Nsangu ya Mbote ya Yoane 15:1-27
15 “Mu ke yinti ya vinu ya tsyeleka, mpe Tata ya munu ke kisadi-bilanga.
2 Yandi ke katulaka na munu kintala* nyonso yina ke butaka ve bambuma, mpe yandi ke kumisaka ya kuvedila kintala nyonso yina ke butaka bambuma, samu ya buta bambuma ya kulutila.
3 Beno ke ya kuvedila yimeni samu na mambu yina mu zonzaka na beno.
4 Beno bikana na bumosi na munu, mpe mu ke bikana na bumosi na beno. Kaka mutindu kintala lenda buta ve yawu mosi bambuma kana ya me bikana ve na yinti ya vinu, beno mpe lenda buta ve bambuma kana beno me bikana ve na bumosi na munu.
5 Mu ke yinti ya vinu mpe beno ke bintala. Muntu yina me bikana na bumosi na munu, mpe munu na bumosi na yandi, ni yandi ke buta bambuma mingi, samu kana beno bika munu, beno ke lenda kusala ata kima mosi ve.
6 Kana muntu bikana ve na bumosi na munu, yandi ke vanda mutindu kintala yina ba me losa mpe ya me yuma. Bantu ke vukisaka bintala yango, ke losaka yawu na tiya mpe ya ke nyengaka.
7 Kana beno bikana na bumosi na munu, mpe mambu yina mu ke zonzaka bikana na kati ya beno, beno lenda lomba mambu ni mambu yina beno me zola mpe ya ke salama samu na beno.
8 Tata ya munu ke kuzwaka nkembo na mambu yayi, ti beno tatamana na kubuta bambuma mingi mpe beno lakisa ti beno ke bilandi ya munu.
9 Kaka mutindu Tata ya munu zolaka munu, mu me zola mpe beno. Beno bikana na kati ya luzolo ya munu.
10 Kana beno tumama na misiku ya munu, beno ke bikana na kati ya luzolo ya munu, kaka mutindu mu tumamaka na misiku ya Tata mpe me bikana na kati ya luzolo ya yandi.
11 “Mu me zonzila beno mambu yayi samu kyese ya munu vanda na kati ya beno, mpe kyese ya beno kuma ya kulunga.
12 Yayi ni musiku ya munu, ti beno zolasana beno na beno kaka mutindu mu zolaka beno.
13 Ata muntu ke na luzolo ya kulutila muntu yina me pesa luzingu* ya yandi samu na bandiku ya yandi.
14 Beno ke bandiku ya munu kana beno sala mambu yina mu ke na tumisaka beno.
15 Mu ke na bokilaka dyaka ve beno bisadi, samu kisadi zaba ve mambu yina mfumu ya yandi ke salaka. Kasi mu me bokila beno bandiku samu mu me zabisa beno mambu nyonso yina mu kuwaka na Tata ya munu.
16 Beno soolaka ve munu, kasi ni munu soolaka beno, mpe mu me tula beno samu beno kwenda mpe beno tatamana na kubuta bambuma, mpe mbuma ya beno vanda kaka, samu mambu ni mambu yina beno ke lomba na Tata na nkumbu ya munu, yandi pesa beno yawu.
17 “Mu tumisaka beno bamambu yango samu beno zolasana beno na beno.
18 Kana yinza me yiina beno, beno zaba ti ya yiinaka ntete munu tekila ya yiina beno.
19 Kana beno vandaka bantu ya yinza, yinza zola kangama na kima ya yawu. Kasi samu beno ke ve bantu ya yinza, kasi mu soolaka beno na kati ya yinza, ni na yawu yinza ke yiinaka beno.
20 Beno bambukila moyo na mambu yayi yina mu zonzilaka beno: Kisadi me lutila ve mfumu ya yandi. Kana ba nyokolaka munu, ba ke nyokola mpe beno. Kana ba tumamaka na mambu yina mu zonzaka, ba ke tumama mpe na mambu ya beno.
21 Kasi ba ke sala beno bamambu nyonso yayi samu na nkumbu ya munu, samu ba zaba ve Muntu yina filisaka munu.
22 Kana mu kwizaka ve, mpe zonzilaka ve bawu, ba zola vanda ve na disumu. Kasi awa ba ke ve na mambu ya kuzonza samu na disumu ya bawu.
23 Muntu yina ke yiinaka munu ke yiinaka mpe Tata ya munu.
24 Kana mu salaka ve na kati ya bawu bisalu yina ata muntu ya nkaka salaka, ba zola vanda ve na disumu. Kasi awa ba me tala munu, mpe ba me yiina munu na Tata ya munu.
25 Kasi ya me salama samu mambu yina ba sonikaka na Musiku ya bawu lungana: ‘Ba yiinaka munu kaka ya mpamba.’
26 Ntangu kisadisi yina mu ke filisa beno, yina ke katuka na Tata ke kwiza, mpeve ya matsyeleka yina me katuka na Tata, ni yandi ke pesa kimbangi samu na munu.
27 Mutindu mosi, beno mpe, beno me fwana kupesa kimbangi samu na munu, samu beno me vanda na munu katuka kubanda.
