Nsangu ya Mbote ya Matayi 9:1-38
-
Yesu me belusa kikata (1-8)
-
Yesu me bokila Matayi (9-13)
-
Kyuvu na yina me tadila kubaka mukanu ya kulutisa bantangu ata kudya kima (14-17)
-
Mwana ya Zayiruse ya kento, kento mosi me simba kinkuti ya Yesu (18-26)
-
Yesu me belusa bantu ya meso ya kufwa mpe dibaba (27-34)
-
Kisalu ya kuyonzika bambuma ke nene kasi bisadi ke ndambu (35-38)
9 Yesu kotaka na bwatu, yandi sabukaka nzadi ya mungwa,* mpe yandi kwendaka na bwala ya yandi.
2 Ba natinaka yandi bakala mosi yina vandaka kikata, ya kulala na zulu ya kipoyi. Ntangu Yesu talaka kiminu ya bawu, yandi zonzaka na kikata: “Vanda na kibakala mwana ya munu. Nge me kuzwa mulemvo ya masumu ya nge.”
3 Na yawu, milongisi ya nkaka ya Musiku bandaka kukanisa na kati ya bantima: “Muntu yayi ke na kuvwezaka Nzambi.”
4 Samu Yesu zabaka makanisi ya bawu, yandi zonzaka: “Samu na yinki beno ke na kanisaka mambu ya yimbi na bantima ya beno?
5 Yinki me lutila mpasi na kuzonza, ‘Nge me kuzwa mulemvo ya masumu ya nge,’ to kuzonza, ‘Telama mpe tambula’?
6 Beno bika mu lakisa beno ti Mwana ya muntu ke na lutumu ya kulemvokila masumu na ntoto.” Na yawu, yandi zonzaka na kikata: “Telama, baka kipoyi ya nge mpe kwenda na yinzo ya nge.”
7 Bakala yango telamaka mpe kwendaka na yinzo ya yandi.
8 Ntangu bantu yina vandaka kuna talaka yawu, ba kumaka na boma ya kulutila mpe pesaka nkembo na Nzambi, yina pesaka lutumu ya mutindu yayi na bantu.
9 Na manima, ntangu Yesu katukaka na kisika yina, yandi talaka bakala mosi na nkumbu ya Matayi ya kuvanda na kisika yina bantu yina ke lokotaka mpaku ke salaka, mpe yandi zonzaka na yandi: “Landa munu.” Na yawu, Matayi telamaka mpe landaka yandi.
10 Na manima, ntangu Yesu vanda kudya* na yinzo ya Matayi, bantu mingi yina ke lokotaka mpaku mpe basumuki, kwizaka mpe bandaka kudya kintwadi na Yesu na bilandi ya yandi.
11 Kasi ntangu Bafarize talaka mambu yayi, ba zonzaka na bilandi ya yandi: “Samu na yinki mulongi ya beno ke na kudyaka na bantu yina ke lokotaka mpaku mpe na basumuki?”
12 Ntangu Yesu kuwaka bawu, yandi zonzaka: “Bantu yina ke na mavimpi ya mbote ke ve na nsatu ya munganga, kasi ni bantu yina ke na beelaka ke na nsatu ya yandi.
13 Na yawu, beno kwenda longoka yinki zola zonza, ‘Mu ke zolaka ntima ya kyadi, kasi ve munkayulu.’ Ya tsyeleka, mu kwizaka ve samu na kubokila bantu ya lunungu,* kasi basumuki.”
14 Na manima, bilandi ya Yoane kwizaka yufula na Yesu: “Samu na yinki beto na Bafarize ke vandaka na kifu ya kulutisaka bantangu ata kudya kima, kasi bilandi ya nge ke salaka ve yawu?”
15 Na yawu, Yesu zonzaka na bawu: “Bandiku ya bakala yina ke na kwelanaka ke ve na nsatu ya kuvanda na kyadi, samu yandi ke na bawu, faso yina ve? Kasi bilumbu ke kwiza, yina ba ke katula bakala yina me kwela na kati ya bawu. Kuna, ba ke baka mukanu ya kulutisa bantangu ata kudya kima.
16 Ata muntu ke tungaka kitende ya lele ya malu-malu na zulu ya lele ya ntama. Kana yandi sala yawu, kitende ya malu-malu ke benda lele ya ntama, mpe ya ke pasuka dyaka mingi.
17 Mpe ba ke tulaka ve vinu ya malu-malu na basaki ya kununa yina ba ke yidikaka na mpusu ya kibulu. Kana ba sala yawu, basaki ke pasuka, vinu ke mwangana, mpe yimeni samu na basaki yango. Kasi ba ke tulaka vinu ya malu-malu na basaki ya malu-malu. Mpila yina, vinu na basaki ke beba ve.”
18 Ntangu Yesu vanda zonzila bawu mambu yayi, mfumu mosi kwizaka pene-pene ya yandi, yandi fukamaka* na mantwala ya Yesu mpe zonzaka: “Ntangu yayi, ya lenda vanda ti mwana ya munu ya kento me kufwa. Kasi kwiza tula yandi maboko mpe yandi ke vutuka na luzingu.”
19 Yesu telamaka, mpe kintwadi na bilandi ya yandi, ba landaka mfumu yango.
20 Kasi kento mosi yina vanda beela kimbevo ya kubasika menga katuka bamvula 12 pusanaka na manima ya Yesu, mpe simbaka nsongi ya kinkuti ya Yesu,
21 samu yandi vanda zonza na yisi ya ntima: “Kana mu simba kaka kinkuti ya yandi, mu ke beluka.”
22 Yesu balukaka, yandi talaka kento yango mpe zonzaka: “Mwana ya munu ya kento, vanda na bukindi! Kiminu ya nge me belusa nge.” Mpe kaka na ntangu yina, kento yina belukaka.
23 Ntangu yandi kumaka na yinzo ya mfumu yango, mpe yandi talaka bantu yina vanda yimba banzimbu ya mafwa* mpe bantu mingi yina vanda sala makelele mingi,
24 Yesu zonzaka: “Beno basika, samu mwana ya kento me kufwa ve, kasi yandi ke na lalaka.” Na yawu, ba bandaka kuseka yandi na ngolo.
25 Ntangu bantu basikaka, Yesu kotaka mpe simbaka mwana ya kento na diboko, mpe mwana ya kento telamaka.
26 Ya tsyeleka, nsangu ya mambu yayi mwanganaka na babwala nyonso ya kizunga yina.
27 Ntangu Yesu katukaka kuna, babakala zole ya meso ya kufwa landaka yandi, mpe vanda zonza na ngolo nyonso: “Mwana ya Davidi, tadila beto kyadi.”
28 Ntangu Yesu kotaka na yinzo, babakala ya meso ya kufwa kwizaka na sika ya yandi mpe Yesu yufulaka bawu: “Beno ke na kiminu ti mu lenda sala yawu?” Ba vutulaka: “Beto ke na kiminu, Mfumu.”
29 Yesu simbaka meso ya bawu mpe zonzaka: “Bika ya salama mutindu kele kiminu ya beno.”
30 Mpe meso ya bawu fungukaka. Kasi, na ngolo nyonso, Yesu kebisaka bawu mpe zonzaka: “Beno keba! Ata muntu fwana kuzaba mambu yayi.”
31 Kasi ntangu ba basikaka, ba mwangisaka nsangu ya Yesu na babwala nyonso ya kizunga yina.
32 Ntangu ba vanda kwenda, bantu natinaka Yesu dibaba mosi ya bakala yina vandaka na mpeve ya yimbi.
33 Ntangu Yesu bingisaka mpeve yango, dibaba yina bandaka kuzonza. Na yawu, bantu yitukaka mpe zonzaka: “Nabunu beto tala mambu ya faso yayi na Izraele.”
34 Kasi Bafarize vanda zonza: “Ni na ngolo ya mfumu ya bampeve ya yimbi yandi ke bingisaka bampeve ya yimbi.”
35 Yesu vanda kwenda na bambanza mpe babwala nyonso. Yandi vanda longa na bayinzo ya lusambu, mpe vanda samuna nsangu ya mbote ya Kimfumu. Yandi vanda belusa bimbevo ya mutindu na mutindu, mpe binama ya kufwa ya mutindu na mutindu.
36 Ntangu Yesu talaka bantu mingi yina vandaka kuna, yandi fulukaka na kyadi samu na bawu, samu ba vanda nyokwama, mpe ba vandaka kaka bawu mosi, mutindu mameme yina ke ve na muvungi.
37 Na yawu, yandi zonzaka na bilandi ya yandi: “Ya tsyeleka, kisalu ya kuyonzika bambuma ke nene, kasi bantu samu na kusala yawu ke ndambu.
38 Ni yawu yina, beno bondila Mfumu ya kisalu ya kuyonzika bambuma na kufilisa bisadi na kisalu ya yandi ya kuyonzika bambuma.”
Banote
^ To: “Mubu.”
^ To: “Ya kuyalumuna na mesa.”
^ To: “Kudedama.”
^ To: “Lakisaka buzitu.”
^ Na Greke: “Bantu yina vandá bula tutu to flûte.”
