Bambangi ya Yehova yikua nge mezaba? Bayankaka kati na beto lenda vuanda bampangi ya nge ya kartye, to bankundi ya nge ya kisalu to ya lukolo. To beto mesololaka na nge masolo ya Biblia. Na matsyeleka, beto kele banani, mpe samu na yinki beto ketubilaka bantu nyonso mambu yina beto kendiminaka?

Beto kele kaka mutindu bantu nyonso. Beto kele bantu ya buala mutindu na mutindu, bamputu na bamvuama. Bayankaka kati na beto bavuandaka na mabundu ya nkaka, mpe bayankaka vuandaka ndimina Nzambi ve. Kansi, mosimosi na kati na beto tadilaka ntete yandi mosi malongi ya Biblia mbotembote. (Bisalu 17:11) Beto ndimaka mambu yina beto longukaka, mpe na manima, mosimosi na beto solaka kusambila Yehova Nzambi.

Kulonguka Biblia kenatinaka beto mambote. Beto mpe kekutanaka na mambu ya mpasi, mpe beto kevuandaka na mambu yina kekuamisaka beto mutindu bantu nyonso. Kansi, mutindu beto kesalaka ngolo na kusadila malongi ya Biblia na luzingu ya beto ya kilumbu na kilumbu, yau mebongisa mingi luzingu ya beto. (Nkunga 128:1, 2) Ya kele mpe mosi ya mambu yina ketumisaka beto beto tubila bayankaka mambu ya mbote yina beto melonguka na Biblia.

Beto kelandaka minsiku ya Nzambi na luzingu na beto. Minsiku yina Biblia kelongaka yau kesadisaka beto beto zinga mbote, kuzitisa bayankaka mpe beto lakisa bandiatulu mutindu kukuikama mpe bumbote. Bandiatulu yango kesadisaka beto na kuvuanda na mavimpi ya mbote, beto vuanda bantu yina mezaba kusala kisalu mbotembote, mpe beto vuanda na bumosi na dibuta mpe na bandiatulu ya mbote. Mutindu beto kendimaka ti ‘Nzambi kesolaka na meso ve,’ yau yina beto kele tsyeleka dibuta ya bampangi yina mekatuka na yinza ya mvimba. Beto kele ya kukabuka ve samu na makanda to na politiki. Ata ti beto kele kaka mutindu bantu nyonso, beto kele dibuta mosi yina mefuanana na dibuta ya nkaka ve na yinza ya mvimba.​—Bisalu 4:13; 10:34, 35.

• Na wapi mambu Bambangi ya Yehova kele mutindu bantu yankaka?

• Wapi bandiatulu Bambangi ya Yehova kele na yau yina bamelonguka na Biblia?