Nsangu ya Mbote ya Yoane 14:1-31
14 “Beno vanda ve na bantima na zulu. Beno lakisa kiminu na Nzambi, beno lakisa mpe kiminu na munu.
2 Na yinzo ya Tata ya munu, bisika ya kuvanda ke mingi. Kana ya vandaka ve mutindu yina, mu zola zabisa beno, samu mu ke na kwendaka bongisa kisika samu na beno.
3 Dyaka, kana mu kwenda mpe mu bongisa kisika samu na beno, mu ke kwiza dyaka mpe mu ke yamba beno na sika ya munu, samu kisika mu kele, beno mpe beno vanda.
4 Mpe kisika mu ke na kwendaka, beno zaba nzila.”
5 Toma zonzaka na yandi: “Mfumu, beto zaba ve kisika nge ke na kwendaka. Wapi mutindu beto lenda zaba nzila?”
6 Yesu zonzaka: “Mu ke nzila, matsyeleka mpe luzingu. Ata muntu lenda kwiza na sika ya Tata kana na nzila ya munu ve.
7 Kana beno zabaka munu, beno zola zaba mpe Tata ya munu. Banda ntangu yayi, beno me zaba yandi mpe beno me tala yandi.”
8 Filipe zonzaka na yandi: “Mfumu, lakisa beto Tata, mpe ya ke lunga samu na beto.”
9 Yesu zonzaka na yandi: “Filipe, ntangu nyonso yina mu me lutisa na beno, nge me longoka ve na kuzaba munu? Muntu yina me tala munu me tala mpe Tata. Wapi mutindu nge ke na zonzaka, ‘Lakisa beto Tata’?
10 Nge ke na kwikilaka ve ti mu ke na bumosi na Tata, mpe Tata ke na bumosi na munu? Bamambu yina mu ke na zonzaka na beno ke na katukaka ve na munu mosi. Kasi Tata, yina ke na bumosi na munu ke na salaka bisalu ya yandi.
11 Beno kwikila munu ntangu mu ke na zonzaka ti mu ke na bumosi na Tata mpe Tata ke na bumosi na munu. Kana ve, beno kwikila samu na bisalu yawu mosi.
12 Mu ke na zonzaka na beno mambu ya tsyeleka, muntu yina me lakisa kiminu na munu, ke sala mpe bisalu yina mu ke na salaka, mpe yandi ke sala bisalu ya kulutila nene na yayi, samu mu ke na kwendaka na sika ya Tata.
13 Dyaka, nyonso yina beno ke lomba na nkumbu ya munu, mu ke sala yawu, samu Tata kuzwa nkembo na nzila ya Mwana.
14 Kana beno lomba kima na nkumbu ya munu, mu ke sala yawu.
15 “Kana beno zola munu, beno ke tumama na misiku ya munu.
16 Mpe mu ke lomba na Tata, mpe yandi ke pesa beno kisadisi ya nkaka,* samu yandi vanda na beno ntangu nyonso,
17 mpeve ya matsyeleka yina yinza lenda kuzwa ve, samu ya ke na talaka ve yawu mpe zaba ve yawu. Beno, beno zaba yawu samu ya ke vandaka na beno mpe ya ke na kati ya beno.
18 Mu ke bika ve beno beno mosi.* Mu ke vutuka na sika ya beno.
19 Na mwa ntangu fioti yinza ke tala dyaka ve munu, kasi beno, beno ke tala munu samu mu ke moyo mpe beno ke vanda moyo.
20 Kilumbu yina, beno ke zaba ti mu ke na bumosi na Tata ya munu, mpe beno ke na bumosi na munu, mpe mu ke na bumosi na beno.
21 Muntu yina me ndima misiku ya munu mpe ke tumamaka na yawu, ni yandi ke zolaka munu. Mpe muntu yina ke zolaka munu, Tata ya munu ke zola yandi, mpe mu ke zola yandi, mpe mu ke talana pwelele na yandi.”
22 Yuda, kasi Iskayote ve, zonzaka na yandi: “Mfumu, yinki me salama samu nge zola kutalana pwelele na beto kasi na yinza ve?”
23 Yesu vutulaka: “Kana muntu zola munu, yandi ke tumama na mambu yina mu ke zonzaka, mpe Tata ya munu ke zola yandi mpe beto ke kwiza na sika ya yandi, mpe beto ke vanda na yandi.
24 Muntu yina ke zolaka ve munu ke tumamaka ve na mambu yina mu ke zonzaka. Mambu yina beno ke na kuwaka ke ve ya munu, kasi ya ke ya Tata yina filisaka munu.
25 “Mu me zonzila beno bamambu yayi ntangu mu ke ntete na beno.
26 Kasi kisadisi, mpeve ya santu, yina Tata ke filisa na nkumbu ya munu, ni yandi ke longa beno bamambu nyonso mpe ke bambula beno bamambu nyonso yina mu zonzaka na beno.
27 Mu me bikila beno kizunu, me pesa beno kizunu ya munu. Mu me pesa ve beno yawu mutindu yinza ke pesaka yawu. Beno bika ve ti bantima ya beno vanda na zulu mpe ya lemba na boma.
28 Beno kuwaka ti mu zonzaka na beno, ‘Mu ke na kwendaka mpe mu ke vutuka na sika ya beno.’ Kana beno vanda zolaka munu, beno zola sepela na yina mu ke na kwendaka na Tata, samu Tata me lutila munu.
29 Ntangu yayi mu me zonzila beno yawu tekila ya salama, samu beno kwikila ntangu ya ke salama.
30 Mu ke zonza dyaka ve mingi na beno, samu mfumu ya yinza ke na kwizaka, mpe yandi ke ve na lutumu na zulu ya munu.*
31 Kasi samu yinza zaba ti mu ke zolaka Tata, mu ke na salaka kaka mutindu Tata me tumisa munu na kusala. Beno telama, beto katuka awa.
Banote
^ To: “Muntu ya nkaka yina ke kindisaka.”
^ To: “Mu ke bika ve beno mutindu bana yina me fwidila bibuti.”
^ To: “Yandi lenda sala munu ata kima.”
