Nsangu ya Mbote ya Matayi 28:1-20
28 Na manima ya saba, ntangu bwisi vanda kutsya, na kilumbu ya ntete ya lumingu, Maria ya Magdala na Maria kwizaka tala ndyamu.
2 Na mbala mosi, kuningana ya ntoto ya ngolo salamaka samu mbazi ya Yehova* katukaka na zulu. Yandi fungulaka ditadi yina kangaka ndyamu mpe vandaka na zulu ya yawu.
3 Yandi vandaka ngenga mutindu nsemo ya kidumu, mpe bilele ya yandi vandaka mpembe ya kulutila.
4 Bakengi kumaka na boma ya yandi. Na yawu ba vanda tekita mpe ba kumaka mutindu bantu ya kufwa.
5 Kasi mbazi zonzaka na bakento: “Beno vanda ve na boma, samu mu zaba ti beno ke na sosaka Yesu yina ba kufwaka na zulu ya yinti.
6 Yandi ke ve awa, samu yandi me vumbuka na lufwa, kaka faso yandi zonzaka. Beno kwiza tala kisika yina yandi vandaka ya kulala.
7 Beno kwenda mbangu mpe beno zonza na bilandi ya yandi ti yandi me vumbuka na lufwa. Yandi me tekila na Galile. Beno ke tala yandi kuna. Mu me zonzila beno mambu nyonso.”
8 Na mbangu nyonso, ba bikaka kisika yina vandaka ndyamu. Na boma mpe nsayi mingi, ba kimaka samu na kupesa nsangu na bilandi ya yandi.
9 Yesu bwabanaka bawu mpe zonzaka: “Mbote!” Ba kwizaka pene-pene ya yandi, simbaka yandi makulu mpe fukamaka* na mantwala ya yandi.
10 Na yawu, Yesu zonzaka na bawu: “Beno vanda ve na boma. Beno kwenda pesa nsangu yayi na bampangi ya munu samu ba kwenda na Galile mpe kuna ba ke tala munu.”
11 Ntangu bakento vanda kwenda, ndambu ya bakengi kotaka na mbanza mpe zabisaka na bamfumu ya banganga-nzambi mambu nyonso yina salamaka.
12 Na manima ya kuvukana na bakuluntu, mpe kusolola kintwadi, ba pesaka bambongo mingi ya bisengo na basoda.
13 Ba zonzaka na bawu: “Beno zonza na bantu, ‘Bilandi ya yandi kwizaka na mpimpa, mpe ba yibaka mvumbi ya yandi ntangu beto vanda lala.’
14 Mpe kana ya kuma na makutu ya mfumu Pilate, beto mosi ke zonzila yandi* yawu. Beno ke vanda ve na nsatu ya kuvanda na boma.”
15 Na yawu, basoda bakaka bambongo ya bisengo mpe salaka mutindu ba zonzaka na bawu. Disolo yango mwanganaka na kati ya Bazwife tii bubu yayi.
16 Bilandi 11 kwendaka na Galile, na mongo, kisika yina Yesu zonzaka ti ba zola kutana.
17 Ntangu ba talaka yandi ba fukamaka,* kasi ba ya nkaka vanda sala mwa bantembe.
18 Yesu pusanaka pene-pene ya bawu mpe zonzaka na bawu: “Nzambi me pesa munu lutumu nyonso, na zulu mpe na ntoto.
19 Na yawu, beno kwenda mpe beno kumisa bantu ya makanda nyonso bilandi. Beno botika bawu na nkumbu ya Tata, ya Mwana, mpe ya mpeve ya santu.
20 Beno longa bawu na kusadila mambu nyonso yina mu tumisaka beno. Mpe beno tala, mu ke vanda na beno bilumbu nyonso tii na nsuka ya yinza.”*
Banote
^ Tala Yina ba me bwela A5.
^ To: “Lakisaka buzitu.”
^ Na Greke: “Ke ndimisa yandi.”
^ To: “Lakisaka buzitu.”
^ To: “Mambu ya ntangu mosi.” Tala Yina ya zola zonza.
