Nsangu ya Mbote ya Matayi 23:1-39
23 Na yawu, Yesu zonzaka na bantu mingi yina vandaka kuna mpe na bilandi ya yandi:
2 “Milongisi ya Musiku mpe Bafarize me vanda na zulu ya kiti ya Moyize.
3 Mambu nyonso yina ba ke zonzaka na beno na kusala, beno sala yawu, kasi beno landa ve bansalulu ya bawu, samu ba ke sadilaka ve mambu yina ba ke zonzaka.
4 Ba ke kangaka bifunda ya kilo mpe ke tulaka yawu na zulu ya mapeka ya bantu. Kasi bawu mosi ke zolaka ata fioti ve kunanguna yawu na musapi.
5 Mambu nyonso yina ba ke salaka, ya ke samu na kutalana. Ba ke kumisaka nene mabwanta yina ke na mambu ya Nzambi na kati, mpe ba ke lwataka yawu na bambunzu mutindu bibanda, mpe ke kumisaka yinda nsongi ya bilele ya bawu.
6 Ba ke zolaka kuvanda na bakiti yina ba me bumbila bantu ya mfunu na bafeti, mpe bakiti ya ntete* na bayinzo ya lusambu.
7 Ba ke zolaka ti bantu pesa bawu mbote na buzitu na bazandu, mpe ba bokila bawu Rabi.*
8 Kasi beno, beno bika ve bantu bokila beno Rabi, samu beno ke kaka na Mulongi mosi, mpe beno nyonso ke bampangi.
9 Dyaka, beno bokila ata muntu mosi ve tata na zulu ya ntoto, samu beno ke kaka na Tata mosi yina ke na mazulu.
10 Mpe beno bika ve bantu bokila beno bantwadisi, samu beno ke kaka na Ntwadisi mosi, Kristo.
11 Kasi muntu ya kulutila mfunu na kati ya beno, fwana kuvanda kisadi ya beno.
12 Muntu nyonso yina ke zanguka, ba ke kulumusa yandi. Kasi muntu nyonso yina ke kuluka, ba ke zangula yandi.
13 “Kyadi na beno milongisi ya Musiku, mpe Bafarize, beno bantu yina ke mbote kaka na meso, samu beno ke na kangaka bantu nzila ya kukota na Kimfumu ya mazulu. Beno mosi ke na kotaka ve, mpe beno ke na pesaka ve nzila ya kukota na bantu yina me zola kukota.
14 *——
15 “Kyadi na beno milongisi ya Musiku mpe Bafarize, beno bantu yina ke mbote kaka na meso, samu beno ke na salaka banzyetolo na nzadi ya mungwa* mpe na ntoto samu na kukumisa muntu mosi muntu ya dibuundu ya Bazwife.* Mpe ntangu yandi me kota, beno ke kumisaka yandi muntu yina me fwana kukwenda na Gehena* kulutila beno.
16 “Kyadi na beno, bantwadisi yina ke na meso ya kufwa, yina ke zonzaka, ‘Kana muntu zenga ndefi na nkumbu ya tempelo, ya ke ve mambu. Kasi kana yandi zenga ndefi na nkumbu ya wolo yina ke na tempelo, yandi fwana kulungisa yawu.’
17 Beno ke bizoba mpe bantu ya meso ya kufwa. Yinki me lutila mfunu, wolo to tempelo yina me sala ti wolo kuma santu?
18 Beno ke zonzaka dyaka, ‘Kana muntu zenga ndefi na nkumbu ya kisika ya kuyoka minkayulu, ya ke ve mfunu. Kasi kana yandi zenga ndefi na nkumbu ya dikabu yina ke na zulu ya yawu, yandi fwana kulungisa yawu.’
19 Beno ke bantu ya meso ya kufwa. Yinki me lutila mfunu, dikabu to kisika ya kuyoka minkayulu yina ke salaka ti dikabu kuma santu?
20 Ni na yawu, muntu yina ke zengaka ndefi na nkumbu ya kisika yina ba ke yokaka minkayulu, yandi ke zengaka mpe ndefi na nkumbu ya bima nyonso yina ke na zulu ya yawu.
21 Muntu yina ke zengaka ndefi na nkumbu ya tempelo, ke zengaka mpe ndefi na nkumbu ya Muntu yina ke zingaka na kati ya yawu.
22 Mpe muntu yina ke zengaka ndefi na nkumbu ya mazulu, ke zengaka mpe ndefi na nkumbu ya kiti ya kimfumu ya Nzambi, mpe na nkumbu ya Nzambi yina ke ya kuvanda na zulu ya yawu.
23 “Kyadi na beno milongisi ya Musiku mpe Bafarize, beno bantu yina ke mbote kaka na meso, samu beno ke pesaka Nzambi kikunku mosi na kati ya bikunku 10 ya bima yina beno ke kundaka, mutindu mante, anete, kume.* Kasi beno ke vwezaka mambu ya kulutila mfunu na kati ya Musiku, mutindu lunungu,* kutala bantu kyadi, mpe kuvanda ya kukwikama. Ya lungaka beno pesa bima yina, kasi beno kuvweza ve bamambu ya kulutila mfunu na kati ya Musiku.
24 Beno bantwadisi ya meso ya kufwa, beno ke katulaka banzinzi na malafu yina beno ke kunwaka, kasi beno ke minaka kibulu ya nene yina ba ke bokilaka shamo.
25 “Kyadi na beno milongisi ya Musiku mpe Bafarize, beno bantu yina ke mbote kaka na meso, samu beno ke sukulaka ngaanda ya kopo mpe ya ndonga, kasi na kati ya ke ya kufuluka na mvindu samu ti beno ke na lukoso* mingi, mpe beno ke kanisaka kaka na kulungisa bansatu ya beno.
26 Mufarize ya meso ya kufwa, sukula ntete kati ya kopo mpe ya ndonga, samu ngaanda ya yawu mpe kuma bunkete.
27 “Kyadi na beno milongisi ya Musiku mpe Bafarize, beno bantu yina ke mbote kaka na meso, samu beno ke mutindu bandyamu yina ba me kumisa mpembe. Na ngaanda ya yawu, ya ke talanaka kitoko, kasi na kati, ya ke ya kufuluka na mikwa ya bantu ya kufwa, mpe mvindu ya mutindu na mutindu.
28 Mutindu mosi mpe, na ngaanda, beno ke talanaka bantu ya lunungu,* kasi na kati beno ke ya kufuluka na luvunu mpe mambu ya kuvweza misiku.
29 “Kyadi na beno milongisi ya Musiku mpe Bafarize, beno bantu yina ke mbote kaka na meso, samu beno ke tungaka bandyamu ya bambikudi, mpe ke kumisaka kitoko bandyamu* ya bantu ya lunungu.*
30 Mpe beno ke zonzaka, ‘Kana beto zingaka na ntangu ya bankooko ya beto, beto zola vukana ve na bawu samu na kufwa bambikudi.’
31 Ni na yawu beno ke na lakisaka beno mosi ti beno ke bana ya ba yina kufwaka bambikudi.
32 Na yawu, beno manisa kisalu yina bankooko ya beno bandaka.
33 “Beno ke banyoka, bana ya bampidi. Wapi mutindu beno ke kima ba sambisa beno mpe ba losa beno na Gehena?*
34 Ni na yawu mu ke na filisaka beno bambikudi, bantu ya ndwenga, mpe milongi. Beno ke kufwa ba ya nkaka mpe beno ke kanga bawu na zulu ya bayinti. Ba ya nkaka, beno ke bula bawu bashikoti na bayinzo ya beno ya lusambu, mpe beno ke talisa bawu mpasi na kati ya bambanza,
35 samu menga nyonso ya bantu ya lunungu* yina ba mwangisaka na ntoto vanda na zulu ya beno, katuka na menga ya muntu ya lunungu Abele tii na menga ya Zakari mwana ya Barakiya, yina beno kufwaka na kati-kati ya kisika ya santu mpe kisika ya kuyoka minkayulu.
36 Ya tsyeleka, mu ke na zabisaka beno ti mambu nyonso yayi ke kumina na bantu ya ntangu yayi.
37 “Yeruzalemi, Yeruzalemi, mbanza yina ke kufwaka bambikudi, mpe ke losilaka matadi na bantu yina ba ke filisaka kuna. Bambala yikwa mu sosaka kuvukisa bana ya nge mutindu nsusu ya kento ke vukisaka bana ya yandi na yisi ya mapapu ya yandi! Kasi beno mangaka.
38 Tala, yinzo ya beno me bikana yawu mosi.*
39 Ni na yawu mu ke na zonzaka na beno ti beno ke tala dyaka ve munu, kubanda ntangu yayi tii ntangu yina beno ke zonza: ‘Bika ti muntu yina ke na kwizaka na nkumbu ya Yehova* kuzwa lusakumunu!’”
Banote
^ To: “Kulutila mbote.”
^ To: “Mulongi.”
^ Tala Yina ba me bwela A3.
^ To: “Mubu.”
^ Na Greke: “Prozelite.”
^ Tala Yina ya zola zonza.
^ To: “Ludedomo.”
^ “Mante,” “anete” mpe “kume,” ke matiti ya nsunga ya kitoko yina ke salaka ti madya vanda kitoko.
^ To: “Muyibi.”
^ To: “Kudedama.”
^ To: “Bandyamu ya kubambuka moyo.”
^ To: “Kudedama.”
^ Tala Yina ya zola zonza.
^ To: “Kudedama.”
^ To ya lenda vanda: “Me bikana na ata kima.”
^ Tala Yina ba me bwela A5.
