Nsangu ya Mbote ya Yoane 3:1-36
3 Ya vandaka na Mufarize mosi na nkumbu ya Nikodeme. Yandi vandaka mfumu mosi ya Bazwife.
2 Yandi kwendaka tala Yesu na mpimpa mpe zonzaka na yandi: “Rabi, beto zaba ti nge ke mulongi yina me katuka na Nzambi, samu ata muntu lenda sala bimangu yina nge ke na salaka kana Nzambi ke ve na yandi.”
3 Yesu vutulaka: “Mu ke na zonzaka na nge mambu ya tsyeleka, kana muntu butuka ve dyaka, yandi lenda tala ve Kimfumu ya Nzambi.”
4 Nikodeme zonzaka na yandi: “Wapi mutindu muntu yina me kuma kiboba lenda butuka dyaka? Yandi lenda kota ve na kivumu ya mama ya yandi mpe kubutuka mbala ya zole.”
5 Yesu vutulaka: “Mu ke na zonzaka na nge mambu ya tsyeleka, kana muntu butuka ve na maza mpe na mpeve, yandi lenda kota ve na Kimfumu ya Nzambi.
6 Yina me butuka na musuni ke musuni, mpe yina me butuka na mpeve ke mpeve.
7 Kupamuka ve samu mu me zonza na nge: Beno me fwana kubutuka dyaka.
8 Mupepe ke pepaka kisika ni kisika ya zola. Nge ke kuwaka makelele ya yawu, kasi nge zaba ve kisika ya me katuka, mpe kisika ya ke na kwendaka. Ya ke mutindu mosi samu na muntu nyonso yina me butuka na mpeve.”
9 Nikodeme yufulaka yandi: “Wapi mutindu ya lenda salama?”
10 Yesu zonzaka na yandi: “Nge ke mulongi na Izraele, kasi nge zaba ve bamambu yayi?
11 Mu ke na zonzaka na nge mambu ya tsyeleka, beto ke zonzaka mambu yina beto zaba mpe beto ke pesaka kimbangi na mambu yina beto me tala. Kasi beno ke ndimaka ve kimbangi ya beto.
12 Kana mu me zonzila beno mambu ya ntoto mpe beno ke na kwikilaka kaka ve, wapi mutindu beno ke kwikila kana mu zonzila beno mambu ya mazulu?
13 Dyaka, ata muntu mosi ve kwendaka na mazulu, katula kaka muntu yina katukaka na zulu, Mwana ya muntu.
14 Mpe kaka mutindu Moyize zangulaka nyoka na ntoto ya kuyuma, mutindu mosi mpe ba ke zangula Mwana ya muntu,
15 samu muntu nyonso yina ke kwikila na yandi, kuzwa luzingu ya ntangu nyonso.
16 “Samu Nzambi zolaka mingi yinza, ni na yawu yandi pesaka Mwana ya yandi kaka mosi ya kubutuka, samu ti muntu nyonso yina ke lakisa kiminu na yandi kufwa ve kasi kuzwa luzingu ya ntangu nyonso.
17 Nzambi filisaka ve Mwana ya yandi na yinza samu yandi sambisa yinza, kasi samu yinza vuuka na nzila ya yandi.
18 Muntu yina ke lakisa kiminu na yandi, ba ke sambisa ve yandi. Muntu yina ke lakisa ve kiminu, ba sambisaka yandi yimeni, samu yandi me lakisa ve kiminu na Mwana kaka mosi ya kubutuka ya Nzambi.
19 Yayi ke mambu yina me nata lusambusu: nsemo kwizaka na kati ya yinza, kasi bantu zolaka kitombi na kisika ya nsemo, samu mavanga ya bawu vandaka yimbi.
20 Konso muntu yina ke salaka mambu ya yimbi ke yiinaka nsemo, mpe yandi ke kwizaka ve na nsemo samu mavanga ya yandi talana ve pwelele.*
21 Kasi muntu yina ke salaka mambu ya lunungu ke kwizaka na nsemo, samu ya talana pwelele ti mambu yina yandi ke salaka ke na kwelanaka na luzolo ya Nzambi.”
22 Na manima, Yesu mpe bilandi ya yandi kwendaka na babwala ya fioti ya Zude, mpe kuna, yandi lutisaka mwa ntangu fioti na bawu mpe yandi vanda botika bantu.
23 Kasi Yoane mpe vanda botika bantu na Enone, pene-pene na bwala ya Salime, samu maza vandaka mingi kuna mpe bantu vanda bika ve kukwiza mpe ba vanda kuzwa mbotokolo.
24 Na ntangu yina, ba vandaka me tula ntete ve Yoane na boloko.
25 Bilandi ya Yoane swanaka na Zwife mosi na yina me tadila mambu ya kuvanda ya kuvedila.
26 Ba kwizaka na sika ya Yoane mpe zonzaka na yandi: “Rabi, muntu yina vandaka na nge na simu ya nkaka ya Yordani, muntu yina nge pesilaka kimbangi, yandi ke na botikaka, mpe bantu nyonso ke na kwendaka na sika ya yandi.”
27 Yoane vutulaka: “Muntu lenda kuzwa ata kima kana Nzambi me pesa ve yandi yawu.
28 Beno mosi ke bambangi ya mambu yayi yina mu zonzaka, ‘Mu ke ve Kristo, kasi ba filisaka munu na mantwala ya yandi.’
29 Kento yina ba ke na kwelaka ke ya bakala yina ke na kwelaka. Kasi ndiku ya bakala yina ke na kwelaka, ntangu yandi me telama mpe ke na kuwaka yandi, yandi ke na kilengi mingi samu na ndinga ya bakala yina ke na kwelaka. Ni na yawu, kilengi ya munu me kuma ya kulunga.
30 Muntu yina, fwana kubika ve kukula, kasi munu, mu me fwana kubika ve kukulumuka.”
31 Muntu yina me katuka na zulu me lutila bantu nyonso ya nkaka. Muntu yina me katuka na ntoto ke muntu ya ntoto mpe ke zonzaka mambu ya ntoto. Muntu yina me katuka na zulu me lutila bantu nyonso ya nkaka.
32 Yandi ke na pesaka kimbangi samu na mambu yina yandi talaka mpe kuwaka, kasi ata muntu ke na ndimaka kimbangi ya yandi.
33 Muntu yina me ndima kimbangi ya yandi me ndima* ti Nzambi ke zonzaka matsyeleka.
34 Samu muntu yina Nzambi filisaka ke zonzaka mambu ya Nzambi, samu Nzambi ke pesaka ve mpeve ndambu-ndambu.
35 Tata ke zolaka Mwana mpe yandi me pesa bima nyonso na maboko ya yandi.
36 Muntu yina ke lakisaka kiminu na Mwana ke na luzingu ya ntangu nyonso. Muntu yina ke tumamaka ve na Mwana ke kuzwa ve luzingu, kasi nkele ya Nzambi ke vanda na zulu ya yandi.
Banote
^ Na Greke: “Samu ba ngala ve mavanga ya yandi.”
^ Na Greke: “Me tula kidimbu ya yandi na zulu ya yawu.”
