Nsangu ya Mbote ya Matayi 2:1-23
2 Yesu butukaka na Betelemi ya Zude ntangu Erode* vandaka mfumu. Na manima, banganga* yina ke tangaka bambwetete samu na kuzaba bamambu yina ke kwiza na mantwala, katukaka na Esti mpe kwizaka na Yeruzalemi.
2 Ba yufulaka: “Mwana yina me butuka samu na kuvanda mfumu ya Bazwife ke wapi kisika? Samu ti beto talaka mbwetete ya yandi ntangu beto vandaka na Esti, mpe beto me kwiza samu na kufukama* na mantwala ya yandi.”
3 Ntangu mfumu Erode na bantu nyonso ya Yeruzalemi kuwaka yawu, ba vandaka dyaka ve na kizunu.
4 Na manima, Erode vukisaka bamfumu nyonso ya banganga-nzambi na milongisi ya Musiku, mpe yandi yufulaka bawu wapi kisika Kristo* zola butuka.
5 Ba zonzaka na yandi: “Na Betelemi ya Zude, samu mbikudi sonikaka mutindu yayi,
6 ‘Mpe nge, O Betelemi ya bwala ya Zude, nge ke ata fioti ve mbanza ya kulutila fioti na kati ya bambanza yina bamfumu ya Zude ke twadisaka, samu ti mfumu mosi ke basika na kati ya nge, yina ke vanda muvungi samu na dikanda ya munu Izraele.’”
7 Na manima, Erode bokilaka na mansweki banganga yango. Yandi yufulaka bawu samu na kuzaba mbote-mbote na wapi ntangu mbwetete yina basikaka.
8 Na yawu, yandi filisaka bawu na Betelemi, mpe yandi zonzaka na bawu: “Beno kwenda sosa mwana yina mbote-mbote, mpe ntangu beno ke tala yandi, beno kwiza zonzila munu, samu munu mpe mu kwenda fukama na mantwala ya yandi.”
9 Na manima ya kuwa mfumu, ba kwendaka. Mpe mbwetete yina ba talaka ntangu ba vandaka na Esti twadisaka bawu mpe ya kwendaka telama na zulu ya kisika yina mwana vandaka.
10 Ntangu ba talaka mbwetete yina, ba sepelaka mingi.
11 Ntangu ba kotaka na yinzo, ba talaka mwana na mama ya yandi Maria, ba kubwaka na ntoto mpe ba fukamaka na mantwala ya mwana. Ba basisaka bima ya bawu ya ntalu mpe ba pesaka mwana makabu yayi: wolo, maaka ya nsunga ya kitoko* na mananasi ya mire.
12 Kasi Nzambi kebisaka bawu na ndosi na kuvutuka ve na Erode. Na yawu, ba bakaka nzila ya nkaka samu na kuvutuka na bwala ya bawu.
13 Ntangu ba kwendaka, mbazi ya Yehova* talanaka na Yozefi na ndosi mpe zonzaka: “Telama, baka mwana na mama ya yandi mpe beno kima na Ezipte. Beno vanda kuna tii ntangu mu ke zonza na nge na kuvutuka, samu ti na mwa ntangu fioti, Erode ke sosa mwana samu na kufwa yandi.”
14 Na yawu, Yozefi telamaka na mpimpa yina, yandi bakaka mwana na mama ya yandi, mpe ba kwendaka na Ezipte.
15 Yandi bikanaka kuna tii ntangu Erode kufwaka. Ya lungisaka mambu yina Yehova* zonzaka na nzila ya mbikudi ya yandi: “Mu bokilaka mwana ya munu samu yandi basika na Ezipte.”
16 Ntangu Erode talaka ti banganga yango vunaka yandi, yandi dasukaka ya kulutila. Yandi filisaka bantu na kufwa bana nyonso ya babakala ya bwala ya Betelemi, mpe na babwala ya yawu nyonso, kubanda na bana yina vandaka na bamvula zole tii na yisi. Yandi salaka mutindu yina, samu ni yawu vanda kwelana na ntangu yina banganga zonzaka na yandi ti mbwetete basikaka.
17 Ya lungisaka mambu yina Nzambi zonzaka na nzila ya mbikudi Yeremia:
18 “Ndinga mosi wakanaka na Rama, bidilu mpe makelele ya ngolo ya bidilu. Rashele muntu vanda dila bana ya yandi, mpe yandi mangaka ba bondila yandi, samu ba kufwaka.”
19 Ntangu Erode kufwaka, mbazi ya Yehova* talanaka na Yozefi na ndosi, na Ezipte,
20 mpe yandi zonzaka: “Telama, baka mwana na mama ya yandi, mpe beno kwenda na Izraele, samu ti bantu yina vanda sosa luzingu* ya mwana me kufwa.”
21 Na yawu, Yozefi telamaka, yandi bakaka mwana na mama ya yandi, mpe vutukaka na Izraele.
22 Kasi ntangu yandi kuwaka ti Arkelayuse vanda yala Zude na kisika ya tata ya yandi Erode, yandi kuzwaka boma ya kukwenda kuna. Mpe samu Nzambi kebisaka yandi na ndosi, yandi kwendaka na Galile.
23 Yandi kwendaka zinga na mbanza mosi yina ba ke bokilaka Nazareti, samu na kulungisa mambu yina Nzambi zonzaka na nzila ya bambikudi: “Ba ke bokila yandi muntu ya Nazareti.”*
Banote
^ Tala Yina ya zola zonza.
^ To: “Bantu ya mayela.”
^ To: “Kulakisa buzitu.”
^ To: “Masiya, muntu yina ba byekaka to ba soolaka.”
^ Ba ke bokilaka mpe yawu “oliban.” Tala Yina ya zola zonza.
^ Tala Yina ba me bwela A5.
^ Tala Yina ba me bwela A5.
^ Tala Yina ba me bwela A5.
^ To: “Mwela.”
^ Ntangu ya nkaka, ya me katuka na nzonzolo ya Ki-Ebre “Yina me mena” to “mutwikila.”
