Nsangu ya Mbote ya Yoane 10:1-42
10 “Mu ke na zonzaka na beno mambu ya tsyeleka, muntu yina me kota ve na lupangu ya mameme na nzila ya mwelo kasi me lutila na kibaka, yandi ke muyibi mpe kimpumbulu.
2 Kasi muntu yina me kota na mwelo ke muvungi ya mameme.
3 Mukengi ya mwelo ke fungudilaka yandi, mpe mameme ke kuwaka ndinga ya yandi. Yandi ke bokilaka mameme ya yandi na nkumbu mpe ke nataka bawu na ngaanda.
4 Ntangu yandi me basisa mameme ya yandi nyonso na ngaanda, yandi ke kwendaka na mantwala ya bawu, mpe mameme ke landaka yandi samu ba zaba ndinga ya yandi.
5 Ba ke landa ata fioti ve nzenza, kasi ba ke kima yandi samu ba zaba ve ndinga ya banzenza.”
6 Yesu zonzilaka bawu kifwani yayi, kasi ba bakulaka ve mambu yina yandi vanda sosa kuzonza na bawu.
7 Yesu zonzaka dyaka na bawu: “Mu ke na zonzaka na beno mambu ya tsyeleka, mu ke mwelo samu na mameme.
8 Bantu nyonso yina me kwiza na kisika ya munu ke miyibi mpe bimpumbulu, kasi mameme me kuwa ve bawu.
9 Mu ke mwelo. Muntu yina me kotila na munu ke vuuka, mpe yandi ke kota, ke basika mpe ke kuzwa kisika yina ke na matiti.
10 Muyibi ke kotaka kaka samu na kuyiba, kufwa mpe kubebisa. Mu me kwiza samu ba kuzwa luzingu mpe ba kuzwa yawu ya kulutila.
11 Mu ke muvungi ya kulutila mbote. Muvungi ya kulutila mbote ke pesaka luzingu* ya yandi samu na mameme.
12 Muntu yina ba bakaka na kisalu, yina ke ve muvungi mpe yina ke ve ya kuzwa mameme, ntangu yandi ke talaka yimbwa ya brusu ke na kwizaka, yandi ke bikaka mameme mpe yandi ke kimaka, yimbwa ya brusu ke kangaka bawu mpe ke mwangisaka bawu,
13 samu yandi ke muntu yina ba bakaka na kisalu mpe yandi ke kipeke ve mameme.
14 Mu ke muvungi ya kulutila mbote. Mu zaba mameme ya munu, mpe mameme ya munu zaba munu.
15 Kaka mutindu Tata zaba munu mpe mu zaba Tata, mpe mu ke na pesaka luzingu* ya munu samu na mameme.
16 “Mpe mu ke na mameme ya nkaka yina ke ve na lupangu yayi. Bawu mpe mu me fwana kukotisa bawu, mpe ba ke kuwa ndinga ya munu mpe ba ke kuma nkonga mosi mpe muvungi mosi.
17 Ni na yawu Tata ke zolaka munu, samu mu ke na pesaka luzingu* ya munu samu mu kuzwa dyaka yawu.
18 Ata muntu me botola munu yawu, kasi mu ke na pesaka yawu na luzolo ya munu mosi. Mu ke na lutumu ya kupesa yawu mpe mu ke na lutumu ya kuzwa dyaka yawu. Yayi ni musiku yina mu kuzwaka na sika ya Tata ya munu.”
19 Mbala yayi dyaka, Bazwife vanda wisana ve samu na nzonzolo yina.
20 Mingi na kati ya bawu vanda zonza: “Yandi ke na mpeve ya yimbi mpe me lawuka. Samu na yinki beno ke na kuwaka yandi?”
21 Ba ya nkaka zonzaka: “Yayi ke ve nzonzolo ya muntu yina ke na mpeve ya yimbi. Mpeve ya yimbi lenda fungula ve meso ya bantu yina ke na meso ya kufwa.”
22 Na ntangu yina, feti ya Kufungula salamaka na Yeruzalemi. Ya vandaka ntangu ya madidi ya ngolo,
23 mpe Yesu vanda tambula na tempelo na Kisika ya kutambula ya Salomoni.
24 Bazwife zungaka yandi mpe bandaka kuzonza na yandi: “Tii wapi ntangu nge ke bika beto* na kati ya maketi-keti? Kana nge ke Kristo, zonzila beto yawu pwelele.”
25 Yesu vutulaka: “Mu zonzaka na beno, kasi beno ke kwikilaka ve. Bisalu yina mu ke na salaka na nkumbu ya Tata ya munu, ni yawu ke na pesaka kimbangi samu na munu.
26 Kasi beno ke na kwikilaka ve samu beno ke ve mameme ya munu.
27 Mameme ya munu ke kuwaka ndinga ya munu, mpe mu zaba bawu mpe ba ke landaka munu.
28 Mu ke na pesaka bawu luzingu ya ntangu nyonso. Ba ke kufwa ata fioti ve, mpe ata muntu ke botola bawu na maboko ya munu.
29 Yina Tata ya munu me pesa munu ke ya kulutila bima nyonso ya nkaka, mpe ata muntu lenda botola mameme na diboko ya Tata.
30 Munu na Tata beto ke mosi.”*
31 Mbala yayi mpe Bazwife lokotaka matadi samu na kubula yandi yawu.
32 Yesu zonzaka na bawu: “Mu lakisaka beno bisalu mingi ya mbote, yina me katuka na sika ya Tata. Samu na wapi kisalu na kati ya bisalu yina beno ke na bulaka munu matadi?”
33 Bazwife vutulaka: “Beto ke na bulaka nge matadi, ya ke ve samu na kisalu mosi ya mbote, kasi samu na kuvweza, samu ti nge, ata nge ke muntu, nge ke na kumisaka nge mosi nzambi.”
34 Yesu zonzaka na bawu: “Ya ke ve kwandi ya kusonama na Musiku ya beno, ‘Mu zonzaka: “Beno ke banzambi”’?*
35 Kana yandi bokilaka ‘banzambi’ ba yina dyambu ya Nzambi sembaka (mpe beto zaba ti masonoko ke vandaka ntangu nyonso),
36 samu na yinki beno ke na zonzaka na munu muntu yina Nzambi me kumisa santu mpe me filisa na yinza, ‘Nge ke na vwezaka,’ samu mu zonzaka, ‘Mu ke Mwana ya Nzambi’?
37 Kana mu ke na salaka ve bisalu ya Tata ya munu, beno kwikila ve munu.
38 Kasi kana mu ke na salaka yawu, ata ti beno kwikila ve munu, beno kwikila bisalu yina, samu beno zaba mpe beno tatamana na kuzaba ti Tata ke na bumosi na munu, mpe mu ke na bumosi na Tata.”
39 Na yawu ba sosaka dyaka kubwila yandi, kasi yandi kimaka bawu.
40 Yandi kwendaka dyaka na simu ya nkaka ya Yordani, kisika yina Yoane vanda botika bantu na kubanda, mpe yandi vandaka kuna.
41 Bantu mingi kwizaka na sika ya yandi mpe bandaka kuzonza: “Yoane salaka ata kimangu mosi, kasi bamambu nyonso yina Yoane zonzaka na yina me tadila muntu yayi ke ya tsyeleka.”
42 Mpe kuna, bantu mingi bandaka kukwikila na yandi.
Banote
^ To: “Mwela.”
^ To: “Mwela.”
^ To: “Mwela.”
^ To: “Bamwela ya beto.”
^ To: “Na bumosi.”
^ To: “Bantu yina kele mutindu banzambi.”
