Nsangu ya Mbote ya Matayi 3:1-17
3 Na ntangu yina, Yoane Mubotiki kwizaka samuna na ntoto ya kuyuma ya Zude.
2 Yandi vanda zonza: “Beno balula bantima samu Kimfumu ya mazulu me kuma pene-pene.”
3 Ya tsyeleka, yayi ni muntu yina mbikudi Izaya zonzilaka mutindu yayi: “Muntu mosi ke na zonzaka na ndinga ya ngolo na ntoto ya kuyuma, ‘Beno yidika nzila ya Yehova.* Beno sungika banzila ya yandi.’”
4 Yoane vanda lwataka kinkuti yina ba yidikaka na bansuki ya mpusu ya kibulu yina ba ke bokilaka shamo. Na luketo, yandi vanda kangaka singa yina ba yidikaka na mpusu ya kibulu. Madya ya yandi vandaka makonko mpe mafuta ya nyosi* ya brusu.
5 Bantu ya Yeruzalemi, ya kizunga nyonso ya Zude, mpe ya babwala nyonso yina vandaka pene-pene na maza ya Yordani, vanda kwendaka na sika ya yandi.
6 Yandi vanda botikaka* bawu na Mwila ya Yordani, mpe ba vanda fungulaka pwelele masumu ya bawu.
7 Ntangu yandi talaka Bafarize na Basaduse mingi kukwiza kisika yina yandi vanda botika bantu, yandi zonzaka na bawu: “Beno bana ya bampidi,* nani me zonza na beno ti beno lenda kima nkele ya Nzambi yina ke na kwizaka?
8 Na yawu, beno sala bamambu yina ke lakisa ti beno me balula ntima.
9 Beno kanisa ve na kuzonza na kati ya bantima, ‘Tata ya beto ni Abrahami.’ Ya tsyeleka, mu ke na zonzaka na beno ti, Nzambi lenda basisila Abrahami bana na matadi yayi.
10 Ba me tula soka yimeni na myanzi ya bayinti. Na yawu, bayinti nyonso yina ke butaka ve bambuma ya mbote, ba ke zenga yawu mpe ba ke losa yawu na tiya.
11 Munu, mu ke na botikaka beno na maza samu beno me balula bantima. Kasi muntu yina ke na kwizaka na manima ya munu, me lutila munu na ngolo, mpe munu ke ve ya kulunga samu na kukatula yandi mapapa. Yandi, yandi ke botika beno na mpeve ya santu, mpe na tiya.
12 Yandi me simba na diboko kima yina yandi ke sadila samu na kupupula bambuma. Yandi ke katula mvindu nyonso na kisika yina yandi ke tutaka bambuma samu na kukatula yawu bampusu. Yandi ke vukisa bambuma na yinzo yina yandi ke bumbaka yawu, kasi yandi ke yoka bampusu na tiya yina ba lenda kufwa ve.”
13 Na manima, Yesu katukaka na Galile mpe kwendaka na Yordani na sika ya Yoane, samu Yoane botika yandi.
14 Kasi Yoane sosaka kukanga yandi nzila. Yandi zonzaka na Yesu: “Ni munu muntu ke na nsatu nge botika munu. Kasi wa’ faso ni nge ke na sosaka mu pesa nge mbotokolo?”
15 Yesu vutulaka: “Ndima ti mbala yayi ya salama faso yina, samu ti ni mutindu yina beto me fwana kulungisa mambu nyonso ya kulunga.” Na yawu, Yoane bikaka kukanga yandi nzila.
16 Na manima ya kuzwa mbotokolo, na mbala mosi Yesu basikaka na maza. Zulu fungukaka, yandi talaka mpeve ya Nzambi kukulumuka mutindu dibembe, mpe ya kwizaka na zulu ya yandi.
17 Dyaka, ndinga mosi wakanaka na mazulu mpe zonzaka: “Yandi yayi ni Mwana ya munu yina mu ke zolaka mingi. Mu me ndima yandi.”
