Na Tite 2:1-15
2 Kasi nge, tatamana na kuzonza bamambu yina ke ya kukwelana na malongi ya mbote.
2 Bika ti bantu ya kukula kulutisa ve ndilu na bifu ya bawu, ba fwana kuvanda bantu yina ba lenda zitisa, bantu yina ke na makanisi ya mbote, bantu ya ngolo na kiminu, na luzolo mpe na kukanga ntima.
3 Mutindu mosi mpe, bika ti bakento ya kukula kudyatila na mutindu yina ke lakisaka buzitu na Nzambi, ba fwana kuvanda ve na songi-songi, ba fwana kuvanda ve bangaamba ya vinu, kasi milongi ya mambu yina ke mbote,
4 samu na kulenda kupesa malongi na bantwenya ya bakento, na kuzola babakala ya bawu, na kuzola bana ya bawu,
5 na kuvanda na makanisi ya mbote, na kuvanda bunkete, na kuvanda bantu ya bisalu na yinzo, na kuvanda bantu ya mbote, na kutumamaka na babakala ya bawu samu ba zonzila ve yimbi na Mambu ya Nzambi.
6 Mutindu mosi mpe, tatamana na kukindisa bantwenya ya babakala na kuvanda na makanisi ya mbote.
7 Vanda kifwani na bisalu ya mbote na mambu nyonso, longa mambu ya bunkete na buzitu nyonso,
8 na nzonzolo ya mbote yina bantu lenda zonzila ve yimbi ya yawu, samu bambeni kufwa nsoni, samu ba vanda ve na mambu ya yimbi ya kuzonza samu na beto.
9 Bika ti bisadi kutumama na bamfumu ya bawu na mambu nyonso, ba sosa kusepelisa bawu, ba zonzila ve bawu yimbi,
10 ba laba ve bamfumu ya bawu, kasi ba vanda bantu ya mbote mpe yina ba lenda tudila ntima, samu na mutindu nyonso, ba kumisa kitoko malongi ya mvuukisi ya beto Nzambi.
11 Samu ntima ya kulutila mbote ya Nzambi me talana, ya ke sala ti bantu ya mutindu nyonso vuuka.
12 Ya ke longaka beto na kumanga kuvweza Nzambi, na kulosa bansatu ya yinza, na kuzinga na makanisi ya mbote, na kuzinga na lunungu* mpe na kuvanda ya kukangama na Nzambi na kati ya yinza* yayi,
13 ntangu beto ke na vingilaka kivuvu ya kilengi mpe kutalana ya nkembo ya Nzambi ya nene mpe ya mvuukisi ya beto Yesu Kristo.
14 Yandi pesaka nzutu ya yandi samu na beto, samu beto kuzwa kimpwanza* na mitindu nyonso ya kufwa musiku mpe kukumisa bunkete samu na yandi mosi bantu yina ke ya tsyeleka bantu ya yandi yina ke na manzangu samu na bisalu ya mbote.
15 Tatamana na kuzonzila bamambu yayi, na kukindisa, mpe na kungala na lutumu nyonso. Kubika ata muntu mosi ve kuvweza nge.
