Nsangu ya Mbote ya Matayi 26:1-75
-
Banganga-nzambi me sala mfundu samu na kufwa Yesu (1-5)
-
Ba me mwangisa mafuta ya nsunga ya kitoko na zulu ya Yesu (6-13)
-
Pake ya nsuka mpe ba me teka Yesu (14-25)
-
Yesu me sala mbala ya ntete Madya ya Nkokila ya Mfumu (26-30)
-
Yesu me bikula ti Piere ke manga yandi (31-35)
-
Yesu me sambila na Getesemane (36-46)
-
Ba me kanga Yesu (47-56)
-
Lusambusu na mantwala ya kimvuka ya bakuluntu ya Bazwife (57-68)
-
Piere me manga Yesu (69-75)
26 Na manima ya kuzonza mambu nyonso yayi, Yesu zonzaka na bilandi ya yandi:
2 “Beno me zaba ti ya me bikana bilumbu zole samu na kubanda mukembo ya Pake. Ba ke pesa Mwana ya muntu na maboko ya bantu samu ba kufwa yandi na zulu ya yinti.”
3 Bamfumu ya banganga-nzambi na bakuluntu vukanaka na ngaanda ya yinzo ya nganga-nzambi ya nene, Kayife.
4 Ba salaka mfundu samu na kubwila* Yesu na mayela* mpe kufwa yandi.
5 Kasi ba vanda zonza: “Na kilumbu ya mukembo ve, samu bantu sala ve muvusu.”
6 Ntangu Yesu vandaka na Betani, na kati ya yinzo ya Simoni muntu ya bwazi,
7 kento mosi kwizaka pene-pene ya yandi. Yandi vandaka na kitutu yina ba yidikaka na albatre, ya kufuluka na mafuta ya nsunga ya kitoko yina vandaka ntalu mingi. Yandi bandaka kumwangisa yawu na yintu ya Yesu ntangu yandi vanda kudya.*
8 Ntangu bilandi talaka yawu, ba dasukaka, mpe ba zonzaka: “Samu na yinki yandi ke na bebisaka yawu mutindu yayi?
9 Ba zola tekisa yawu na mbongo mingi mpe kupesa mbongo yina na bamputu.”
10 Ntangu Yesu zabaka mambu yayi, yandi zonzaka na bawu: “Samu na yinki beno ke na kwamisaka kento yayi? Yandi me sala munu mambu mosi ya mbote.
11 Bamputu ke vanda na beno ntangu nyonso, kasi munu, mu ke vanda ve na beno ntangu nyonso.
12 Ntangu kento yayi me tula mafuta ya nsunga ya kitoko yayi na nzutu ya munu, ya ke samu na kuyidika nzutu ya munu tekila ba zika munu.
13 Ya tsyeleka, mu ke na zonzaka na beno ti, bisika nyonso yina ba ke samuna nsangu ya mbote yayi na yinza ya muvimba, ba ke zonzila mpe mambu yina kento yayi me sala, samu na kubambuka yandi moyo.”
14 Mosi ya bantumwa 12 yina ba vanda bokilaka Yuda Iskayote, kwendaka tala bamfumu ya banganga-nzambi,
15 mpe yandi zonzaka: “Yinki beno ke pesa munu samu mu tekisa beno yandi?” Ba wisanaka na Yuda samu na kupesa yandi bambongo ya bisengo 30.
16 Banda ntangu yina, yandi vanda sosa ntangu ya mbote samu na kuteka Yesu.
17 Na kilumbu ya ntete ya mukembo ya Mampa yina ke ve na levire, bilandi kwizaka yufula Yesu: “Na wapi kisika nge me zola ti beto yidikila nge madya ya Pake?”
18 Yandi vutulaka: “Beno kwenda na mbanza, na sika ya kingandi mpe beno zonza na yandi, ‘Mulongi me zonza, “Ntangu ya munu me lunga. Ni na yinzo ya nge mu ke sala mukembo ya Pake na bilandi ya munu.”’”
19 Bilandi salaka mutindu Yesu zabisaka bawu, mpe ba yidikaka bima nyonso samu na Pake.
20 Ntangu nkokila kumaka, Yesu vandaka na mesa na bilandi ya yandi 12.
21 Ntangu ba vanda kudya, Yesu zonzaka: “Ya tsyeleka, mu ke na zonzaka na beno ti muntu mosi na kati ya beno ke teka munu.”
22 Bilandi kumaka na kyadi ya kulutila. Mosi na mosi na kati ya bawu bandaka kuzonza na Yesu: “Mfumu, ya ke ni munu?”
23 Yesu vutulaka: “Muntu yina ke tula diboko na munu na kati ya ndonga, ni yandi ke teka munu.
24 Ya tsyeleka, Mwana ya muntu ke kufwa, mutindu ba sonikaka yawu na yina me tadila yandi. Kasi kyadi na muntu yina ke teka Mwana ya muntu. Ya zola vanda mbote na muntu yina na kubutuka ve.”
25 Yuda yina zola teka Yesu zonzaka: “Mulongi, ya ke ni munu?” Yesu vutulaka yandi: “Nge mosi muntu me zonza yawu.”
26 Ntangu ba vanda kudya, Yesu bakaka dimpa. Na manima yandi salaka lusambu mpe zengaka yawu. Yandi pesaka yawu na bilandi mpe zonzaka: “Beno baka mpe beno kudya. Ya ke na fwanisaka nzutu ya munu.”
27 Yandi bakaka mpe kopo ya vinu, mpe yandi salaka lusambu. Yandi pesaka bawu yawu, mpe zonzaka: “Beno kunwa yawu beno nyonso,
28 samu ya ke na fwanisaka menga ya munu, menga ya luwawanu, yina ke mwangana samu ti bantu mingi kuzwa mulemvo ya masumu.
29 Kasi mu ke na zonzaka na beno ti mu ke kunwa dyaka ve vinu yayi tii kilumbu yina mu ke kunwa dyaka yawu kintwadi na beno, na kati ya Kimfumu ya Tata ya munu.”
30 Na manima, ba yimbaka banzimbu* samu na kukumisa Nzambi. Ba basikaka mpe ba kwendaka na Mongo ya bayinti ya Olive.
31 Yesu zonzaka na bawu: “Na mpimpa yayi, beno nyonso ke bula dibaku samu na mambu yina ke kumina munu, samu ya ke ya kusonama, ‘Mu ke bula muvungi, mpe mameme ke mwangana.’
32 Kasi ntangu mu ke vumbuka na lufwa, mu ke tekila na Galile mpe mu ke vingila beno kuna.”
33 Piere zonzaka na yandi: “Ata ti bawu nyonso bula dibaku samu na mambu yina ke kumina nge, munu, mu ke bula ata fioti ve dibaku.”
34 Yesu zonzaka na yandi: “Ya tsyeleka, mu ke na zonzaka na nge ti na mpimpa yayi, tekila nsusu ya bakala kokola, nge ke manga munu bambala tatu.”
35 Piere zonzaka na yandi: “Ata ya ke lomba ti mu kufwa na nge, mu ke manga ve nge ata fioti.” Bilandi nyonso ya nkaka mpe zonzaka mambu ya mutindu mosi.
36 Na yawu, Yesu kwendaka na bilandi na kisika yina ba vanda bokila Getesemane, mpe yandi zonzaka na bawu: “Beno vanda awa ntangu mu ke na kwendaka kuna samu na kusambila.”
37 Yandi nataka Piere mpe bana zole ya Zebede. Yandi bandaka kukuma na kyadi mingi mpe na mpasi ya kulutila na ntima.
38 Mpe yandi zonzaka na bawu: “Mu* ke na kyadi mingi, kyadi ya kulutila. Beno bikana awa, beno lala ve, mpe beno vanda ekenge kintwadi na munu.”
39 Yandi kwendaka na mwa mantwala, fukamaka kizizi na ntoto, mpe sambilaka Nzambi: “Tata ya munu, kana ya lenda salama, nata kopo yayi ntama na munu. Kasi ve mutindu mu zola, kasi faso nge zola.”
40 Yandi vutukaka kisika yina bilandi vandaka, mpe kutanaka bawu ya kulala. Na yawu, yandi zonzaka na Piere: “Beno me lenda ve kuvanda ekenge kintwadi na munu ngunga mosi?
41 Beno vanda ekenge, mpe beno sambila ntangu nyonso, samu beno kubwa ve na ntontolo. Ya tsyeleka, mpeve ke tiya mingi,* kasi musuni kele ya kulemba.”
42 Yandi kwendaka dyaka mbala ya zole, mpe sambilaka Nzambi: “Tata ya munu, kana ya lenda salama ve ti kopo yayi luta, mpe kana mu me fwana kunwa yawu, bika ti luzolo ya nge salama.”
43 Yandi kwizaka dyaka mpe talaka bawu ya kulala, samu meso ya bawu vandaka ya kufuluka na pongi.
44 Yandi bikaka bawu, kwendaka dyaka, sambilaka mbala ya tatu, mpe vutukilaka kaka mambu mosi.
45 Na manima, yandi vutukaka na kisika yina bilandi vandaka mpe zonzaka na bawu: “Na ntangu ya mutindu yayi beno ke na lalaka mpe ke na pemaka? Beno tala, ngunga me lunga yina ba ke teka Mwana ya muntu na maboko ya basumuki.
46 Beno telama, beto kwenda. Muntu yina ke teka munu me kwiza.”
47 Ntangu yandi vanda zonza ntete, Yuda, mosi ya bantumwa 12, kwizaka na bantu mingi yina vandaka na bambele mpe bayinti. Ni bamfumu ya banganga-nzambi mpe bakuluntu filisaka bawu.
48 Muntu yina tekaka yandi pesaka bawu kidimbu mpe zonzaka na bawu: “Muntu yina mu ke pesa bizu, ni yandi. Beno kanga yandi.”
49 Yandi kwendaka mbala mosi na Yesu mpe zonzaka: “Mbote Rabi.”* Mpe yandi pesaka Yesu bizu na lembami nyonso.
50 Kasi Yesu zonzaka na yandi: “Mpangi, na wapi mambu nge me kwiza awa?” Na yina, ba kwizaka pene-pene ya Yesu, ba simbaka yandi, mpe ba kangaka yandi.
51 Kasi mosi ya ba yina vandaka na Yesu basisaka mbele ya yandi, bulaka yawu na kisadi ya nganga-nzambi ya nene mpe zengaka yandi dikutu.
52 Na yina Yesu zonzaka na yandi: “Vutula mbele ya nge na kisika ya yawu, samu ti bantu nyonso yina ke bakaka mbele ke kufwaka na mbele.
53 Nge kanisa ti mu lenda bokila ve Tata ya munu, samu yandi filisa munu malu-malu yayi bimvuka kuluta 12 ya bambazi?
54 Kana mu sala mutindu yina, wa’ faso Masonoko yina ke zonzaka ti ya fwana kusalama mutindu yayi ke lungana?”
55 Na manima, Yesu zonzaka na bimvuka ya bantu: “Beno me kwiza kanga munu na bambele mpe bayinti mutindu ba ke kangaka muyibi? Bilumbu nyonso, mu vandaka ya kuvanda na tempelo samu na kulonga, mpe beno kangaka ve munu.
56 Kasi nyonso yayi me salama, samu na kulungisa mambu yina bambikudi sonikaka.”* Na yina, bilandi nyonso bikaka yandi mpe kimaka.
57 Bantu yina kangaka Yesu nataka yandi na Kayife, nganga-nzambi ya nene, kisika yina milongisi ya Musiku na bakuluntu vandaka ya kuvukana.
58 Piere vanda landa yandi mwa ntama na manima, tii na lupangu ya nganga-nzambi ya nene. Na manima ya kukota, yandi vandaka ya kuvanda na bisadi ya yinzo, samu na kutala faso bamambu zola manisa.
59 Bamfumu ya banganga-nzambi mpe kimvuka nyonso ya bakuluntu ya bazwife, vanda sosa bantu yina ke vunina Yesu bamambu samu ba kufwa yandi.
60 Ata ti bambangi mingi ya luvunu vanda kwiza, ba kuzwaka ve mambu ya yimbi na nkumbu ya Yesu. Na manima, bantu zole kwizaka,
61 mpe zonzaka: “Muntu yayi zonzaka, ‘Mu ke lenda kumwangisa tempelo ya Nzambi, mpe kutunga dyaka yawu na bilumbu tatu.’”
62 Na yawu, nganga-nzambi ya nene telamaka mpe yufulaka Yesu: “Nge ke na ata mambu ya kuzonza? Nge ke na kuwaka ve bamambu yina bantu yayi ke na zonzaka na nkumbu ya nge?”
63 Kasi Yesu vandaka kaka swi. Na yawu, nganga-nzambi ya nene zonzaka na Yesu: “Nge fwana kuzonza tsyeleka, kana ve Nzambi ya moyo ke semba nge. Nge ke Kristo, Mwana ya Nzambi?”
64 Yesu zonzaka na yandi: “Nge mosi muntu me zonza yawu. Kasi mu ke na zonzaka na beno ti, banda ntangu yayi beno ke tala Mwana ya muntu, ya kuvanda na diboko ya bakala ya Nzambi ya Ngolo mpe kukwiza na kati ya matuti.”
65 Na yina, nganga-nzambi ya nene pasulaka bilele ya yandi mpe zonzaka: “Yandi me vweza Nzambi. Beto ke dyaka na nsatu ya bambangi? Beno me kuwa wapi mutindu yandi me vweza Nzambi.
66 Wapi yina ke dikanisi ya beno?” Ba vutulaka: “Yandi me lunga kufwa.”
67 Na yawu, ba losilaka yandi mante na kizizi, mpe ba bulaka yandi makofi. Ba ya nkaka vanda bula yandi bambata na matama,
68 mpe vanda zonza: “Nge Kristo, bikula na beto. Nani me bula nge?”
69 Piere vandaka ya kuvanda na kati ya ngaanda ya lupangu, mpe kisadi mosi ya kento kwizaka mpe zonzaka na yandi: “Nge mpe vandaka na Yesu, muntu ya Galile.”
70 Kasi yandi wanganaka na meso ya bantu nyonso, mpe zonzaka: “Mu zaba ve mambu yina nge ke na zonzaka.”
71 Ntangu yandi basikaka na mwelo ya lupangu, kisadi ya nkaka ya kento talaka yandi, mpe zonzaka na ba yina vandaka kuna: “Muntu yayi vandaka na Yesu, muntu ya Nazareti.”
72 Yandi wanganaka dyaka, zengaka ndefi mpe zonzaka: “Mu zaba ve muntu yayi.”
73 Na manima ya mwa ntangu, ba yina vandaka na kisika yina, kwizaka mpe zonzaka na Piere: “Ya tsyeleka, nge mpe ke mosi ya bawu, samu faso ya nge ya kuzonza* ke na lakisaka yawu.”
74 Na manima, Piere bandaka kubokila yimbi na nzutu ya yandi, kuzenga ndefi mpe kuzonza: “Mu zaba ve muntu yango.” Mpe na mbala mosi, nsusu ya bakala kokolaka.
75 Piere bambukaka moyo na mambu yina Yesu zabisaka yandi: “Tekila nsusu ya bakala kokola, nge ke manga munu bambala tatu.” Na yawu, Piere basikaka na lupangu mpe kufwaka na kudila.
Banote
^ To: “Kukanga.”
^ To: “Mayela ya yimbi.”
^ To: “Ya kuyalumuna na mesa.”
^ To: “Bankunga.”
^ To: “Mwela ya munu.”
^ To: “Ke zolaka.”
^ To: “Mulongi.”
^ To: “Masonoko ya bambikudi.”
^ To: “Ndinga ya nge.”
