Nsangu ya Mbote ya Yoane 4:1-54
4 Ntangu Yesu* kwizaka zaba ti Bafarize kuwaka ti yandi vanda kuzwa mpe kubotika bilandi mingi kulutila Yoane,
2 (ata ti ni Yesu yandi mosi ve vanda botika, kasi ni bilandi ya yandi vanda botika),
3 yandi katukaka na Zude mpe kwendaka dyaka na Galile.
4 Kasi ya lombaka ti yandi luta na Samariya.
5 Na yawu yandi kumaka na mbanza mosi ya Samariya na nkumbu ya Sishare, pene-pene na bilanga yina Yakobi pesaka na mwana ya yandi Yozefi.
6 Ni kuna dibulu ya maza ya Yakobi vandaka. Yesu vandaka ya kulemba samu na nzyetolo mpe yandi vandaka ya kuvanda pene-pene na dibulu ya maza. Ya vandaka pene-pene na ngunga ya midi.*
7 Kento mosi ya Samariya kwizaka samu na kuteka maza. Yesu zonzaka na yandi: “Pesa munu maza ya kunwa.”
8 (Bilandi ya yandi vandaka me kwenda na mbanza samu na kusumba madya.)
9 Kasi kento ya Samariya zonzaka na yandi: “Wa’ faso nge, ata ti nge ke Zwife, nge ke na lombaka munu maza ya kunwa ata ti munu mu ke kento ya bwala ya Samariya?” (Samu Bazwife ke wisanaka ve na bantu ya Samariya.)
10 Yesu vutulaka: “Kana nge zabaka dikabu ya ofele ya Nzambi mpe nani ke muntu yina ke na zonzaka na nge, ‘Pesa munu maza ya kunwa,’ ni nge zola lomba yandi yawu mpe yandi zola pesa nge maza ya luzingu.”
11 Kento zonzaka na yandi: “Mfumu, nge ke na ata kantine samu na kuteka maza, mpe dibulu ke yinda. Na yawu, wapi kisika nge ke kuzwa maza ya luzingu yango?
12 Nge me lutila kwandi nkooko ya beto Yakobi yina pesaka beto dibulu ya maza yayi, mpe yina kunwaka maza ya yawu kintwadi na bana ya yandi mpe bibulu ya yandi?”
13 Yesu vutulaka: “Muntu nyonso yina ke kunwaka maza yayi ke kuma dyaka na nsatu ya maza.
14 Muntu yina ke kunwa maza yina mu ke pesa yandi, ke vanda dyaka ve ata fioti na nsatu ya maza. Kasi maza yina mu ke pesa yandi ke kuma na kati ya yandi mukelo* ya maza yina ke basikaka samu na kupesa luzingu ya ntangu nyonso.”
15 Kento zonzaka na yandi: “Mfumu, pesa munu maza yango, samu mu vanda dyaka ve na nsatu ya maza mpe mu banda kukwizaka dyaka ve na kisika yayi samu na kuteka maza.”
16 Yesu zonzaka na yandi: “Kwenda bokila bakala ya nge mpe beno kwiza awa.”
17 Kento vutulaka: “Mu ke ve na bakala.” Yesu zonzaka na yandi: “Nge me zonza matsyeleka na kuzonza, ‘Mu ke ve na bakala,’
18 samu nge kwelaka bambala tanu mpe muntu yina ke na vandaka na nge ntangu yayi ke ve bakala ya nge. Na mambu yango, nge me zonza matsyeleka.”
19 Kento zonzaka na Yesu: “Mfumu, mu ke na talaka ti nge ke mbikudi.
20 Bankooko ya beto sambilaka na mongo yayi, kasi beno ke zonzaka ti ni na Yeruzalemi bantu fwana kusambila.”
21 Yesu zonzaka na yandi: “Kento, kwikila munu, ngunga ke na kwizaka yina beno ke sambila ve Tata na zulu ya mongo yayi to na Yeruzalemi.
22 Beno, beno ke sambilaka yina beno zaba ve. Beto, beto ke sambilaka yina beto zaba, samu luvuukusu me banda na Bazwife.
23 Kasi ngunga ke na kwizaka, mpe ya me kuma yimeni, yina bisambidi ya tsyeleka ke sambila Tata na mpeve mpe na matsyeleka, samu ya tsyeleka, Tata ke sosaka bantu ya mutindu yayi samu na kusambila yandi.
24 Nzambi ke mpeve mpe ba yina ke sambilaka yandi me fwana kusambila yandi na mpeve mpe matsyeleka.”
25 Kento zonzaka na yandi: “Mu zaba ti Masiya ke na kwizaka, yina ba ke bokilaka Kristo. Ntangu yandi ke kwiza, yandi ke zabisa beto mambu nyonso pwelele.”
26 Yesu zonzaka na yandi: “Muntu yango ni munu yina ke na zonzaka na nge.”
27 Kaka na ntangu yina, bilandi ya yandi kumaka mpe ba pamukaka na kutala ti yandi vanda solola na kento mosi. Kasi ata muntu fungulaka yinwa na kuzonza: “Yinki nge ke na sosaka?” to “Samu na yinki nge ke na sololaka na yandi?”
28 Na yawu kento bikaka diyuki ya yandi ya maza, kwendaka na mbanza mpe zonzaka na bantu:
29 “Beno kwiza tala muntu mosi yina me zonza na munu mambu nyonso yina mu salaka. Ya lenda vanda ve Kristo?”
30 Ba basikaka na mbanza mpe ba kwizaka na sika ya Yesu.
31 Na ntangu yina, bilandi vanda bika ve kuzonza na Yesu: “Mfumu, kudya.”
32 Kasi Yesu zonzaka na bawu: “Mu ke na madya yina beno me zaba ve.”
33 Na yawu bilandi vanda zonza bawu na bawu: “Ya ke kwandi na muntu yina me natina yandi madya awa?”
34 Yesu zonzaka na bawu: “Madya ya munu ni kusala luzolo ya muntu yina filisaka munu, mpe kumanisa kisalu ya yandi.
35 Beno ke zonzaka kwandi ve ti ya me bikana bangonda yiya tekila ntangu ya kubuka bambuma kuma? Beno tala, mu ke na zonzaka na beno: Beno nanguna meso, mpe beno tala bilanga. Ya me yela mpe ntangu ya kubuka bambuma me kuma.
36 Ntangu yayi, muntu yina ke bukaka bambuma ke na kuzwaka difuta, mpe ke na vukisaka bambuma samu na luzingu ya ntangu nyonso, samu muntu yina ke kundaka mpe muntu yina ke bukaka bambuma yangalala kintwadi.
37 Na yina me tadila mambu yayi, nzonzolo yayi ke ya tsyeleka: Muntu mosi ke kundaka mpe ya nkaka ke bukaka bambuma.
38 Mu filisaka beno na kubuka bambuma yina beno kundaka ve. Bantu ya nkaka talaka mpasi, mpe beno me kuzwa bambuma ya mbote na kisalu ya bawu ya ngolo.”
39 Bantu mingi ya Samariya, ya mbanza yina, kwikilaka na yandi samu na mambu yina kento yina pesaka kimbangi zonzaka: “Yandi me zonzila munu mambu nyonso yina mu salaka.”
40 Na yawu, ntangu bantu ya Samariya kwizaka na sika ya yandi, ba lombaka yandi na kubikana na bawu, mpe yandi bikanaka kuna bilumbu zole.
41 Ya salaka ti bantu mingi ya nkaka kwikila samu na mambu yina Yesu zonzaka,
42 mpe ba zonzaka na kento yango: “Beto ke dyaka ve na kwikilaka kaka samu na mambu yina nge zonzaka, samu beto mosi beto me kuwa mpe beto zaba ti ya tsyeleka muntu yayi ke muvuukisi ya yinza.”
43 Na manima ya bilumbu zole yina, yandi katukaka kuna mpe kwendaka na Galile.
44 Yesu yandi mosi zonzaka ti ba ke zitisaka ve mbikudi na bwala ya yandi mosi.
45 Na yawu ntangu yandi kumaka na Galile, bantu ya Galile yambaka yandi samu ba talaka mambu nyonso yina yandi salaka na Yeruzalemi na mukembo, samu bawu mpe kwendaka na mukembo.
46 Na manima yandi kwizaka dyaka na bwala ya Kana na Galile, kisika yina yandi balulaka maza na vinu. Ntyo na Kapenawume, ya vandaka na kisadi mosi ya mfumu, yina mwana ya yandi vanda beela.
47 Ntangu bakala yango kuwaka ti Yesu me katuka na Zude samu na kukwiza na Galile, yandi kwendaka na sika ya Yesu, mpe lombaka yandi na kukwiza na Kapenawume mpe kubelusa mwana ya yandi, samu mwana ya yandi vandaka ve ntama na lufwa.
48 Kasi Yesu zonzaka na yandi: “Kana beno tala ve bimangu mpe mambu ya ngitukulu, beno ke kwikila ata fioti ve.”
49 Kisadi ya mfumu zonzaka na Yesu: “Mfumu, kwiza na munu tekila mwa mwana ya munu kufwa.”
50 Yesu zonzaka na yandi: “Kwenda ya nge, mwana ya nge ke moyo.” Muntu yango kwikilaka na mambu yina Yesu zonzaka na yandi mpe yandi kwendaka.
51 Ntangu yandi vanda kwenda na yinzo ya yandi, bisadi ya yandi bwabanaka yandi mpe zonzaka na yandi ti mwana ya yandi ya bakala vandaka moyo.*
52 Na yawu, yandi yufulaka bawu na wapi ngunga yandi kumaka mbote. Ba vutulaka: “Fievre ya yandi manisaka mazono na ngunga ya ntete na manima ya midi.”*
53 Na yawu tata kwizaka zaba ti ya vandaka ni na ngunga yina Yesu zonzaka na yandi: “Mwana ya nge ke moyo.” Yandi na bantu nyonso ya yinzo ya yandi kumaka bandimi.
54 Yayi vandaka ni kimangu ya zole yina Yesu salaka ntangu yandi katukaka na Zude samu na kukwenda na Galile.
Banote
^ Na Greke: “Mfumu.”
^ Na Greke: “Pene-pene na ngunga ya 6.”
^ Ya kele kisika yina ke basisaka maza.
^ To: “Me beluka.”
^ Na Greke: “Ngunga ya 7.”
