Nsangu ya Mbote ya Yoane 18:1-40
18 Na manima ya kuzonza bamambu yayi, Yesu basikaka na bilandi ya yandi mpe kwendaka na lweka ya nkaka ya dibenga ya Kidroni,* kisika bilanga mosi vandaka, mpe Yesu na bilandi ya yandi kotaka kuna.
2 Yuda, muntu yina tekaka yandi zabaka mpe kisika yina, samu Yesu vanda vukanaka kuna na bilandi ya yandi.
3 Yuda bakaka kikunku ya basoda, bakengi yina bamfumu ya banganga-nzambi mpe Bafarize filisaka, mpe ba kwizaka kuna na bayinti yina vanda pela, bamwinda mpe binwanunu.
4 Na yawu, samu Yesu zabaka bamambu nyonso yina zola kumina yandi, yandi kwendaka na mantwala mpe yufulaka bawu: “Beno ke na sosaka nani?”
5 Ba vutulaka: “Yesu, muntu ya Nazareti.” Yesu zonzaka na bawu: “Ni munu.” Yuda, muntu yina tekaka yandi vandaka mpe na bawu.
6 Kasi ntangu Yesu zonzaka na bawu: “Ni munu,” ba vutukaka manima mpe ba kubwaka na ntoto.
7 Yesu zonzaka dyaka na bawu: “Beno ke na sosaka nani?” Ba zonzaka: “Yesu, muntu ya Nazareti.”
8 Yesu zonzaka: “Mu me zonza na beno ti ni munu. Kana ni munu beno ke na sosaka, beno bika bantu yayi ba kwenda.”
9 Ya vandaka samu mambu yayi yina yandi zonzaka lungana: “Mu me zimbisa ata muntu mosi ve na kati ya bantu yina nge pesaka munu.”
10 Na yawu, Simoni Piere yina vandaka na mbele, basisaka yawu, bulaka yawu na kisadi ya nganga-nzambi ya nene, mpe zengaka yandi dikutu ya lweka ya bakala. Nkumbu ya kisadi yango vandaka Malakuse.
11 Kasi Yesu zonzaka na Piere: “Kotisa mbele na poshi ya yawu. Mu me fwana ve kunwa kopo yina Tata me pesa munu?”
12 Na manima, basoda na mfumu ya basoda mpe bakengi ya Bazwife bwilaka Yesu mpe ba kangaka yandi basinga.
13 Ba nataka ntete yandi na Ane, samu yandi vandaka bokilo ya Kayife yina vandaka nganga-nzambi ya nene mvula yina.
14 Ntyo, ya vandaka ni Kayife yina zonzaka na Bazwife ti ya vandaka samu na mbote ya bawu ti muntu mosi kufwa samu na dikanda nyonso.
15 Simoni Piere na kilandi ya nkaka vanda landa Yesu. Kilandi yango vandaka ya kuzabana na sika ya nganga-nzambi ya nene mpe yandi kotaka na Yesu tii na kati ya lupangu ya nganga-nzambi ya nene.
16 Kasi Piere bikanaka na ngaanda ya kutelama na mwelo.* Na yawu, kilandi ya nkaka yina vandaka ya kuzabana na sika ya nganga-nzambi ya nene, basikaka mpe sololaka na muntu yina vanda kengidilaka mwelo, mpe kotisaka Piere.
17 Kisadi ya kento yina vandaka mukengi ya mwelo zonzaka na Piere: “Nge mpe ke ve mosi ya bilandi ya muntu yayi?” Piere zonzaka: “Ve, munu ve.”
18 Bisadi mpe bakengi vandaka ya kutelama pene-pene na tiya ya makala yina ba salaka samu madidi vandaka, mpe ba vanda yotila tiya. Piere vandaka mpe kuna na bawu, mpe yandi vanda yotila tiya.
19 Na yawu, mfumu ya banganga-nzambi yufulaka Yesu byuvu na yina me tadila bilandi ya yandi mpe malongi ya yandi.
20 Yesu zonzaka na yandi: “Mu vanda zonza na meso ya bantu nyonso. Mu vanda longa ntangu nyonso na yinzo ya lusambu mpe na tempelo, kisika yina Bazwife nyonso ke vukanaka, mpe mu zonzaka ata mambu mosi ve na kinsweki.
21 Samu na yinki nge ke na yufulaka munu byuvu? Yufula ba yina kuwaka mambu yina mu zonzilaka bawu. Bawu, ba zaba mambu yina mu zonzaka.”
22 Ntangu Yesu manisaka kuzonza bamambu yayi, mosi ya bakengi yina vandaka kuna pesaka Yesu mbata na kizizi mpe zonzaka: “Ni mutindu yayi nge ke na zonzaka na mfumu ya banganga-nzambi?”
23 Yesu zonzaka na yandi: “Kana mu me zonza mambu ya yimbi, zonza* yimbi yina mu me zonza. Kasi, kana mambu yina mu me zonza ke ya tsyeleka, samu na yinki nge me bula munu?”
24 Na manima, Ane filisaka yandi na nganga-nzambi ya nene Kayife. Yandi vandaka kaka na basinga yina ba kangaka yandi.
25 Ntyo, Simoni Piere vandaka kaka kisika yina, mpe vanda yotila tiya. Ba zonzaka na yandi: “ Nge mpe ke ve mosi ya bilandi ya yandi?” Yandi mangaka mpe zonzaka: “Ve, munu ve.”
26 Mosi ya bisadi ya nganga-nzambi ya nene yina vandaka muntu ya dikanda ya bakala yina Piere zengaka dikutu zonzaka: “Ni nge ve mu talaka na kati ya bilanga na yandi?”
27 Kasi Piere mangaka dyaka, mpe na mbala mosi nsusu ya bakala kokolaka.
28 Na manima, ba katukaka na Yesu na sika ya Kayife mpe ba nataka yandi na yinzo ya mfumu ya mbanza. Ya vandaka na suka-suka. Kasi Bazwife bawu mosi kotaka ve na yinzo ya mfumu ya mbanza samu ba kuma ve mvindu mpe ba lenda kudya Pake.
29 Na yawu, Pilate basikaka na ngaanda na sika ya bawu mpe zonzaka: “Na wapi mambu beno ke na fundaka muntu yayi?”
30 Ba zonzaka na yandi: “Kana muntu yayi vandaka ve muntu yina ke salaka mambu ya yimbi,* beto zola pesa ve yandi na maboko ya nge.”
31 Na yawu Pilate zonzaka na bawu: “Beno baka yandi beno mosi mpe beno sambisa yandi na kulandilaka musiku ya beno.” Bazwife vutulaka: “Musiku ke pesaka ve beto nzila ya kufwa muntu.”
32 Ya vandaka samu na kulungisa mambu yina Yesu zonzaka samu na kulakisa mutindu ya lufwa yina yandi zola kufwa.
33 Na yawu, Pilate kotaka dyaka na yinzo ya mfumu ya mbanza, bokilaka Yesu mpe zonzaka na yandi: “Ni nge Mfumu ya Bazwife?”
34 Yesu vutulaka: “Kyuvu yayi nge ke na yufulaka ke na katukaka na nge mosi, to ya ke mambu bantu ya nkaka me zonzila nge samu na munu?”
35 Pilate zonzaka na yandi: “Nge zaba ti mu ke ve Zwife. Bantu ya dikanda ya nge mosi mpe banganga-nzambi bantu me pesa nge na maboko ya munu. Wapi mambu nge me sala?”
36 Yesu vutulaka: “Kimfumu ya munu ke ve ya yinza yayi. Kana Kimfumu ya munu vandaka ya yinza yayi, bisadi ya munu zola nwana samu ba pesa ve munu na maboko ya Bazwife. Kasi Kimfumu ya munu ke ve ya awa.”
37 Pilate zonzaka na yandi: “Na yawu, nge ke mfumu?” Yesu vutulaka: “Nge mosi muntu ke na zonzaka ti mu ke mfumu. Ni samu na mambu yayi mu butukaka, mpe ni samu na yawu mu kwizaka na kati ya yinza: samu na kupesa kimbangi na matsyeleka. Muntu nyonso yina ke na lweka ya matsyeleka ke kuwaka ndinga ya munu.”
38 Pilate zonzaka na yandi: “Matsyeleka ke yinki?”
Na manima ya kuzonza mambu yayi, yandi basikaka dyaka na sika ya Bazwife mpe zonzaka na bawu: “Mu me tala ata mambu ya yimbi na yandi.
39 Dyaka, beno ke vandaka na nsalulu ti mu basisila beno muntu mosi na Pake. Na yawu, beno zola mu basisa Mfumu ya Bazwife?”
40 Ba zonzaka dyaka na ndinga ya ngolo: “Muntu yayi ve, kasi Barabase!” Ntyo Barabase vandaka muyibi.
Banote
^ Dibenga yayi ke vandaka ya kuyuma ata na ntangu ya madidi ya ngolo. Maza ke vandaka kuna kaka kana mvula me noka mingi.
^ To: “Na kisika ya kukotila.”
^ To: “Pesa kimbangi na.”
^ To: “Muntu ya yimbi.”
