka ve na nzutu ya bawu. Ba ya nkaka ke kwelaka ve samu ba katulaka bawu bubakala.* Ba ya nkaka ke kwelaka ve samu bawu mosi soolaka yawu samu na Kimfumu ya mazulu. Bika ti muntu yina lenda ndima mambu yayi, ndima yawu.”
13 Na manima bantu natinaka yandi bana ya fioti, samu yandi tula bawu maboko mpe sambila samu na bawu. Kasi bilandi ya Yesu ngalaka bawu.
14 Yesu zonzaka na bawu: “Beno bika bana ya fioti, mpe beno sosa ve kukanga bawu nzila na kukwiza na munu, samu Kimfumu ya mazulu ke ya bantu mutindu bawu.”
15 Yandi tulaka bawu maboko mpe katukaka kuna.
16 Ntwenya mosi ya bakala kwizaka na sika ya yandi mpe zonzaka: “Mulongi, wapi mambu ya mbote mu me fwana kusala samu na kuzwa luzingu ya ntangu nyonso?”
17 Yesu zonzaka na yandi: “Samu na yinki nge ke na yufulaka munu na yina me tadila mambu yina ke mbote? Kaka muntu mosi ke mbote. Kasi kana nge zola kuzwa luzingu, zitisa ntangu nyonso misiku.”
18 Yandi zonzaka: “Wapi misiku?” Yesu zonzaka: “Nge fwana kufwa ve muntu. Nge fwana kusala ve kinsuza.* Nge fwana kulaba ve. Nge fwana kupesa ve kimbangi ya luvunu.
19 Zitisa tata ya nge na mama ya nge. Mpe nge fwana kuzola mpangi ya nge mutindu nge mosi.”
20 Ntwenya ya bakala yango zonzaka na Yesu: “Mu ke zitisaka misiku nyonso yayi. Yinki mu me fwana kusala dyaka?”
21 Yesu zonzaka na yandi: “Kana nge zola kuvanda ya kulunga, kwenda tekisa bima yina ke na nge, kabula mbongo yina na bamputu, mpe nge ke kuzwa bimvwama na mazulu. Na manima, kwiza mpe landa munu.”
22 Ntangu ntwenya ya bakala kuwaka mambu yayi, yandi kwendaka na ntima ya kufuluka na kyadi, samu yandi vandaka na bimvwama mingi.
23 Na yawu, Yesu zonzaka na bilandi ya yandi: “Ya tsyeleka mu ke na zonzaka na beno ti, ya ke vanda mpasi samu na mvwama na kukota na Kimfumu ya mazulu.
24 Dyaka, mu ke na zonzaka na beno ti ya lenda vanda pete na kibulu yina ba ke bokilaka shamo na kuluta na dibulu ya ntumbu, kasi ya ke vanda mpasi ya kulutila samu na mvwama na kukota na Kimfumu ya Nzambi.”
25 Ntangu bilandi kuwaka mambu yina, ba yitukaka mingi mpe ba zonzaka: “Nani kwandi lenda vuuka?”
26 Yesu talaka bawu na kati ya meso mpe zonzaka na bawu: “Na bantu ya lenda salama ve, kasi samu na Nzambi, mambu nyonso lenda salama.”
27 Piere vutulaka na Yesu: “Tala, beto me bika bima nyonso mpe beto me landa nge. Na yawu, yinki beto ke kuzwa?”
28 Yesu zonzaka na bawu: “Ya tsyeleka, mu ke na zonzaka na beno ti ntangu bima nyonso ke kuma dyaka ya malu-malu, ntangu Mwana ya muntu ke vanda na kiti ya yandi ya kimfumu yina ke ya kuzangama, beno, bantu yina me landa munu, beno ke vanda na zulu ya bakiti 12 ya kimfumu, mpe beno ke sambisa makanda 12 ya Izraele.
29 Konso muntu yina me bika bayinzo, bayaya to baleki ya kento na ya bakala, tata to mama, bana to bilanga, samu na munu ke kuzwa yawu bambala 100 ya kulutila, mpe ke kuzwa luzingu ya ntangu nyonso.
30 “Kasi bantu mingi yina ke bantu ya ntete ke kuma bantu ya nsuka, mpe bantu ya nsuka ke kuma bantu ya ntete.
Banote
^ To: “Nzutu.”
^ Na Greke: “Yina ba me kanga kintwadi na yinti yina ba ke tulaka na laka ya bibulu samu ba sala kintwadi.”
^ Na Greke, por·nei′a. Tala yina ya zola zonza.
^ Na Greke, moi·khei′a. Tala Yina ya zola zonza.
^ To: “Bambanga.”
^ Na Greke, moi·kheiʹa. Tala Yina ya zola zonza.
