Nsangu ya Mbote ya Yoane 11:1-57
11 Bakala mosi na nkumbu ya Lazare vanda beela. Yandi vandaka muntu ya Betani, bwala ya Maria na ya yaya ya yandi ya kento Marte.
2 Ya vandaka Maria yina tulaka Mfumu mafuta ya nsunga ya kitoko, mpe kusunaka makulu ya yandi na bansuki ya yandi. Ni mpangi ya yandi ya bakala, Lazare, vanda beela.
3 Bibusi ya yandi filisaka nsangu na Yesu: “Mfumu, muntu yina nge ke zolaka ke na beelaka.”
4 Kasi ntangu Yesu kuwaka yawu, yandi zonzaka: “Nsuka ya maladi yayi ke ve lufwa. Kasi ya ke samu na nkembo ya Nzambi, samu Mwana ya Nzambi kuzwa nkembo na nzila ya yawu.”
5 Yesu vanda zolaka Marte na leki ya yandi ya kento, na Lazare.
6 Kasi ntangu Yesu kuwaka ti Lazare vanda beela, yandi lutisaka dyaka bilumbu zole kisika yina yandi vandaka.
7 Na manima ya yawu, yandi zonzaka na bilandi: “Beto kwenda dyaka na Zude.”
8 Bilandi zonzaka na yandi: “Rabi, kaka ntama mingi ve bantu ya Zude vanda sosa kufwa nge na matadi, mpe awa nge ke na sosaka kukwenda dyaka kuna?”
9 Yesu vutulaka: “Kilumbu ke vandaka kwandi ve na bangunga 12 ya ntangu? Kana muntu ke na tambulaka na kati ya ntangu, yandi ke bula dibaku na ata kima samu yandi ke na talaka nsemo ya yinza yayi.
10 Kasi kana muntu ke na tambulaka na kitombi, yandi ke bula dibaku, samu nsemo ke ve na yandi.”
11 Na manima ya kuzonza bamambu yayi, yandi bwelaka: “Ndiku ya beto Lazare ke na lalaka pongi, kasi mu ke na kwendaka kuna samu na kuvumbula yandi.”
12 Bilandi zonzaka na yandi: “Mfumu, kana yandi ke na lalaka pongi, yandi ke beluka.”
13 Yesu vanda zonzila lufwa ya Lazare. Kasi ba kanisaka ti yandi vanda zonza ti Lazare vanda lala pongi, ti yandi vanda pema.
14 Yesu zonzaka na bawu pwelele: “Lazare me kufwa,
15 mpe mu ke na kilengi samu na beno na yina mu vandaka ve kuna, samu beno kwikila. Kasi beto kwenda na sika ya yandi.”
16 Na yawu Toma yina ba vanda bokilaka dipasa, zonzaka na bilandi ya nkaka: “Beto mpe beto kwenda samu beto kufwa na yandi.”
17 Ntangu Yesu kumaka, yandi talaka ti bilumbu yiya lutaka yina Lazare vandaka na kati ya ndyamu.*
18 Bwala ya Betani vandaka pene-pene ya Yeruzalemi na bakilometre kana tatu.*
19 Bazwife mingi vanda me kwiza na sika ya Marte na Maria samu na kubomba bawu, samu na nkazi ya bawu.
20 Ntangu Marte kuwaka ti Yesu vanda kwiza, yandi kwendaka bwabana yandi. Kasi Maria bikanaka ya kuvanda na yinzo.
21 Marte zonzaka na Yesu: “Mfumu, kana nge vandaka awa, mpangi ya munu ya bakala zola kufwa ve.
22 Kasi ata na ntangu yayi mu zaba ti nyonso yina nge ke lomba na Nzambi, Nzambi ke pesa nge yawu.”
23 Yesu zonzaka na yandi: “Mpangi ya nge ya balaka ke vumbuka na lufwa.”
24 Marte zonzaka na yandi: “Mu zaba ti yandi ke vumbuka na mvumbukulu ya bantu ya kufwa na kilumbu ya nsuka.”
25 Yesu zonzaka na yandi: “Mu ke mvumbukulu mpe luzingu. Muntu yina ke lakisaka kiminu na munu, ata ti yandi kufwa, yandi ke vutuka na luzingu.
26 Mpe muntu nyonso yina ke moyo mpe ke na lakisaka kiminu na munu, yandi ke kufwa ata fioti ve. Nge ke na kwikilaka mambu yayi?”
27 Marte zonzaka na yandi: “Ee Mfumu, mu ke na kundima ti nge ke Kristo, Mwana ya Nzambi, muntu yina ke na kwizaka na yinza.”
28 Ntangu yandi zonzaka mambu yayi, yandi kwendaka bokila leki ya yandi ya kento Maria, mpe zonzaka na yandi na ndinga ya yisi: “Mulongi ke awa, yandi ke na bokilaka nge.”
29 Ntangu Maria kuwaka yawu, yandi telamaka na mbangu, mpe kwendaka na sika ya Yesu.
30 Yesu vandaka nabunu yandi kota ntete na kati ya bwala. Kasi yandi vandaka ntete na kisika yina Marte bwabanaka yandi.
31 Ntangu Bazwife yina vandaka na Maria na kati ya yinzo samu na kubomba yandi talaka ti yandi telamaka na mbangu mpe basikaka, ba landaka yandi, samu ba vanda kanisa ti yandi vanda kwenda na ndyamu* samu na kudila kuna.
32 Ntangu Maria kumaka kisika yina Yesu vandaka, mpe talaka yandi, yandi kubwaka na makulu ya yandi mpe zonzaka na yandi: “Mfumu, kana nge vandaka awa, mpangi ya munu ya bakala zola kufwa ve.”
33 Ntangu Yesu talaka Maria kudila mpe Bazwife yina kwizaka na yandi kudila, yandi talaka mpasi mingi na ntima,* mpe kumaka na kyadi ya kulutila.
34 Yandi yufulaka: “Wapi kisika beno me tula yandi?” Ba zonzaka na yandi: “Mfumu, kwiza tala.”
35 Yesu dilaka.
36 Na yawu Bazwife bandaka kuzonza: “Beno tala mutindu yandi vanda zolaka yandi!”
37 Kasi ba ya nkaka vanda zonza: “Muntu yayi yina fungulaka meso ya muntu ya meso ya kufwa zola sala kwandi ve ti Lazare kufwa ve?”
38 Yesu talaka dyaka mpasi na ntima, mpe kwendaka na ndyamu.* Ya vandaka dibulu yina ba timunaka na kati ya ditadi ya nene, mpe ba kangaka ditadi na yinwa ya yawu.
39 Yesu zonzaka: “Beno katula ditadi.” Marte, kibusi ya muntu yina kufwaka zonzaka na yandi: “Mfumu, ntangu yayi yandi ke na basikaka nsunga, samu bilumbu yiya me luta.”
40 Yesu zonzaka na yandi: “Mu zonzaka kwandi ve na nge ti, kana nge kwikila nge ke tala nkembo ya Nzambi?”
41 Na yawu ba katulaka ditadi. Yesu nangunaka meso na zulu mpe zonzaka: “Tata, mu ke na tondaka nge na yina nge me kuwa munu.
42 Ya tsyeleka, mu zabaka ti ntangu nyonso nge ke kuwaka munu. Kasi mu me zonza samu na bantu mingi yina ke ya kutelama awa, samu ba kwikila ti nge filisaka munu.”
43 Ntangu yandi manisaka kuzonza mambu yayi, yandi gangaka na ndinga ya ngolo: “Lazare, basika!”
44 Muntu yina vandaka ya kufwa basikaka. Makulu na maboko ya yandi vandaka ya kukangama na bitende, mpe kizizi ya yandi vandaka ya kufuka na lele. Yesu zonzaka na bawu: “Beno fungula yandi mpe beno bika yandi, yandi kwenda.”
45 Na yawu, Bazwife mingi yina kwizaka na sika ya Maria mpe talaka mambu yina Yesu salaka, kwikilaka na yandi,
46 kasi ba ya nkaka kwendaka na sika ya Bafarize mpe zabisaka bawu mambu yina Yesu salaka.
47 Na yawu, bamfumu ya banganga-nzambi mpe Bafarize vukisaka Kimvuka ya nene nyonso ya bazenga mambu ya Bazwife,* mpe zonzaka: “Yinki beto ke sala, samu muntu yayi ke na salaka bimangu mingi?
48 Kana beto bika yandi kwendaka salaka kaka mutindu yina, bawu nyonso ke kwikila na yandi mpe Baroma ke kwiza, mpe ke botola kisika* ya beto mpe bwala ya beto.”
49 Kasi mosi na kati ya bawu na nkumbu ya Kayife, yina vandaka nganga-nzambi ya nene mvula yina, zonzaka na bawu: “Beno zaba ata kima.
50 Beno me kanisa ve ti ya ke samu na mbote ya beno ti muntu mosi kufwa samu na bantu na kisika ya kufwa bwala nyonso?”
51 Mambu yina yandi zonzaka katukaka ve na yandi mosi. Kasi samu yandi vandaka nganga-nzambi ya nene mvula yina, yandi vanda bikula ti Yesu zola kufwa samu na Bazwife,
52 mpe kaka ve samu na Bazwife kasi mpe samu na kuvukisa na bumosi bana ya Nzambi yina vandaka ya kumwangana.
53 Na yawu, banda kilumbu yina, ba salaka mfundu samu na kufwa yandi.
54 Na yina, Yesu vanda tambula dyaka ve na meso ya bantu, na kati-kati ya Bazwife. Kasi yandi katukaka kuna mpe kwendaka na kizunga pene-pene na ntoto ya kuyuma, na bwala yina ba ke bokilaka Efrayime, mpe yandi bikanaka kuna na bilandi.
55 Pake ya Bazwife kumaka pene-pene, mpe bantu mingi ya babwala ya fioti yina vandaka pene-pene, kwendaka na Yeruzalemi tekila Pake kuma, samu na kuvedisa banzutu ya bawu mutindu Musiku vanda lombaka yawu.
56 Ba vanda sosa Yesu mpe ba vanda yufula bawu na bawu ntangu ba vandaka ya kutelama na kati ya tempelo: “Beno me kanisa yinki, ti yandi ke kwiza ata fioti ve na mukembo?”
57 Kasi bamfumu ya banganga-nzambi pesaka musiku ti, kana muntu me kwiza zaba kisika yina Yesu vandaka, yandi zola zabisa yawu samu ba bwila* yandi.
Banote
^ To: “Ndyamu ya kubambuka.”
^ Na Greke: “Basitade kana 15.” Sitade mosi kele bametre 185.
^ To: “Ndyamu ya kubambuka.”
^ Na Greke: “Na mpeve ya yandi.”
^ To: “Ndyamu ya kubambuka.”
^ Na Greke: “Sanedreni.” Tala Yina ya zola zonza.
^ Ya ke ni tempelo.
^ To: “Kanga.”
