Na Tite 1:1-16
1 Munu Polo, kisadi ya Nzambi mpe ntumwa ya Yesu Kristo na bumosi na kiminu ya ba yina Nzambi me soola mpe na bumosi na luzabu ya matsyeleka yina ke ya kukwelana na kukangama na Nzambi
2 mpe yina ke ya kuvanda na zulu ya kivuvu ya luzingu ya ntangu nyonso yina Nzambi, muntu yina ke vunaka ve, pesaka nsilulu banda ntama.
3 Kasi na ntangu yina yandi soolaka, yandi salaka ti dyambu ya yandi zabana na nzila ya kisalu ya kusamuna yina yandi me pesa munu na bumosi na musiku ya mvuukisi ya beto, Nzambi.
4 Na Tite mwana ya munu ya tsyeleka, na bumosi na kiminu yina beto nyonso ke na yawu:
Bika ti ntima ya kulutila mbote mpe kizunu ya Nzambi Tata mpe ya Kristo Yesu mvuukisi ya beto vanda na nge.
5 Mu bikaka nge na Krete samu nge bongisa bamambu yina vanda tambula ve mbote mpe samu nge tula bakuluntu na konso mbaza mutindu mu lombaka nge:
6 Kana ya ke na bakala yina ke ve na mambu yina ba lenda funda yandi, bakala ya kento mosi, yina ke na bana yina ke bandimi mpe yina ba me fundaka ve ti ba ke nataka luzingu ya busafu to ke na yintu ngolo.
7 Mutindu kisadi ya Nzambi, mukengi me fwana kuvanda ve na mambu yina ba lenda funda yandi, muntu yina ke ve na yintu ngolo, muntu yina ke dasukaka ve kidi-kidi, muntu yina ke kolaka ve malafu, muntu yina zola ve mambu ya ngolo,* muntu yina ke ve na lukoso to yina ke sosaka kuzwa bima na nzila ya luvunu,
8 kasi muntu yina ke yambaka banzenza, muntu yina ke zolaka mambu ya mbote, muntu yina ke na makanisi ya mbote,* muntu ya lunungu, muntu ya kukwikama, muntu yina ke yalaka nzutu ya yandi mosi,
9 muntu yina ke ya kukangama ngolo na mambu ya kukwikama na yina me tadila mutindu ya yandi ya kulonga, samu yandi vanda na makoki ya kukindisa na nzila ya malongi yina ke mbote mpe kungala bantu yina ke na mangaka yawu.
10 Samu, ya ke na bantu mingi yina ke na yintu ngolo, bantu yina ke zonzaka kidi-kidi mpe bantu ya luvunu, mingi-mingi bantu yina ke ya kukangama na mambu ya kuzengisa kibakala.
11 Ya ke mfunu ba kanga bawu bayinwa, samu babakala yayi ke na tatamanaka na kutula muvusu na kati ya makanda na kulongaka bamambu yina ba me lunga ve kulonga samu na kuzwa bima na nzila ya luvunu.
12 Muntu mosi na kati ya bawu, mbikudi ya bawu mosi, me zonza: “Bantu ya Krete ke vandaka ntangu nyonso bantu ya luvunu, ba ke bibulu ya brusu yina ke na nkele, bantu yina ke kudyaka mingi mpe yina ke ve na kisalu.”
13 Kimbangi yayi ke ya tsyeleka. Ni na yawu, tatamana kungala bawu na ngolo samu ba vanda na kiminu,
14 kutula ve dikebi na masolo ya Bazwife mpe na misiku ya bantu yina ke kwendaka ntama na matsyeleka.
15 Bamambu nyonso ke bunkete samu na bantu ya bunkete. Kasi na bantu yina ke na mvindu mpe yina me kondwa kiminu, ata kima ke bunkete, samu makanisi ya bawu mpe kimuntu ya bawu ya kati kele mvindu.
16 Ba ke zonzaka pwelele na meso ya bantu nyonso ti ba zaba Nzambi, kasi ba ke mangaka yandi na bansalulu ya bawu, samu ba ke bantu yina ba ke yiinaka, bantu ya kukondwa kutumama mpe ba me lunga ata fioti ve na kisalu ya mbote ya konso mutindu.
