Bantu mingi kekanisaka ti Bambangi ya Yehova kele nkumbu ya dibundu mosi ya malumalu. Kansi, bamvula kuluta 2 700, Nzambi ya kedika bokilaka bisadi na yandi “bambangi.” (Izaya 43:10-12) Tii na mvula 1931, bavuandaka bokila beto Balonguki ya Biblia. Kansi, samu na yinki bakumaka kubokila beto Bambangi ya Yehova?

Nkumbu yango kelakisaka nani kele Nzambi ya beto. Na bamaniskri ya ntama ya Biblia, nkumbu ya Nzambi, Yehova, ketalanaka mbala 7000, lenda fuana. Na bambangudulu mingi ya Biblia, na kisika ya nkumbu yango, bametulaka ni batitre, na kifuani Mfumu to Nzambi. Kansi, Nzambi ya kedika talanaka yandi mosi na Moize na nkumbu na yandi ya matsyeleka, Yehova, mpe yandi tubaka mutindu yayi: “Yina kele nkumbu ya munu samu na mvula na mvula.” (Kubasika 3:15, NW) Na mutindu yina, yandi kikusuasikisaka na banzambi nyonso ya nkaka ya luvunu. Kubokila beto na nkumbu ya santu ya Nzambi kele lukumu samu na beto.

Nkumbu yango kelakisaka wapi yina kele kisalu ya beto. Kubanda na Abele, muntu ya kukuikama, yau kele na mulonga ya yinda ya bantu ya ntama bayina samunaka ti bau kendiminaka Yehova. Na manima ya bamvula, Noa, Abrahami, Sara, Moize, Davidi, mpe bantu ya nkaka kotaka na mulonga ya ‘dituti ya nene ya bambangi.’ (Baebre 11:4–12:1) Mutindu muntu kepesaka kimbangi na tribinale samu na muntu yina kele na diambu ve, beto mpe beto kele na luzolo ya kutubila bantu kedika metala Nzambi.

Beto kelandaka kifuani ya Yesu. Na Biblia, bakebokilaka Yesu “temwe ya kieleka.” (Luzabusu 3:14) Yesu tubaka yandi mosi ti yandi ‘zabisaka nkumbu ya Nzambi’ mpe yandi ‘pesaka’ ntangu nyonso ‘kimbangi samu na kedika’ metadila Nzambi. (Yoane 17:26; 18:37) Yau yina balongoki ya kedikakedika ya Klisto bamefuana kubaka nkumbu ya Yehova mpe kuzabisa bantu nkumbu yango. Yau yina diambu Bambangi ya Yehova kesalaka ngolo na kusadila yau.

• Samu na yinki Balongoki ya Biblia mekumaka na nkumbu Bambangi ya Yehova?

• Kubanda wapi ntangu Yehova kele na bambangi awa na ntoto?

• Nani kele Mbangi ya Yehova yina meluta bambangi nyonso?