KILESO 18
Wapi mutindu beto kesadisaka bampangi ya beto na ntangu ya mpasi?
République dominicaine
Japon
Haïti
Ntangu mambu ya mpasi mekubua, Bambangi ya Yehova kekubikaka mbala mosi lusalusu samu na kusadisa bampangi ya bau yina mebuila mpasi. Kusala mutindu yina kelakisaka ti bakezolanaka mingi. (Yoane 13:34, 35; 1 Yoane 3:17, 18) Wapi mutindu beto kepesaka lusalusu yango?
Beto kepesaka makabu ya mbongo. Ntangu nsatu mosi ya ngolo builaka bampangi ya Yudea, baklisto ya Antiokia fidisaka bau mbongo. (Bisalu 11:27-30) Mutindu mosi mpe, ntangu beto kekuwaka ti bampangi ya beto ya buala mosi bakele na mpasi, beto kefidisaka makabu ya mbongo na nzila ya kimvuka samu na kusadisa bayina kele na nsatu ya lusalusu.—2 Bakorinto 8:13-15.
Beto kepesaka lusalusu yina mefuana. Bakuluntu yina kele kisika mambu ya mpasi mesalamina bakesosaka kuzaba kisika mpangi mosimosi ya kimvuka kele mpe wapi mutindu yandi kele. Komite ya lusalusu lenda tuadisa kisalu ya kukabula madia, maza ya kuvedila samu na kunua, bilele, bisika ya kulala, mpe lusalusu ya munganga. Bambangi mingi yina mezaba bisalu ya mutindu na mutindu bakefutaka bau mosi tike samu na kukuenda na bisika yango, samu na kusadisa bampangi yina mezua mpasi, to kubongisa bayinzo mpe Bayinzo ya Kimfumu yina mebeba. Mutindu beto kevuandaka na bumosi mpe beto memesanaka kusala kintuadi, yau kesadisaka beto na kubongisa bima ya kupesa lusalusu mbangumbangu. Ata beto kesadisaka ntetentete ‘bampangi ya beto na kati ya kiminu,’ beto kesadisaka diaka bantu ya nkaka, yavuanda wapi dibundu, kana diluaku kele.—Bagalate 6:10.
Beto kekindisaka bantu na nzila ya Biblia. Bantu yina mambu ya mpasi mebuila bakevuandaka mingimingi na nsatu ya lukindusu. Na ntangu ya mutindu yina, beto kebakaka ngolo na Yehova, ‘Nzambi ya lukindusu nyonso.’ (2 Bakorinto 1:3, 4) Beto keyangalalaka mingi kuzabisa bantu yina kele na mpasi bivuvu yina Biblia mepesa, mpe diaka ti Kimfumu ya Nzambi kemanisa mambu nyonso yina kena kusala bantu mpasi.—Luzabusu 21:4.
-
Samu na yinki Bambangi kezingilaka ve na kupesa lusalusu ntangu mambu ya mpasi mekubua?
-
Wapi mutindu beto kesadilaka Biblia samu na kukindisa bayina mevuka na mambu ya mpasi?
