Na Tite 3:1-15
3 Tatamana na kubambula bawu na kuvanda ya kutumama mpe na kuwaka baluyalu mpe bantu yina ke na lutumu, na kuvanda ya kukubama na konso kisalu ya mbote,
2 na kuzonzaka ve yimbi ya muntu, na kuswanaka ve, na kuvandaka ve bantu yina ke kangamaka kaka na makanisi ya bawu, na kulakisaka lembami na bantu nyonso.
3 Beto mpe beto vandaka ntete bazoba, bantu yina vanda tumamaka ve, bantu yina vanda vunamaka, beto vandaka bangaamba ya bansatu ya mitindu mingi mpe ya mikembo, beto vanda zingaka na mambu ya yimbi mpe kimbanda, beto vandaka bantu yina ba vanda yiinaka, mpe beto vanda yiinaka bampangi.
4 Kasi, ntangu ntima ya mbote ya mvuukisi ya beto Nzambi mpe luzolo ya yandi samu na bantu talanaka,
5 (samu na bisalu ya lunungu* yina beto salaka ve, kasi samu na ntima ya yandi ya mawa), yandi vuukisaka beto na kuyobisaka beto na maza yina ke pesaka luzingu mpe na kukumisaka beto bantu ya malu-malu na nzila ya mpeve ya santu.
6 Yandi mwangisaka mpeve yayi na mutindu ya kulutila na zulu ya beto, na nzila ya Yesu Kristo mvuukisi ya beto.
7 Samu na manima ya kubakila beto mutindu bantu ya lunungu* na nzila ya ntima ya kulutila mbote ya muntu yina, beto kuma bantu yina ke kuzwa dikabu na bumosi na kivuvu ya luzingu ya ntangu nyonso.
8 Ba me fwana kutudila ntima na bamambu yayi mpe mu zola ti nge tatamana na kuzonzila mambu yayi samu ba yina ke kwikilaka na Nzambi tula makanisi ya bawu kaka na kusala bisalu ya mbote. Bamambu yayi ke mbote mpe ya ke mfunu samu na bantu.
9 Kasi losa bantembe ya buzoba, masolo ya bankumbu ya bankooko, kuswana mpe kunwana samu na musiku, samu ya ke ve mfunu mpe ya ke mpamba.
10 Samu na muntu yina me basisa mwa dibuundu ya yandi, losa yandi, manga yandi na manima ya kukebisa yandi mbala ya ntete mpe mbala ya zole.
11 Samu nge zaba ti muntu ya mutindu yina me kwenda ntama na nzila, yandi me sala disumu mpe yandi me semba nzutu ya yandi mosi.
12 Ntangu mu ke filisa nge Artemase na Tishike, sala nyonso yina ke na ngolo ya nge na kukwiza na sika ya munu na Nikopolise, samu mu me baka mukanu ya kulutisa ntangu ya madidi ya ngolo kuna.
13 Sala nyonso samu na kusadisa Zenase yina zaba mbote-mbote musiku mpe Apolose samu ba kondwa ata kima na nzyetolo ya bawu.
14 Kasi bika ti bantu ya beto mpe longoka kutatamana na bisalu ya mbote samu ba lenda kusadisa na ntangu nsatu ke vanda ngolo, samu ba kondwa ve kubuta bambuma.
15 Bantu nyonso yina ke na munu me filisa nge bambote. Pesa mpe bambote ya munu na bantu nyonso yina ke zolaka beto na kati ya kiminu.
Bika ti ntima ya kulutila mbote vanda na beno nyonso.
