Bamvula mingi zingilaka, Bambangi ya Yehova vuandaka sadila, kubasisa na masini mpe kukabula bambangudulu ya Biblia mutindu na mutindu. Kansi beto kuizaka tala ti fuana basisa mbangudulu mosi ya Biblia yina kesadisa bantu babaka ‘nzayilu ya sikisiki ya kedika,’ mutindu Nzambi mezodila samu na muntu nyonso. (1 Timote 2:3, 4) Yau yina na mvula ya 1950, beto bandaka kubasisa bitini ya Biblia Mbalula ya Nsi-Ntoto ya Mpa, na Anglais ya nzonzolo ya bilumbu ya beto. Biblia yango bamebangula yau na kukuikama mpe busikisiki na bandinga kuluta 130.

Yau lombamaka kubasisa Biblia mosi na nzonzolo ya pete. Bandinga bantu ketubaka kekuizaka suasakana na manima ya bilumbu, mpe bambangudulu mingi ya Biblia kesadilaka nzonzolo ya ntama, to yina basisaka mbotembote ve bangindu. Mpe, bamaniskri ya ntama ya Biblia yina mefuanana tsyeleka na mikanda ya mbandukulu mpe yina basonikaka mua fioti na manima ya yina ya mbandukulu yakuizaka talana. Yau sadisaka bantu bazaba mingi kuluta ndinga ya Ebreo, Arameye mpe ya Greki yina basonikaka Biblia na mbandukulu.

Yau lombamaka mbangudulu mosi yina kele na nguisani tsyeleka na Mpova ya Nzambi. Na kisika ya kubuela to kukatula mambu ya nkaka na masonukua ya Nzambi, bambangudi ya Biblia fuana basisa ni na kukuikama nyonso bangindu ya masonukua ya mbandukulu. Kansi, na bambangudulu mingi ya Masonukua ya longo, nkumbu ya Nzambi, Yehova, kele ve.

Yalombamaka kubasisa Biblia mosi yina kepesa Mfumu na yau lukumu. (2 Samuele 23:2) Biblia Mbalula ya Nsi-Ntoto ya Mpa mevutula nkumbu Yehova lenda vuanda mbala 7000 na bisika yina yavuandaka na bamaniskri ya ntama ya Biblia, mutindu kifuani yayi na yinsi melakisa yau. (Nkunga 83:18, NW) Bambangudi ya Biblia Mbalula ya Nsi-Ntoto ya Mpa basosasosaka bamvula mingi samu na kubasisa mbangudulu yina kepesaka kilengi na kutanga mpe kebasisaka mbotembote bangindu ya Nzambi. Yau vuanda nge kele na Biblia Mbalula ya Nsi-Ntoto ya Mpa na ndinga nge ketubaka to ve, beto mekindisa nge nge tangaka Mpova ya Yehova kilumbu na kilumbu.​—Yosua 1:8; Nkunga 1:2, 3.

• Samu na yinki beto talaka ti beto fuana basisa mbangudulu mosi ya malumalu ya Biblia?

• Wapi diambu muntu yina kena nsatu ya kulonguka luzolo ya Nzambi fuana sala kilumbu na kilumbu?