Nsangu ya Mbote ya Yoane 21:1-25
21 Na manima ya mambu yayi, Yesu talanaka dyaka na* bilandi ya yandi na nzadi ya mungwa ya Tiberiade. Yandi talanaka na mutindu yayi:
2 Simoni Piere, Toma (yina ba vanda bokilaka dipasa), Natanayele, muntu ya Kana ya Galile, bana ya Zebede mpe bilandi zole ya Yesu ya nkaka vandaka kintwadi.
3 Simoni Piere zonzaka na bawu: “Mu me kwenda loba bambisi.” Ba zonzaka na yandi: “Beto ke kwiza na nge.” Ba kwendaka mpe ba kotaka na bwatu, kasi na mpimpa yina, ba kuzwaka ata kima.
4 Kasi kaka na ntangu yina bwisi vanda kutsya, Yesu telamaka na zyelo ya nzadi ya mungwa. Bilandi vanda zaba ve ti ya vandaka ni Yesu.
5 Yesu zonzaka na bawu: “Bana, beno ke na ata kima* ya kudya?” Ba vutulaka: “Ve!”
6 Yandi zonzaka na bawu: “Beno losa mpwasa na lweka ya diboko ya bakala ya bwatu, mpe beno ke kuzwa kima.” Na yawu ba losaka yawu, kasi ba vanda lenda ve kubenda yawu, samu bambisi vandaka mingi.
7 Kilandi yina Yesu vanda zolaka zonzaka na Piere: “Ya ke Mfumu!” Ntangu Simoni Piere kuwaka ti ya vandaka Mfumu, yandi lwataka* kinkuti ya yandi ya zulu samu yandi vandaka mutakala,* mpe yandi kotaka na maza.
8 Kasi bilandi ya nkaka kwizaka na bwatu ya fioti. Ba vanda benda mpwasa yina vandaka ya kufuluka na bambisi, samu ba vandaka ve ntama na ntoto, kaka na bametre kana 90.*
9 Ntangu ba kumaka na zyelo ya nzadi ya mungwa, ba talaka tiya ya makala, na mbisi na zulu ya yawu mpe dimpa.
10 Yesu zonzaka na bawu: “Beno nata ndambu ya bambisi yina beno me katuka kuzwa.”
11 Na yawu, Simoni Piere kotaka na bwatu mpe bendaka mpwasa yina vandaka ya kufuluka na bambisi ya nene. Ya vandaka 153. Ata ti ya vandaka mingi, mpwasa pasukaka ve.
12 Yesu zonzaka na bawu: “Beno kwiza kudya.” Ata mosi ya bilandi lendaka kuyufula yandi: “Nge ke nani?” samu ba zabaka ti ya vandaka Mfumu.
13 Yesu kwizaka, bakaka dimpa mpe pesaka bawu yawu. Yandi salaka mutindu mosi na mbisi.
14 Awa, ya vandaka mbala ya tatu yina Yesu basikilaka bilandi na manima ya kuvumbuka na lufwa.
15 Ntangu ba manisaka kudya, Yesu zonzaka na Simoni Piere: “Simoni mwana ya Yoane, nge ke zolaka munu kulutila yayi? Simoni vutulaka: “Ee Mfumu. Nge zaba ti mu ke zolaka nge.” Yesu zonzaka na yandi: “Dikisa bana ya munu ya mameme.”
16 Yesu zonzaka na yandi mbala ya zole: “Simoni mwana ya Yoane, nge ke zolaka munu?” Simoni vutulaka: “Ee Mfumu, nge zaba ti mu ke zolaka nge.” Yesu zonzaka na yandi: “Kengidila mameme ya munu ya fioti.”
17 Yesu zonzaka dyaka na yandi mbala ya tatu: “Simoni mwana ya Yoane, nge ke zolaka munu?” Piere kumaka na mawa samu yandi yufulaka yandi mbala ya tatu: “Nge ke zolaka munu?” Na yawu, yandi zonzaka na yandi: “Mfumu, nge zaba bamambu nyonso. Nge zaba ti mu ke zolaka nge.” Yesu zonzaka na yandi: “Dikisa mameme ya munu ya fioti.
18 Mu ke na zonzaka na nge mambu ya tsyeleka, ntangu nge vandaka ntwenya, nge vanda lwataka nge mosi, mpe nge vanda tambulaka kisika ni kisika nge zolaka. Kasi ntangu nge ke nuna, nge ke pesa maboko, mpe muntu ya nkaka ke lwatisa nge mpe ke nata nge kisika yina nge zola ve.”
19 Yandi zonzaka yawu samu na kulakisa na wapi mutindu ya lufwa Piere zola pesa nkembo na Nzambi. Na manima ya kuzonza yawu, yandi zonzaka na Piere: “Tatamana na kulanda munu.”
20 Piere balukaka mpe talaka ti kilandi yina Yesu vanda zolaka vanda landa bawu, muntu yina na madya ya nkokila yekamaka na ntulu ya Yesu, mpe zonzaka: “Mfumu, nani ke muntu yina ke teka nge?”
21 Na yawu ntangu Piere talaka yandi, yandi zonzaka na Yesu: “Mfumu, yinki ke kumina muntu yayi?”
22 Yesu zonzaka na yandi: “Kana mu zola ti yandi bikana tii mu ke kwiza, na wapi mambu ya me tala nge? Nge, tatamana na kulanda munu.”
23 Na yawu mambu yayi mwanganaka na kati ya bampangi ti kilandi yayi zola kufwa ve. Kasi Yesu zonzaka ve ti yandi ke kufwa ve, kasi yandi zonzaka: “Kana mu zola ti yandi bikana tii mu ke kwiza, na wapi mambu ya me tala nge?”
24 Ni kilandi yina ke na pesaka kimbangi samu na bamambu yayi, mpe yina sonikaka bamambu yayi, mpe beto zaba ti kimbangi ya yandi ke ya tsyeleka.
25 Ya tsyeleka, ya ke na bamambu mingi ya nkaka yina Yesu salaka. Kana ba zola sonika yawu nyonso tii na bamambu ya fioti-fioti, mu kanisa ti yinza yawu mosi zola lungila ve barulo* yango.
Banote
^ To: “Basikilaka dyaka.”
^ To: “Beno ke ve na ata mbisi.”
^ To: “Kangaka.”
^ Na ndinga ya Greke nzonzolo yayi ke lakisaka ve kaka muntu yina ke kimpene nzutu nyonso, kasi mpe muntu yina me lwata “kaka mwa kilele ya kati.”
^ Na Greke: “Kitezolo ya maboko 200.”
^ Rulo ke mukanda ya yinda yina ba me yidika na mpusu ya kibulu mpe yina ba me futika na mwa yinti ya fioti.
