Na bizizi ya mua mukanda yayi, nge metala mutindu beto Bambangi ya Yehova beto kevuataka mbote na balukutakanu ya beto? Samu na yinki beto keyidikaka mvuatulu ya beto mpe beto kebongisaka nzutu mutindu yina?

Samu na kuzitisa Nzambi ya beto. Yau kele diambu ya kedika ti Nzambi ketulaka meso mingi na ntima ya muntu kuluta mutindu yandi kena kutalanaka na meso ya bantu. (1 Samuele 16:7) Kansi, ntangu beto kekutakanaka samu na kusambila yandi, beto kevuandaka na nsatu ya ngolo ya kulakisa ti beto kezitisaka Nzambi mpe bampangi ya beto. Na kifuani, kana beto mezola kukutana na mfumu mosi, beto kevuataka mbote samu na kulakisa ti beto kena pesa yandi buzitu. Mutindu mosi mpe, mvuatulu mpe kubongisa nzutu na balukutakanu yau kelakisaka ti beto kena zitisa Yehova Nzambi, Mfumu “ya bantu nyonso,” mpe beto kena zitisa kisika yina beto kesambilaka yandi.​—Kubanda 18:25.

Samu na kulakisa ti beto kesadilaka tsyeleka malongi ya beto. Biblia mekindisa baklisto ‘bavuata na kukondua lulendo mpe bavuanda na mabanza ya mbote’ mutindu bantu yina ‘kezitisaka Nzambi.’ (1 Timote 2:9, 10) Kuvuata ‘na kukondua lulendo’ zola tuba kumanga kubenda meso ya bantu na kutala nge samu nge mevuata bilele samu na kukizangula, to bilele yina kena kuvumbula bansatu ya nzutu, to yina mebika bitini ya nzutu na nganda. Mpe, ‘kuvuanda na mabanza ya mbote’ kesadisaka beto na kuzaba kusola bilele yina kele ya mbote, kansi yina ve kele mpambampamba to ya mvuanzi. Kansi malongi yango mebikila muntu na muntu kipuanza ya kusola bilele yandi mezola. Yavuanda ata beto kena samuna ve, mvuatulu na beto ya mbote mpe yina mebonga lenda ‘pesa lukumu na malongi ya Mvuluzi na beto’ mpe ‘kupesa Nzambi nkembo.’ (Tite 2:10; 1 Piere 2:12) Kana beto kena vuata mbote na balukutakanu na beto, yau ketinda bayankaka bayangalala na nsambudulu ya Yehova.

Kubika ve bilele yau nimina nge kukutakana na Yinzo ya Kimfumu. Yau melombama ve nge vuata bilele ya ntalu to ya kitoko mingi samu nge basika kitoko mpe nge talana ya kuvedila na meso ya bantu.

• Samu na yinki yau kele mfunu beto vuataka mbote ntangu beto kena sambila Nzambi?

• Wapi dilongi ya Biblia beto kelandaka na diambu metala mvuatulu mpe kubongisa nzutu?