1, 2. Samu na yinki lusambu ke bweso ya nene? Samu na yinki beto ke sosa kuzaba yina Bibila ke zonza na faso ya kusambila?

NTOTO ke talana fioti na mantwala ya ba-etwale. Na meso ya Yehova, bayinsi nyonso ya yinza ke mutindu mwa ndambu ya maza na kati ya ndonga. (Nkunga 115:15; Izaya 40:15) Ata beto me lutila fioti na ba-etwale, Nkunga 145:18, 19 ke zonza: “Yehova ke pene-pene ya bantu yina ke bokila yandi, bantu nyonso yina ke bokila yandi na butsyeleka. Yandi ke lungisa bansatu ya ba yina ke zitisa yandi, yandi ke kuwa bidilu ya bawu, ke sadisa bawu mpe ke vuukisa bawu.” Lusambu ke bweso ya nene yina ba me pesa beto! Yehova Muntu-me-Lutila-Ngolo, Muntu-yidika-bima-nyonso, me zola kukuma ndiku ya beto, mpe yandi ke zola kuwa lusambu ya beto. Ya tsyeleka, lusambu ke bweso ya nene, dikabu yina Yehova me pesa na mosi na mosi na beto.

² Kasi Yehova ke kuwa lusambu ya beto, kaka ntangu beto ke sambila yandi mutindu yandi ke zolaka. Na yina, yinki beto lenda sala? Biblia ke longa beto faso ya mbote ya kusambila.

3. Samu na yinki nge zola sambila Yehova?

³ Yehova me zola ti nge sambila yandi. Wapi faso beto me zaba yawu? Tanga Bafilipi 4:6, 7. Kanisa na bweso yayi: Nzambi yina yidika bima nyonso me zola nge mingi, mpe yandi zola ti nge zonzila yandi mambu nyonso ke na nge na ntima, to yina ke kwamisa nge.

4. Wapi faso kifu ya kusambila Yehova ntangu nyonso ke kulisa kindiku ya nge na yandi?

 ⁴ Lusambu ke sadisa beto na kutunga kindiku ya mbote na Yehova. Ntangu bandiku ke solola mingi, kindiku ya bawu ke kuma ngolo. Ya ke mpe mutindu mosi ntangu beto ke sambila Yehova. Na Biblia, yandi me zonzila beto makanisi ya yandi, mpe mambu yina yandi ke sala na bilumbu yina ke kwiza. Nge lenda zonzila yandi ntangu nyonso, mambu yina ke na ntima ya nge. Si nge sala yawu, kindiku ya nge na Yehova ke kula.​—Zaki 4:8.

5. Wapi faso beto me zaba ti Yehova ke kuwa ve lusambu nyonso?

⁵ Yehova ke kuwa kwandi lusambu nyonso? Ve! Na ntangu ya profete Izaya, Yehova zonza na bana ya Izraele: “Ata beno sambila mingi, mu ke kuwa beno ve; maboko ya beno me fuluka na menga.” (Izaya 1:15) Si nge sala keba ve, nge lenda sala mambu yina ke nata nge ntama na Yehova, mpe yandi ke kuwa dyaka ve lusambu ya nge.

6. Samu na yinki kiminu ke mfunu mingi? Wapi faso nge ke lakisa ti nge ke na kiminu?

 ⁶ Samu Yehova kuwa lusambu ya beto, beto zola vanda na kiminu na yandi. (Marke 11:24) Apotre Paul zonza: “[Muntu yina ke na] kiminu ve lenda sepelisa ve Nzambi, samu ti muntu yina ke kuma pene-pene na yandi, zola kwikila ti yandi kele, mpe yandi ke kuma muntu yina ke pesa bima ya mbote na bantu yina ke sosa yandi na matsyeleka.” (Baebre 11:6) Ya me lunga kaka ve na kuzonza ti beto ke na kiminu, kasi beto zola lakisa na ndyatulu ya beto ti, beto ke sala luzolo ya Yehova ntangu nyonso.​—Tanga Zaki 2:26.

7. (a) Samu na yinki beto zola vanda ya kukuluka mpe na buzitu ntangu beto ke sambila Yehova? (b) Wapi faso beto lenda lakisa ti beto ke sambila na butsyeleka?

⁷ Beto zola vanda ya kukuluka, mpe na buzitu, ntangu beto ke sambila Yehova. Samu na yinki? Na ntangu beto ke zonza na mfumu ya luyalu, beto ke zonza na buzitu nyonso. Kasi, Yehova ke Nzambi-me-Lutila-Ngolo. Na nge, ya ke mbote na kuvanda ya kukuluka, mpe na buzitu mingi na ntangu beto ke sambila yandi? (Kubanda 17:1; Nkunga 138:6) Beto sambila yandi na butsyeleka, mpe na ntima mosi. Beto vanda ve na kifu ya kuvutukila kaka mambu mosi na kati ya lusambu.​—Matayi 6:7, 8.

8. Ntangu beto ke lomba kima na lusambu, yinki ya nkaka beto zola sala?

⁸ Ntangu beto ke lomba kima na lusambu, beto zola sala nyonso yina ke na kwelana na lusambu ya beto. Na kifwani, si beto me sambila samu na bansatu ya beto, mutindu kisalu, beto zola krwaze ve maboko; mpe beto vanda ve na bubolo na kuvingila ti Yehova sala nyonso samu na beto. Beto zola sala kisalu nyonso yina beto lenda sala. (Matayi 6:11; 2 Batesalonika 3:10) Si beto me sambila Yehova samu yandi sadisa beto na kubika disumu,  beto me lunga na kukima mambu nyonso yina ke nata beto na disumu yina. (Bakolose 3:5) Na kuzaba faso ya mbote ya kusambila, bantu ke yufula byuvu mingi. Beto zonzila yawu.

9. Nani beto zola sambila? Yinki Yoane 14:6 ke longa beto na faso ya kusambila?

⁹ Nani beto zola sambila? Yesu longa na bilandi ya yandi na kusambila kaka “Tata ya beto yina ke na mazulu.” (Matayi 6:9) Yandi zonza dyaka: “Mu ke nzila, butsyeleka, mpe luzingu. Muntu ve lenda kuma na sika ya Tata, si yandi lutila ve na munu.” (Yoane 14:6) Beto zola sambila kaka Yehova na kulutila na Yesu. Yinki zola zonza kusambila na nzila ya Yesu? Samu Yehova kuwa lusambu ya beto, beto zola zitisa munkayulu yina Yehova pesaka: Yesu. Mutindu beto longaka yawu, Yesu kwiza kuula beto na disumu mpe na lufwa. (Yoane 3:16; Baroma 5:12) Yehova tula Yesu Nganga-Nzambi ya nene mpe Juje.​—Yoane 5:22; Baebre 6:20.

10. Samu na yinki faso ya beto ya kuvandila ntangu beto ke sambila ke ve mfunu?

¹⁰ Samu na yinki faso ya beto ya kuvandila ntangu beto ke sambila ke ve mfunu? Samu ti Yehova me lomba ve na beto na kufukama, na kutelama, na kulala to na kuvanda ntangu beto ke sambilaka yandi. Yehova me zonza ve na beto faso ya kuvandila na ntangu beto ke sambila yandi. (1 Bansangu 17:16; Nehemi 8:6; Danyele 6:10; Marke 11:25) Yina ke mfunu na Yehova, ke ve faso ya beto ya kuvandila, kasi ni mutindu ntima ya beto kele ntangu beto ke na sambila. Nge lenda sambila na ngolo to na kati ya ntima, kisika nyonso, mpe ntangu nyonso. Beto vanda na kiminu tii ntangu beto ke sambila, Yehova ke kuwa beto.​—Nehemi 2:1-6.

11. Wapi bima beto lenda lomba na lusambu?

 ¹¹ Yinki beto lenda lomba na lusambu? Beto lenda lomba kima to mambu nyonso ke mbote na meso ya Yehova. Na yina, Biblia ke zonza: “Yandi ke kuwa beto, si beto lomba yandi kima yina ke ya kukwelana na luzolo ya yandi.” (1 Yoane 5:14) Na nge, beto lenda sambila samu na bansatu ya beto? Ee! Kusambila Yehova zola vanda faso mosi na kusolola na ndiku ya beto ya ntima. Beto lenda zonza na Yehova mambu nyonso ke kwizila beto na ntima. (Nkunga 62:8) Beto lenda lomba na yandi mpeve ya santu samu na kusala mambu ya mbote. (Luke 11:13) Beto lenda lomba na yandi mayela ya kubaka mukanu ya mbote, mpe ngolo ya kulemba ve na ntangu ya mpasi. (Zaki 1:5) Beto lenda lomba mulemvo ya masumu ya beto. (Baefeze 1:3, 7) Beto lenda sambila samu na bantu nyonso, bantu ya dikanda ya beto, mpe bampangi ya kimvuka ya beto.​—Bisalu 12:5; Bakolose 4:12.

12. Yinki zola baka kisika ya ntete na lusambu ya beto?

¹² Yinki zola baka kisika ya ntete na lusambu ya beto? Yehova mpe luzolo ya yandi. Beto zola tonda yandi na bima nyonso yina yandi me pesa beto. (1 Bansangu 29:10-13) Ni lusambu yina Yesu longa na bilandi ya yandi, me sadisa beto na kuzaba yawu. (Tanga Matayi 6:9-13.) Yandi zonza na bawu na kusambila ntete samu ti nkumbu ya Yehova vanda santu. Yandi zonza dyaka na bawu na kusambila samu Kimfumu ya Nzambi kwiza, mpe luzolo ya Nzambi salama na ntoto nyonso. Na manima ya kusambila samu na bima yina me lutila mfunu, beto lenda sambila samu na bansantu ya beto. Ntangu beto ke tula Yehova mpe luzolo ya yandi na mantwala ya bansatu ya beto, beto ke lakisa ti ni yandi me lutila mfunu na meso ya beto.

13. Lusambu ya beto zola vanda nkufi to yinda?

 ¹³ Lusambu ya beto zola vanda nkufi to yinda? Biblia me zonza ata kima na yawu. Ni mambu yina beto ke lomba lenda sala ti, lusambu ya beto vanda nkufi to yinda. Na kifwani, na ntangu ya kudya, lusambu ya beto zola vanda nkufi. Kasi ya lenda vanda yinda ntangu beto ke vutulaka yandi matondo, mpe ntangu beto ke fungula ntima ya beto na yandi. (1 Samuele 1:12, 15) Beto zola sala ve lusambu ya yinda samu na kutalana,  mutindu bamfumu ya mabundu na ntangu ya Yesu. (Luke 20:46, 47) Lusambu samu na kutalana ke ve mfunu na meso ya Yehova. Na meso ya yandi, ni lusambu yina ke katuka na ntima ke mfunu mingi.

14. Bambala yikwa beto zola sambila na kilumbu, mpe yinki ya ke longa beto na Yehova?

¹⁴ Bambala yikwa beto zola sambila na kilumbu? Yehova zola ti beto sambila yandi ntangu nyonso. Biblia ke zonza ti, beto zola “sambila ntangu nyonso,” “beto zola kangama na lusambu,” mpe “beto lemba ve na kusambila.” (Matayi 26:41; Baroma 12:12; 1 Batesalonika 5:17) Yehova ke sepela na kuwa lusambu ya beto. Beto zola tonda yandi bilumbu nyonso samu na luzolo ya yandi, mpe na bima yina yandi ke pesa beto. Beto zola lomba yandi na kutwadisa beto, na kupesa beto ngolo,  mpe na kupesa beto bukindi. Si beto tala lusambu mutindu bweso, mpe dikabu yina Yehova me pesa beto, beto zola sambila yandi ntangu nyonso.

15. Samu na yinki beto ke zonza “amen” na nsuka ya lusambu?

¹⁵ Samu na yinki beto ke zonza “amen” na nsuka ya lusambu? “Amen” zola zonza, “mu me ndima yawu” to “ni mutindu yina.” Ya ke lakisa ti beto me ndima ti, nyonso yina me basika na lusambu ke tsyeleka, to ya ke mutindu yina. (Nkunga 41:13) Biblia ke zonza ti, ya ke mbote na kuzonza “amen,” na ngolo to na kati ya ntima, na nsuka ya lusambu ya nge, to ya muntu ya nkaka.​—1 Bansangu 16:36; 1 Bakorinto 14:16.

16. Yehova ke pesa kwandi bamvutu na lusambu ya beto? Samu na yinki?

¹⁶ Na nge, Yehova ke pesa kwandi bamvutu na lusambu ya beto? Ee, Yandi ke pesaka! Biblia ke bokila yandi “Muntu yina ke kuwa lusambu.” (Nkunga 65:2) Yehova ke waka, mpe ke pesaka bamvutu ya mutindu na mutindu na balusambu ya tsyeleka, ya bantu mingi na yinza nyonso.

17. Wapi faso Yehova ke sadila ba-ange mpe bisadi ya yandi na kupesa bamvutu na lusambu ya beto?

¹⁷ Yehova ke sadila ba-ange mpe bisadi ya yandi samu na kupesa bamvutu na lusambu ya beto. (Baebre 1:13, 14) Na kifwani, bantu mingi vanda sambila samu na kuzaba Biblia mbote-mbote, mpe mwa ntangu fioti na manima, ba kuzwa lubakusu ya Batemwe ya Yehova. Biblia ke lakisa ti ba-ange mpe ke sadisa bantu na kisalu ya kusamuna “nsangu ya mbote” na ntoto nyonso. (Tanga Luzabusu 14:6.) Mingi mpe na kati ya beto vanda sambila samu na kima mosi to samu na bansatu ya bawu.  Na manima ya mwa ntangu fioti, ba kuzwa lubakusu ya bampangi ya kimvuka.​—Bingana 12:25; Zaki 2:16.

18. Wapi faso Yehova ke sadila mpeve ya santu, mpe Biblia samu na kupesa mvutu na lusambu ya beto?

¹⁸ Yehova ke sadila mpeve ya santu samu na kupesa bamvutu na lusambu. Na ntangu ya mpasi, yandi ke sadila mpeve ya santu na kutwadisa beto, mpe na kupesa beto ngolo. (2 Bakorinto 4:7) Yehova ke sadila mpe Biblia samu na kupesa bamvutu na lusambu ya beto, samu beto baka mikanu ya mbote. Ntangu beto ke ntanga Biblia, beto lenda kuzwa dikanisi yina lenda sadisa beto. Yehova lenda sadila mpe, bampangi na kati ya kimvuka na kupesa mvutu na lusambu ya beto. Yandi lenda sadila mpe bakuluntu, na kupesa malongi yina beto ke na yawu nsatu.​—Bagalate 6:1.

19. Samu na yinki, beto lenda kanisa ti Yehova ke ve na pesa na mbangu mvutu na lusambu ya beto?

¹⁹ Ntangu ya nkaka, beto lenda yufula: ‘Samu na yinki Yehova ke na pesa ve na mbangu mvutu na lusambu ya munu?’ Zaba ti, ni yandi me lutila kuzaba, wapi ntangu mpe wapi faso yandi ke pesa mvutu na lusambu ya nge. Yandi zaba yinki beto ke na yawu nsatu. Na yawu, beto zola lemba ve na kusambila, samu na kulakisa na Yehova kiminu ya beto na yandi. (Luke 11:5-10) Ntangu ya nkaka, Yehova ke pesa bamvutu na mutindu yina beto vanda vingila ve. Na kifwani, beto lenda sambila samu yandi katula bampasi ya beto, kasi yandi lenda sola na kupesa beto ngolo samu beto lemba ve.​—Tanga Bafilipi 4:13.

20. Samu na yinki beto zola lemba ve na kusambila?

²⁰ Kusambila Yehova ke bweso ya nene! Beto zaba ti Yehova ke waka beto. (Nkunga 145:18) Kindiku ya beto na Yehova ke kuma ngolo si beto lemba ve na kusambila yandi.