Nsangu ya Mbote ya Matayi 25:1-46
25 “Kimfumu ya mazulu ke vanda mutindu bantwenya ya bakento* 10 yina me baka bamwinda ya bawu mpe me basika samu na kukwenda bwabana bakala yina ke na kwelanaka.
2 Na kati ya bawu, tanu vandaka bizoba mpe tanu ya nkaka vandaka mayela.*
3 Ba yina vandaka bizoba bakaka bamwinda ya bawu, kasi ba bakaka ve mafuta.
4 Kasi ba yina vandaka mayela bakaka bamwinda na mabwanta ya mafuta.
5 Samu bakala yina vanda kwelana vanda kwiza ve na mbangu, bawu nyonso kumaka na pongi mpe lalaka.
6 Na kati-kati ya mpimpa, ba kuwaka ndinga mosi yina zonzaka na ngolo, ‘Bakala yina ke na kwelanaka yandi yayi! Beno basika samu na kubwabana yandi.’
7 Bakento nyonso ya bantwenya yayi vumbukaka mpe bongisaka bamwinda ya bawu.
8 Ba yina vandaka bizoba zonzaka na ba yina vandaka mayela, ‘Beno pesa beto ndambu ya mafuta ya beno, samu bamwinda ya beto ke na sosaka kufwa.’
9 Ba yina vandaka mayela vutulaka bawu, ‘Kana beto pesa beno, ntangu ya nkaka ya ke lunga ve beto na beno. Beno kwenda sumba ya beno mosi na ba yina ke tekisaka yawu.’
10 Ntangu ba kwendaka sumba yawu, bakala yina vanda kwelana kwizaka. Bantwenya ya bakento yina vandaka ya kubongama, kotaka na yandi na kisika ya mukembo ya makwela, mpe ba kangaka mwelo na manima ya bawu.
11 Na manima, bantwenya ya nkaka ya bakento vutukaka mpe ba zonzaka, ‘Mfumu, mfumu, fungula beto mwelo!’
12 Yandi vutulaka bawu, ‘Ya tsyeleka, mu ke na zonzaka na beno ti, mu zaba ve beno.’
13 “Ni na yawu, beno vanda ekenge, samu beno zaba ve kilumbu to ngunga.
14 “Kimfumu ya mazulu ke mpe mutindu bakala yina vanda bongama samu na kukwenda na bwala ya bunzenza. Yandi bokilaka bisadi ya yandi mpe pesaka bawu bima ya yandi.
15 Yandi pesaka batalanta* tanu na mosi, zole na ya nkaka, mpe mosi na ya nkaka dyaka. Yandi pesaka bawu yawu na kutalaka ngolo ya konso muntu, mpe yandi kwendaka.
16 Na mbala mosi, kisadi yina kuzwaka batalanta tanu kwendaka sala mumbungu na yawu mpe yandi kuzwaka batalanta tanu ya nkaka.
17 Mutindu mosi mpe, kisadi yina ba pesaka batalanta zole, kuzwaka dyaka zole ya nkaka na zulu.
18 Kasi kisadi yina ba pesaka kaka talanta mosi kwendaka timuna dibulu mpe kundaka mbongo ya mfumu ya yandi.
19 “Bantangu mingi na manima, mfumu ya bisadi vutukaka samu na kutala yinki ba salaka na mbongo ya yandi.
20 Kisadi yina ba pesaka batalanta tanu kwizaka, mpe nataka batalanta tanu ya nkaka. Yandi zonzaka, ‘Mfumu, nge pesaka munu batalanta tanu. Tala, munu me kuzwa batalanta tanu ya nkaka.’
21 Mfumu ya yandi zonzaka na yandi: ‘Nge me sala kisalu ya mbote! Nge ke kisadi ya mbote mpe ya kukwikama. Nge me vanda ya kukwikama na bima ya fioti, mu ke tula nge na zulu ya bima mingi. Kwiza yangalala na mfumu ya nge.
22 Na manima, kisadi yina ba pesaka batalanta zole, kwizaka mpe zonzaka, ‘Mfumu, nge pesaka munu batalanta zole. Tala, mu me kuzwa batalanta zole ya nkaka.’
23 Mfumu ya yandi zonzaka na yandi: ‘Nge me sala kisalu ya mbote! Nge ke kisadi ya mbote mpe ya kukwikama. Nge vandaka ya kukwikama na bima ya fioti, mu ke tula nge na zulu ya bima mingi. Kwiza yangalala na mfumu ya nge.’
24 Na nsuka, kisadi yina ba pesaka talanta mosi kwizaka mpe zonzaka, ‘Mfumu, mu zabaka ti nge ke muntu yina ke zolaka ve buzoba. Nge ke bukaka bambuma na kisika yina nge kundaka ve, mpe ke bakaka bambuma yina nge katulaka ve bampusu.
25 Na yawu, mu kuzwaka boma mpe mu kwendaka bumba talanta ya nge na yisi ya ntoto. Tala, talanta ya nge yawu yayi.’
26 Mfumu ya yandi zonzaka na yandi: ‘Nge ke kisadi ya yimbi mpe yina ke na bubolo. Nge zabaka ti mu ke bukaka bambuma na kisika yina mu kundaka ve, mpe ke bakaka bambuma yina mu katulaka ve bampusu.
27 Nge zola tula mbongo ya munu na banki, samu ntangu mu zola vutuka, mu zola kuzwa yawu na kima na zulu.’
28 “‘Na yawu, beno botola talanta yina yandi ke na yawu, mpe beno pesa yawu na muntu yina ke na batalanta 10.
29 Samu, na konso muntu yina ke na bima, ba ke bwela yandi bima ya nkaka, mpe yandi ke kuma na yawu mingi. Kasi muntu yina ke ve na bima ba ke katula yandi ata bima yina yandi ke na yawu.
30 Beno losa kisadi ya mpamba yayi na ngaanda na kati ya mpimpa. Ni kuna yandi ke dila mpe ke kwetisa meno.’
31 “Ntangu Mwana ya muntu ke kwiza na kati ya nkembo ya yandi na bambazi nyonso, yandi ke vanda na kiti ya yandi ya kimfumu ya kuzangama.
32 Ba ke vukisa makanda nyonso na mantwala ya yandi. Yandi ke kabula bawu mutindu muvungi ke kabulaka mameme na bankombo.
33 Yandi ke tula mameme na diboko ya yandi ya bakala, mpe bankombo na diboko ya yandi ya kento.
34 “Mfumu ke zonza na bantu yina ke vanda na diboko ya yandi ya bakala: ‘Beno kwiza, beno bantu yina Tata ya munu me sakumuna. Beno baka Kimfumu yina ba bongisaka samu na beno katuka kubanda ya yinza.*
35 Ya tsyeleka, mu vandaka na nsatu, mpe beno pesaka munu madya. Mu vandaka na nsatu ya maza, mpe beno pesaka munu maza. Mu vandaka nzenza, mpe beno yambaka munu maboko mwasi.
36 Mu vandaka ve na bilele,* mpe beno lwatisaka munu. Mu vandaka beela, mpe beno sadisaka munu. Mu vandaka na boloko, mpe beno kwizaka tala munu.’
37 Na yina, bantu ya lunungu* ke vutula yandi: ‘Mfumu, na wapi ntangu beto talaka nge na nsatu mpe beto dikisaka nge, to beto talaka nge na nsatu ya maza mpe beto pesaka nge maza?
38 Na wapi ntangu nge vandaka nzenza mpe beto yambaka nge maboko mwasi, to nge vandaka ve na bilele mpe beto lwatisaka nge?
39 Na wapi ntangu nge vandaka beela, to nge vandaka na boloko mpe beto kwizaka tala nge?’
40 Mfumu ke vutula bawu, ‘Ya tsyeleka, mu ke na zonzaka na beno ti konso ntangu yina beno salaka yawu na mosi ya kulutila fioti na kati ya bampangi ya munu yayi, ni na munu beno salaka yawu.’
41 “Na manima, yandi ke zonza na ba yina ke vanda na diboko ya yandi ya kento: ‘Beno kwenda ntama na munu, beno yina ke ya kuloka. Beno kwenda na tiya ya ntangu nyonso yina ba bongisaka samu na Dyabulu na bambazi ya yandi.
42 Ya tsyeleka, ntangu mu vandaka na nsatu, beno pesaka munu ata kima ya kudya. Ntangu mu vandaka na nsatu ya maza, beno pesaka ve munu yawu.
43 Mu vandaka nzenza, kasi beno yambaka ve munu maboko mwasi. Mu vandaka ve na bilele, kasi beno lwatisaka ve munu. Mu vandaka beela, mpe mu vandaka na boloko, kasi beno sadisaka ve munu.
44 Bawu mpe ke vutula: ‘Mfumu, na wapi ntangu beto talaka nge na nsatu, mpe beto sadisaka ve nge? Na wapi ntangu beto talaka ti nge vandaka nzenza, kasi beto sadisaka ve nge? Na wapi ntangu beto talaka ti nge vandaka ve na bilele, nge vandaka beela, nge vandaka na boloko, mpe beto sadisaka ve nge?’
45 Mpe yandi ke vutula: ‘Ya tsyeleka, mu ke na zonzaka na beno ti konso ntangu yina beno salaka ve yawu na mosi ya kulutila fioti na kati ya bampangi ya munu yayi, ni na munu beno salaka ve yawu.’
46 Bantu yayi ke kufwa* samu na ntangu nyonso, kasi bantu ya lunungu* ke kuzwa luzingu ya ntangu nyonso.”
Banote
^ Na Greke: “Bakento yina zaba ntete ve babakala.”
^ To: “Na ndwenga.”
^ Talanta mosi ya Bagreke ke pesaka bakilo 20,4. Tala Yina ba me bwela B14.
^ Ya zola zonza, “banda ntangu yina Adami na Eve bandaka kuzwa bana.”
^ Na ndinga ya Greke nzonzolo yayi ke lakisaka ve kaka muntu yina ke kimpene nzutu nyonso. Kasi mpe muntu yina me lwata “kaka mwa kilele ya kati.”
^ To: “Kudedama.”
^ Na Greke: “Ba ke zenga bawu,” mutindu ba ke zengaka bintala ya yinti.
^ To: “Kudedama.”
