Nsangu ya Mbote ya Matayi 27:1-66
27 Ntangu suka kumaka, bamfumu nyonso ya banganga-nzambi mpe bakuluntu vukanaka samu na kubaka mukanu ya kufwa Yesu.
2 Na manima ya kukanga yandi basinga, ba nataka yandi mpe ba pesaka yandi na maboko ya Pilate, mfumu ya kizunga.
3 Ntangu Yuda, muntu yina tekaka Yesu, talaka ti ba zengilaka Yesu lufwa, yandi nyongaka mpe kwendaka na bambongo ya bisengo 30 na sika ya bamfumu ya banganga-nzambi mpe bakuluntu samu na kuvutula bawu yawu.
4 Yandi zonzaka: “Mu me sumuka ntangu mu me teka menga ya muntu yina me sala ata kima ya yimbi.” Ba vutulaka yandi: “Ya me tala ve beto, ya ke mambu ya nge!”
5 Na yawu, yandi losaka bambongo ya bisengo na tempelo, mpe kwendaka. Na manima, yandi kwendaka lelama.
6 Bamfumu ya banganga-nzambi lokotaka bambongo ya bisengo yango mpe zonzaka: “Musiku ke yiminaka na kutula yawu na kisika ya tempelo yina ba ke tulaka bima ya santu, samu ya ke mbongo ya menga.”
7 Na manima ya kusolola kintwadi, ba sadilaka mbongo yina samu na kusumba bilanga ya muntu yina ke yidikaka bima na bantoto, samu ya kuma kisika ya kuzika banzenza.
8 Ni na yawu, tii bubu yayi ba ke bokilaka bilanga yango, Bilanga ya Menga.
9 Ni kuna lunganaka mambu yina Nzambi zonzaka na nzila ya mbikudi Yeremia: “Ba bakaka bambongo ya bisengo 30, ntalu yina bana ya nkaka ya Izraele wisanaka kufuta samu na yandi,
10 mpe ba pesaka yawu samu na kusumba bilanga ya muntu ke yidikaka bima na bantoto, mutindu Yehova* tumisaka munu.”
11 Yesu vandaka ya kutelama na mantwala ya mfumu Pilate, mpe Pilate yufulaka yandi: “Ni nge Mfumu ya Bazwife?” Yesu vutulaka: “Nge mosi muntu me zonza yawu.”
12 Kasi ntangu bamfumu ya banganga-nzambi na bakuluntu vanda funda yandi, yandi zonzaka ata kima.
13 Na yawu Pilate zonzaka na yandi: “Nge ke na kuwaka mambu nyonso yina ba ke na zonzaka na nkumbu ya nge?”
14 Kasi Yesu vutulaka ata kima, ata dyambu mosi ve. Ya kamwisaka mingi mfumu Pilate.
15 Na konso mukembo, mfumu vandaka na kifu ya kubasisaka muntu mosi na boloko, muntu ni muntu yina bantu ke soola.
16 Kaka na ntangu yina, ya vandaka na muntu mosi ya kuzabana na boloko, na nkumbu ya Barabase.
17 Na yawu Pilate yufulaka na kimvuka ya bantu yina vandaka kuna: “Beno zola mu basisa nani, Barabase to Yesu yina ba ke bokilaka Kristo?”
18 Ya tsyeleka, Pilate zabaka ti ni kimbanda nataka bawu na kupesa Yesu na maboko ya yandi.
19 Dyaka, ntangu Pilate vandaka na kisika ya kusambisa, kento ya yandi filisaka muntu na kukwiza zonza na yandi: “Kukota ve na mambu ya muntu ya lunungu* yayi, samu bubu yayi na kati ya ndosi, mu me tala mpasi mingi samu na yandi.”
20 Kasi bamfumu ya banganga-nzambi mpe bakuluntu ndimisaka bimvuka ya bantu na kulomba ti ba basisa Barabase, kasi ba kufwa Yesu.
21 Na yawu, mfumu Pilate yufulaka bawu: “Nani na kati ya bawu zole beno zola mu basisa?” Ba vutulaka: “Barabase.”
22 Pilate yufulaka bawu: “Na yawu, yinki mu me fwana kusala na Yesu, yina ba ke bokilaka Kristo?” Bawu nyonso zonzaka: “Tula yandi na yinti!”*
23 Pilate zonzaka: “Samu na yinki? Wapi mambu ya yimbi yandi me sala?” Kasi ba vanda zonza dyaka na ndinga ya kulutila ngolo: “Tula yandi na yinti.”
24 Ntangu Pilate talaka ti yandi lendaka kusala ata kima, mpe ti muvusu zola banda, yandi bakaka maza, sukulaka maboko na mantwala ya bantu mpe zonzaka: “Menga ya muntu yayi ke ve na yintu ya munu. Ya ke mambu ya beno.”
25 Na yina, bantu nyonso vutulaka: “Bika ti menga ya yandi vanda na zulu ya yintu ya beto mpe ya bana ya beto.”
26 Na yawu, yandi basisaka Barabase, kasi yandi pesaka Yesu samu ba bula yandi bashikoti mpe ba koma yandi na yinti.
27 Basoda ya mfumu Pilate nataka Yesu na kati ya yinzo ya Pilate. Ba vukisaka basoda nyonso pene-pene na Yesu.
28 Ba katulaka yandi bilele, mpe ba lwatisaka yandi kivunga ya mbwaki ya ngolo.
29 Ba yidikaka yandi yimpu ya kimfumu na bansende, mpe ba tulaka yawu na yintu ya yandi. Ba simbisaka yandi yinti ya didyadya na diboko ya bakala, ba vanda fukama na mantwala ya yandi, mpe vanda zonza samu na kuseka yandi: “Mbote Mfumu ya Bazwife!”
30 Ba vanda lobola yandi mante, ba bakaka yinti ya didyadya, mpe bandaka kubula yandi yawu na yintu.
31 Ntangu ba manisaka kuseka yandi, ba katulaka yandi kivunga, mpe lwatisaka yandi bilele ya yandi. Na manima, ba nataka yandi samu ba koma yandi na yinti.
32 Ntangu ba vanda kwenda, ba talaka muntu mosi ya mbanza ya Sirene na nkumbu ya Simoni. Ba bakaka yandi na ngolo samu yandi nata yinti ya mpasi* ya Yesu.
33 Ntangu ba kumaka na kisika yina ba ke bokilaka Gologota, yina zola zonza Kisika ya Mukwa ya Yintu,
34 ba pesaka yandi vinu yina ba vukisaka na kima ya ndudi mingi,* samu yandi kunwa. Kasi na manima ya kumeka yawu, yandi mangaka kunwa yawu.
35 Ntangu ba komaka yandi na yinti, ba bulaka dzeke samu na kukabula bilele ya yandi,
36 mpe ba vandaka kuna samu na kukengidila yandi.
37 Ba tulaka mpe na zulu ya yinti kitini mosi ya dibaya, yina ba sonikaka mambu yina ba fundisaka yandi. Ba sonikaka: “Yayi ni Yesu, Mfumu ya Bazwife.”
38 Ba komaka mpe miyibi zole na bayinti pene-pene na yandi, mosi na diboko ya bakala ya Yesu, mpe ya nkaka na diboko ya yandi ya kento.
39 Bantu yina vanda luta vanda finga yandi, mpe ba vanda ningisa bayintu ya bawu.
40 Ba vanda zonza: “Nge yina zonzaka ti nge zola mwangisa tempelo mpe kutunga yawu na bilumbu tatu, vuukisa nzutu ya nge mosi. Kana nge ke Mwana ya Nzambi, katuka na zulu ya yinti ya mpasi.”*
41 Mutindu mosi mpe bamfumu ya banganga-nzambi, milongisi ya Musiku mpe bakuluntu bandaka kuseka yandi mpe vanda zonza:
42 “Yandi vuukisaka bantu ya nkaka, kasi yandi ke na lendaka ve kuvuukisa nzutu ya yandi mosi. Kana yandi kele Mfumu ya Izraele, bika ti yandi katuka ntangu yayi na zulu ya yinti ya mpasi,* mpe beto ke kwikila yandi.
43 Yandi tulaka kiminu ya yandi na Nzambi. Bika Nzambi vuukisa yandi, kana yandi ke na nsatu ya yandi, samu yandi zonzaka, ‘Mu ke Mwana ya Nzambi.’”
44 Ata mpe miyibi yina ba komaka na bayinti na lweka ya yandi bandaka kufinga yandi.
45 Pene-pene na ngunga ya midi,* bwala nyonso kumaka na kitombi tii pene-pene na ngunga ya tatu na manima ya midi.*
46 Pene-pene na ngunga ya tatu na manima ya midi,* Yesu zonzaka na ndinga ya ngolo: “Eli, Eli, lama sabakatani?” yina zola zonza: “Nzambi ya munu, Nzambi ya munu, samu na yinki nge me bika munu?”
47 Ntangu ba kuwaka yawu, ba ya nkaka yina vandaka ya kutelama kuna bandaka kuzonza: “Muntu yayi ke na bokilaka Eli.”
48 Na mbala mosi, mosi ya bawu kimaka mbangu, bakaka kitende,* mpe kotisaka yawu na vinu ya ngayi. Yandi tulaka yawu na yinti ya didyadya, mpe yandi pesaka yawu na Yesu samu yandi kunwa yawu.
49 Kasi ba ya nkaka zonzaka: “Beno vingila. Bika beto tala kana Eli ke kwiza vuukisa yandi.”
50 Dyaka, Yesu gangaka na ndinga ya ngolo, mpe yandi kufwaka.*
51 Na ntangu yina, lele yina ke kabulaka bisika ya santu ya tempelo pasukaka na kati-kati, kubanda na zulu tii na yisi. Ntoto ninganaka mpe matadi ya nene mwanganaka.
52 Bandyamu* fungukaka, mpe bamvumbi mingi ya basantu yina kufwaka basikaka,
53 mpe bantu mingi talaka bawu. (Na manima ya kuvumbuka ya Yesu na lufwa, bantu yina katukaka na bandyamu kotaka na mbanza ya santu.)
54 Ntangu mfumu ya basoda mpe bantu yina vandaka na yandi samu na kukengedila Yesu talaka kuningana ya ntoto mpe mambu yina salamaka, ba kumaka na boma mingi, mpe zonzaka: “Ya tsyeleka, yandi vandaka Mwana ya Nzambi.”
55 Bakento mingi vandaka ya kutelama na ntama mpe vanda tala. Ya vandaka bakento yina katukaka na Galile mpe vanda tambulaka na Yesu samu na kusadisa yandi.
56 Na kati ya bawu vandaka na Maria ya Magdala, Maria mama ya Zaki na Yoze, mpe mama ya bana ya Zebede.
57 Ntangu nkokila vanda kuma, muntu mosi ya mvwama ya bwala ya Arimate, kwizaka. Nkumbu ya yandi vandaka Yozefi. Yandi kumaka mpe mosi ya bilandi ya Yesu.
58 Muntu yango kwendaka tala Pilate mpe lombaka yandi mvumbi ya Yesu. Na yawu Pilate zonzaka ba pesa yandi yawu.
59 Yozefi bakaka mvumbi ya Yesu mpe fukaka yawu na lele ya lino ya bunkete mpe ya kitoko.
60 Yandi tulaka yawu na kati ya ndyamu* ya yandi ya malu-malu, yina yandi timunaka na kati ya ditadi ya nene. Mpe na manima ya kukanga mwelo ya ndyamu* na ditadi ya nene, yandi kwendaka.
61 Kasi Maria ya Magdala na Maria ya nkaka bikanaka kuna ya kuvanda na mantwala ya ndyamu.
62 Kilumbu yina landaka, yina vandaka kilumbu na manima ya Kilumbu ya Kubongama, bamfumu ya banganga-nzambi mpe Bafarize vukanaka na mantwala ya Pilate.
63 Ba zonzaka: “Mfumu, beto me bambuka moyo ti ntangu muntu ya luvunu yayi vandaka moyo yandi zonzaka, ‘Na manima ya bilumbu tatu mu ke vumbuka.’
64 Ni na yawu, zonza ti ba kengidila ndyamu tii bilumbu tatu ke luta, samu bilandi ya yandi kwiza yiba ve mvumbi ya yandi mpe zonza na bantu: ‘Yandi me vumbuka na lufwa!’ Kana ya salama, luvunu yayi ke lutila yimbi na luvunu ya ntete.”
65 Pilate zonzaka na bawu: “Beno lenda baka basoda mpe beno kwenda kengidila yawu mutindu beno zola.”
66 Na yawu ba kwendaka, ba kangaka mbote ditadi yina vandaka na mwelo ya ndyamu, mpe ba tulaka basoda.
Banote
^ Tala Yina ba me bwela A5.
^ To: “Kudedama.”
^ To: “Kufwa yandi na zulu ya yinti!”
^ Tala Yina ya zola zonza.
^ Maza ya ndudi.
^ Tala Yina ya zola zonza.
^ Tala Yina ya zola zonza.
^ Na Greke: “Na ngunga ya 6.”
^ Na Greke: “Na ngunga ya 9.”
^ Na Greke: “Pene-pene na ngunga ya 9.”
^ Na Greke: “Éponge.”
^ Na Greke: “Yandi vutulaka mpeve ya yandi.”
^ To: “Bandyamu ya kubambuka.”
^ To: “Ndyamu ya kubambuka.”
^ To: “Ndyamu ya kubambuka.”
