Nsangu ya Mbote ya Matayi 8:1-34
8 Ntangu yandi katukaka na mongo, bantu mingi landaka yandi.
2 Muntu mosi yina vandaka na maladi ya bwazi* kwizaka, fukamaka* na mantwala ya yandi, mpe zonzaka: “Mfumu kana nge zola, nge lenda vedisa* munu.”
3 Na yawu, Yesu tambaka diboko, simbaka yandi mpe zonzaka: “Mu zola! Kuma ya kuvedila.” Na mbala mosi, yandi belukaka na maladi ya yandi ya bwazi.
4 Na manima Yesu zonzaka na yandi: “Tala, kuzonzila yawu na ata muntu, kasi kwenda talana na nganga-nzambi, mpe pesa dikabu mutindu Musiku ya Moyize lombaka yawu, samu ba zaba ti nge me beluka.”
5 Ntangu Yesu kotaka na Kapenawume, mfumu mosi ya basoda kwizaka na sika ya yandi mpe bandaka kubondila yandi:
6 “Mfumu, kisadi ya munu ke ya kulala na yinzo, yandi ke na lendaka ve kuningana mpe yandi ke na talaka mpasi mingi.”
7 Yesu zonzaka na yandi: “Mu ke kwenda na yinzo ya nge, mpe mu ke belusa yandi.”
8 Mfumu ya basoda vutulaka: “Mfumu, mu ke ve ya kulunga samu nge kota na yinzo ya munu. Zonza kaka mambu mpe kisadi ya munu ke beluka,
9 samu munu mpe, mu ke na bamfumu na zulu ya munu, mpe mu ke na basoda yina ke na yisi ya lutumu ya munu. Mu ke zonzaka na mosi ‘Kwenda,’ mpe yandi ke kwendaka, na ya nkaka ‘Kwiza,’ mpe yandi ke kwizaka, mpe na kisadi ya munu ‘Sala yayi,’ mpe yandi ke salaka yawu.”
10 Ntangu Yesu kuwaka yawu, yandi yitukaka mpe zonzaka na ba yina vanda landa yandi: “Ya tsyeleka, mu ke na zonzaka na beno ti, na Izraele nyonso mu me tala ata muntu na kiminu ya nene ya faso yayi.
11 Kasi mu ke na zonzaka na beno ti, bantu mingi ke katuka na esti mpe na westi, ke kwiza mpe ke vanda na mesa kintwadi na Abrahami, Izaki mpe Yakobi na Kimfumu ya mazulu.
12 Kasi ba ke losa bana ya Kimfumu na ngaanda, na kati ya mpimpa. Ni kuna ba ke dila mpe ba ke kwetisa meno.”
13 Na yawu, Yesu zonzaka na mfumu ya basoda: “Kwenda. Kaka mutindu nge me lakisa kiminu, ni faso yina mpe ya ke salama samu na nge.” Mpe na ntangu yina, kisadi yango belukaka.
14 Ntangu Yesu kumaka na yinzo ya Piere, yandi talaka mama ya kento ya Piere ya kulala, samu yandi vandaka na fievre.
15 Yesu simbaka yandi na diboko, mpe fievre ya yandi manisaka. Yandi telamaka mpe bandaka kuyidika madya samu na bawu.*
16 Ntangu nkokila kumaka, ba natinaka yandi bantu mingi yina vandaka na bampeve ya yimbi. Yandi zonzaka kaka mambu mosi samu na kubingisa bampeve yango, mpe yandi belusaka bantu nyonso yina vandaka na mpasi,
17 samu na kulungisa mambu yina Nzambi zonzaka na nzila ya mbikudi Izaya: “Yandi bakaka yandi mosi bampasi ya beto, mpe yandi lwataka bimbevo ya beto.”
18 Ntangu Yesu talaka ti bantu fulukaka pene-pene na yandi, yandi lombaka na bilandi ya yandi na kukwenda na yandi na simu ya nkaka ya maza.
19 Mulongisi mosi ya Musiku kwizaka na sika ya yandi mpe zonzaka: “Mulongi, mu ke landa nge kisika nyonso nge ke kwenda.”
20 Kasi Yesu zonzaka na yandi: “Mibaku* ke na mabulu yina ba ke bumbanaka, mpe bandeke ke na manzanza ya bawu, kasi Mwana ya muntu ke ve na kisika ya kupemisa yintu.”
21 Na manima, muntu mosi na kati ya bilandi zonzaka: “Mfumu, pesa munu nzila ya kwenda kunda ntete tata ya munu.”
22 Yesu zonzaka na yandi: “Landa munu,* mpe bika bantu ya kufwa kunda bantu ya bawu ya kufwa.”
23 Mpe ntangu yandi kotaka na bwatu, bilandi ya yandi landaka yandi.
24 Na mbala mosi, mupepe mosi ya ngolo basikaka na nzadi ya mungwa,* mpe maza vanda fuluka na bwatu, kasi Yesu vanda lala.
25 Bilandi kwendaka vumbula Yesu mpe zonzaka na yandi: “Mfumu, vuukisa beto, beto ke kufwa!”
26 Kasi yandi zonzaka na bawu: “Samu na yinki beno ke ya kufuluka na boma,* beno bantu ya kiminu ya fioti?” Na yina, yandi telamaka, ngalaka mupepe na nzadi ya mungwa, mpe bima nyonso kumaka swi.
27 Na yawu, bilandi pamukaka mpe zonzaka: “Muntu yayi ke nani, samu ti ata mupepe mpe nzadi ya mungwa ke tumamaka na yandi?”
28 Ntangu yandi kumaka na simu ya nkaka, na bwala ya bantu ya Gadara, babakala zole, yina vandaka na bampeve ya yimbi basikaka na kati-kati ya bandyamu,* mpe kutanaka na Yesu. Ba vandaka na myangu ya kulutila. Na yawu, ata muntu vandaka na ngolo ya kuluta na nzila yina.
29 Ba bandaka kuzonza na ngolo nyonso: “Mwana ya Nzambi, wapi mambu beto ke na yawu na nge? Nge me kwiza awa samu na kukwamisa beto tekila ntangu yina Nzambi soolaka?”
30 Mwa ntama na bawu, ya vandaka na bangulu mingi yina vanda kudya.
31 Na yawu, bampeve ya yimbi bandaka kubondila yandi: “Kana nge ke bingisa beto, filisa beto na kati ya bangulu.”
32 Mpe yandi zonzaka na bawu: “Beno kwenda!” Ba basikaka mpe ba kwendaka kota na kati ya bangulu. Bangulu nyonso katukaka na zulu ya mongo, kubwaka na nzadi ya mungwa na mbangu nyonso, mpe kufwaka na kati ya maza.
33 Bantu yina vanda kengidila bangulu kimaka. Ntangu ba kotaka na mbanza, ba zabisaka bantu mambu nyonso yina salamaka, mpe disolo ya bantu yina vandaka na bampeve ya yimbi.
34 Na yawu, bantu nyonso ya mbanza kwendaka bwabana Yesu. Ntangu ba talaka yandi, ba bondilaka yandi na kukatuka na bwala ya bawu.
Banote
^ To: “Lèpre.” Ya kele maladi ya ngolo yina ke dyaka mpusu, mpe bisika ya nkaka ya nzutu ya muntu.
^ To: “Lakisaka buzitu.”
^ To: “Belusa.”
^ Na Greke: “Kusadila yandi.”
^ To: “Ba renards.”
^ To: “Kubika ve kulanda munu.”
^ To: “Mubu.”
^ To: “Na ntima ya kupasuka.”
^ To: “Bandyamu ya kubambuka.”
