Nsangu ya Mbote ya Matayi 5:1-48
-
DISOLO NA ZULU YA MONGO (1-48)
-
Yesu me banda kulonga na zulu ya mongo (1, 2)
-
Bamambu 9 yina ke pesaka kilengi (3-12)
-
Mungwa mpe nsemo (13-16)
-
Yesu kwizaka samu na kulungisa Musiku (17-20)
-
Malongi na yina me tadila nkele (21-26), kinsuza (27-30), kufwa makwela (31, 32), kudya ndefi (33-37), kuvutula yimbi (38-42), luzolo samu na bambeni (43-48)
-
5 Ntangu Yesu talaka bantu mingi, yandi kwendaka na zulu ya mongo, yandi vandaka, mpe bilandi ya yandi kwizaka na sika ya yandi.
2 Yandi bandaka kulonga bawu, mpe zonzaka:
3 “Kilengi na bantu yina me zaba ti ba ke na nsatu ya mambu ya kimpeve,* samu ti Kimfumu ya mazulu ke ya bawu.
4 “Kilengi na bantu yina ke na mawa, samu ba ke bondila* bawu.
5 “Kilengi na ba yina ke ya kulembama,* samu ba ke byadila ntoto.
6 “Kilengi na ba yina ke na nsatu* ya lunungu,* samu ba ke yukuta.*
7 “Kilengi na ba yina ke talaka bampangi kyadi, samu ba ke tala bawu kyadi.
8 “Kilengi na ba yina ke na ntima ya kuvedila, samu ba ke tala Nzambi.
9 “Kilengi na bantu yina ke salaka ti kizunu vanda,* samu ba ke bokila bawu bana ya Nzambi.
10 “Kilengi na ba yina ba ke talisaka mpasi samu ti ba ke salaka mambu ya lunungu,* samu Kimfumu ya mazulu ke ya bawu.
11 “Kilengi na beno ntangu ba ke fingaka beno, ke talisaka beno mpasi, mpe ke vuninaka beno bamambu ya yimbi ya mutindu na mutindu samu na munu.
12 Beno yangalala mpe beno vanda na nsayi mingi, samu ti difuta ya beno ke nene na mazulu. Ya tsyeleka, ni mutindu yina ba talisaka mpasi bambikudi yina zingaka tekila beno butuka.
13 “Beno ke mungwa ya yinza. Kana mungwa ke dyaka ve na ngolo ya yawu, ba lenda vutula kwandi dyaka ngolo ya yawu? Ya ke dyaka ve na mfunu. Ba ke losa kaka yawu na ngaanda, samu bantu dyata yawu.
14 “Beno ke nsemo* ya yinza. Mbanza yina ke na zulu ya mongo lenda vanda ve ya kubumbama.
15 Ba ke pelisaka ve mwinda samu na kutula yawu na yisi ya kitunga,* kasi ba ke tulaka yawu na zulu ya mesa, mpe ya ke ngenga na zulu ya bantu nyonso yina ke na kati ya yinzo.
16 Mutindu mosi mpe, bika ti nsemo ya beno ngenga na mantwala ya bantu, samu ba tala bisalu ya beno ya mbote mpe ba pesa nkembo na Tata ya beno yina ke na mazulu.
17 “Beno kanisa ve ti mu kwizaka samu na kufwa Musiku to Bambikudi. Mu kwizaka ve samu na kufwa yawu, kasi samu na kulungisa yawu.
18 Ya tsyeleka, mu ke na zabisaka beno ti zulu na ntoto lenda luta, kasi ata kisoni mosi ya kulutila fioti, to kitini mosi ya kisoni ya Musiku ke zimbana tekila mambu nyonso salama.
19 Ni na yawu, konso muntu yina ke tumamaka ve ata na mosi ya misiku yango ya kulutila fioti, mpe ke longaka bantu ya nkaka na kusala mutindu yandi, ba ke bokila yandi muntu ya kulutila fioti na Kimfumu ya mazulu. Kasi konso muntu yina ke zitisaka yawu mpe ke longaka yawu, ba ke bokila yandi muntu ya nene na Kimfumu ya mazulu,
20 samu mu ke na zonzaka na beno ti, kana lunungu* ya beno me lutila ve ya milongisi ya Musiku na ya Bafarize, beno ke kota ata fioti ve na Kimfumu ya mazulu.
21 “Beno kuwaka ti ba zonzaka na bankooko ya beno, ‘Nge fwana kufwa ve muntu. Muntu yina ke kufwa muntu, ba ke sambisa yandi na mantwala ya bazuzi.’
22 Kasi mu ke na zabisaka beno ti, konso muntu yina ke bumbilaka mpangi ya yandi nkele, ba ke sambisa yandi na mantwala ya bazuzi. Dyaka, konso muntu yina ke safula mpangi ya yandi na kifingu ya ngolo, ba ke sambisa yandi na mantwala ya bazuzi ya nene. Kasi konso muntu yina ke zonza na mpangi ya yandi: ‘Nge ke kizoba ya mpamba,’ ba me lunga kulosa yandi na tiya ya Gehena.*
23 “Na yawu, kana nge me nata dikabu ya nge na kisika ya kuyoka minkayulu mpe nge me bambuka moyo ti mpangi ya nge ke na mambu na nge,
24 bika dikabu ya nge kuna na mantwala ya kisika yina ba ke yokaka minkayulu, mpe kwenda. Sala ntete kizunu na mpangi ya nge, mpe na manima, ntangu nge ke vutuka, pesa dikabu ya nge.
25 “Kana nge ke na kwendaka na sika ya bazuzi kintwadi na muntu yina me funda nge, sala mbangu na kuyidika mambu na yandi ntangu beno ke ntete na nzila, samu yandi pesa ve nge na maboko ya zuzi, mpe zuzi pesa nge na mukengi, mpe ba losa nge na boloko.
26 Ya tsyeleka, mu ke na zonzaka na nge ti, nge ke lenda ve kubasika na boloko tii nge ke futa pata ya nsuka* ya mfuka ya nge.
27 “Beno kuwaka ti ba zonzaka: ‘Nge fwana kusala ve kinsuza.’*
28 Kasi mu ke na zonzaka na beno ti, konso muntu yina ke na bikaka ve na kutala kento tii na kukuma na nsatu ya yandi, yandi me sala yimeni kinsuza na kento yango na kati ya ntima ya yandi.
29 Kana disu ya nge ya bakala ke salaka ti nge bula dibaku, timuna yawu, mpe losa yawu ntama na nge, samu ti ya me lutila mbote na nge na kuvanda ve na kinama mosi ya nzutu na kisika ba losa nzutu ya nge nyonso na Gehena.*
30 Dyaka, kana diboko ya nge ya bakala ke salaka ti nge bula dibaku, zenga yawu mpe losa yawu ntama na nge. Samu ti ya me lutila mbote na nge na kuvanda na kinama mosi ya nzutu na kisika ba losa nzutu ya nge nyonso na Gehena.*
31 “Dyaka, ba zonzaka: ‘Bakala yina me kufwa makwela na kento ya yandi, me fwana kupesa yandi mukanda yina ke lakisa ti makwela me kufwa.’
32 Kasi mu ke na zonzaka na beno ti, konso bakala yina me kufwa makwela na kento ya yandi samu na mambu yina ke ve kinsuza,* yandi me tumisa kento yina na kusala kinsuza.* Mpe muntu yina ke kwelana na kento yina bakala me kufwa makwela, me sala kinsuza.*
33 “Beno kuwaka dyaka ti, ba zonzaka na bankooko ya beno: ‘Nge me fwana ve kudya ndefi mpe kulungisa ve yawu, kasi nge me fwana kulungisa bansilulu yina nge pesaka na Yehova.’*
34 Kasi mu ke na zonzaka na beno: ‘Beno zenga ata fioti ve ndefi, ya vanda na nkumbu ya mazulu samu ya ke kiti ya kimfumu ya Nzambi,
35 to na nkumbu ya ntoto samu ya ke kidyatulu ya Nzambi, to na nkumbu ya Yeruzalemi, samu ya ke mbanza ya Mfumu ya nene.
36 Nge fwana kudya ve ndefi na nkumbu ya yintu ya nge, samu nge lenda kitula ve nsuki mosi mpembe to ndombe.
37 Bika ti mambu yina nge me zonza ‘Ee’ vanda kaka ee, mpe mambu yina nge me zonza ‘Ve,’ vanda kaka ve, samu ti mambu nyonso ya nkaka yina bantu ke bwelaka na zulu ya yawu ke katukaka na muntu ya yimbi.
38 “Beno kuwaka mpe ti ba zonzaka: ‘Disu samu na disu mpe dinu samu na dinu.’
39 Kasi mu ke na zonzaka na beno: Beno telemina ve muntu ya yimbi. Kasi, kana muntu me bula nge mbata na ditama mosi, pesa yandi mpe ditama ya nkaka.
40 Mpe kana muntu ke na sosaka kunata nge na mantwala ya bazuzi mpe kubaka kinkuti ya nge ya kati, bika yandi baka mpe kinkuti ya nge ya zulu.
41 Dyaka, kana muntu yina ke na lutumu me lomba na nge na ngolo nyonso na kusala kilometre* mosi, sala bakilometre zole na yandi.
42 Kabula na muntu yina ke na lombaka nge kima, mpe kupesa ve mukongo na muntu yina zola nge defisa* yandi.
43 “Beno kuwaka ti ba zonzaka: ‘Nge fwana kuzola mpangi ya nge mpe kuyiina mbeni ya nge.’
44 Kasi mu ke na zonzaka na beno: Beno bika ve kuzola bambeni ya beno mpe kusambila samu na ba yina ke talisaka beno mpasi.
45 Na yawu, beno ke lakisa ti beno ke bana ya Tata ya beno yina ke na mazulu, samu yandi ke basisaka ntangu na zulu ya bantu ya yimbi mpe ya mbote, mpe yandi ke nokisaka mvula na zulu ya bantu ya lunungu* mpe na ba yina ke ve bantu ya lunungu.*
46 Kana beno ke zolaka kaka bantu yina ke zolaka beno, wapi difuta beno ke kuzwa na sika ya Nzambi? Ya tsyeleka, bantu yina ke lokotaka mpaku ke salaka mpe mutindu yina.
47 Mpe kana beno ke pesaka mbote kaka na bampangi ya beno, wapi mambu ya ngitukulu beno me sala? Ya tsyeleka, bantu ya makanda mpe ke salaka mutindu yina.
48 Na yawu, beno me fwana kuvanda ya kulunga mutindu Tata ya beno ya mazulu kele ya kulunga.
Banote
^ To: “Bantu yina ke lombaka mpeve.”
^ To: “Bomba, kindisa.”
^ To: “Kukuluka.”
^ Na Greke: “Nsatu ya kudya mpe nsatu ya kunwa.”
^ To: “Ludedomo.”
^ To: “Ba ke fuluka na yina ba ke na yawu nsatu.”
^ To: “Bantu ya kizunu.”
^ To: “Kudedama.”
^ To: “Lumière, nsamina.”
^ To: “Kitunga samu na kuteza bima.”
^ To: “Ludedomo.”
^ Kisika mosi na ngaanda ya Yeruzalemi yina ba vanda yokaka bima yina bantu vanda losaka. Tala Yina ya zola zonza.
^ Na Greke: “Kadrani ya nsuka.” Tala Yina ba me bwela B14.
^ Na Greke, moi·kheiʹa. Tala Yina ya zola zonza.
^ Tala Yina ya zola zonza.
^ Tala Yina ya zola zonza.
^ Na Greke, por·neiʹa. Tala Yina ya zola zonza.
^ Na Greke, moi·khei′a. Tala Yina ya zola zonza.
^ Na Greke, moi·khei′a. Tala Yina ya zola zonza.
^ Tala Yina ba me bwela A5.
^ Tala Yina ba me bwela B14.
^ Ya zola zonza kudefisa ata kubwela kima na zulu.
^ To: “Kudedama.”
^ To: “Kudedama.”
