1. Wapi lusambu ya kuzabana mingi beto ke zonzila?

BANTU me zaba lusambu yina ba ke bokila ‘Tata ya beto,’ to Lusambu ya Mfumu. Yesu pesa yawu na kulonga bilandi ya yandi faso ya kusambila. Yinki yandi lombaka? Mpe samu na yinki ya ke mfunu na beto bubu yayi?

2. Yesu longa na kusambila samu na bima tatu ya mfunu. Wapi yina?

² Yesu zonza: “Beno sambila mutindu yayi: ‘Tata ya beto ya mazulu, bika nkumbu ya nge vanda [santu]. Bika kimfumu ya nge kwiza, bika luzolo ya nge [salama na ntoto mpe na zulu].’” (Tanga Matayi 6:9-13.) Samu na yinki Yesu longa na kusambila samu na bima tatu yina?​—Tala note 20 ya nsuka.

3. Yinki beto me bonga kuzaba na Kimfumu ya Nzambi?

³ Beto longaka ti nkumbu ya Nzambi ke Yehova. Mpe beto longaka yina ke luzolo ya Nzambi samu na bantu mpe samu na ntoto. Na yinki Yesu kanisa ntangu Yandi zonza: “Bika kimfumu ya nge kwiza”? Beto ke longaka yinki kimfumu ya Nzambi kele, yinki ya ke sala, mpe wapi faso ya ke kumisa nkumbu ya Nzambi santu.

4. Kimfumu ya Nzambi ke yinki, mpe nani ke Mfumu ya yawu?

⁴ Yehova salaka guvernema na zulu mpe sola Yesu na kuvanda Mfumu ya yawu. Biblia me bokila guvernema yango, kimfumu ya Nzambi. Yesu ke “Mfumu  ya bamfumu.” (1 Timote 6:15) Ata mfumu mosi lenda sala mbote kulutila Yesu. Ata ba vukisa bamfumu nyonso ya yinza, ba lenda lutila yandi ve na ngolo.

5. Guvernema ya Nzambi ke vanda wapi kisika? Na zulu ya yinki ya ke yala?

⁵ Bilumbu 40 na manima ya kuvumbuka ya yandi na lufwa, Yesu vutuka na zulu. Kuna, Yehova tula yandi Mfumu ya Kimfumu ya Nzambi. (Bisalu 2:33) Kimfumu ya Nzambi ke na zulu, kasi ya ke yala na ntoto nyonso. (Luzabusu 11:15) Na yina, Biblia ke bokila kimfumu ya Nzambi, “Kimfumu ya mazulu.”​—2 Timote 4:18.

6, 7. Samu na yinki Yesu me lutila bamfumu ya yinza yayi?

⁶ Biblia ke tuba ti Yesu me lutila bamfumu nyonso ya bantu, samu ti “kaka yandi lenda kufwa dyaka ve.” (1 Timote 6:16) Bamfumu nyonso lenda kufwa, kasi Yesu lenda kufwa ve. Bambote nyonso yina Yesu ke sala ke vanda ya ntangu nyonso.

⁷ Baprofesi ya Biblia ke zonza ti Yesu ke zola ve mayuya, mpe ke tala bantu mawa: “Mpeve ya Yehovah ke vanda na zulu ya yandi, mpeve ya ndwenga mpe ya mayela, mpeve ya malongi mpe ya ngolo, mpeve ya kubakula mambu mpe ya boma ya Yehova. Kilengi ya yandi ke vanda na kati ya boma ya Yehova. Yandi ke semba ve kaka na yina me talana na meso ya yandi, yandi ke ngala ve kaka na mambu yina yandi ke wa na makutu ya yandi. Yandi ke vanda juje ya mbote samu na bapovre.” (Izaya 11:2-4) Ya ke ve kilengi na kuvanda na mfumu ya mutindu yayi?

8. Wapi faso beto me zaba ti Yesu ke yala ve kaka yandi mosi?

⁸ Nzambi solaka ndambu ya bantu na kuyala na Yesu na guvernema ya mazulu. Na kifwani, apotre  Paul zonza na Timote: “Si beto kangama kaka, beto ke yala kintwadi na yandi.” (2 Timote 2:12) Bantu yikwa ke yala na Yesu?

9. Bantu yikwa ke yala na Yesu? Na Wapi ntangu Nzambi banda kusola bawu?

⁹ Mutindu beto tala na kikapu 7, apotre Yoane, na kimona-meso to vizion, tala Mfumu Yesu na zulu, kintwadi na bamfumu 144 000 ya nkaka. Ba nani ke ba 144 000 yina? Yoane me zonza ti, “nkumbu ya Yesu na nkumbu ya Tata ya yandi ke ya kusonama na bambunzu ya bawu.” Yandi me bwela: “Ba ke landa [Yesu] kisika nyonso yandi ke na kwenda. Ba [sumba] bawu na kati ya bantu ya yinza.” (Tanga Luzabusu 14:1, 4.) Ba 144 000 yayi ke bakristo ya kukangama yina Nzambi me sola “samu na kuyala ntoto” kintwadi na Yesu. Na lufwa ya bawu, ba ke kwenda mbala mosi na zulu. (Luzabusu 5:10) Banda ntangu ya ba-apotre, Yehova ke na sola bakristo ya kukangama na kuvanda na kimvuka ya bamfumu 144 000.

10. Yehova me sola Yesu na ba 144 000 na kuyala. Na yinki ya me lakisa luzolo ya yandi?

¹⁰ Samu Yehova me zola beto mingi, yandi me sola bantu na ntoto na kuyala na Yesu. Yesu ke vanda mfumu ya mbote samu ti, yandi me zaba beto mbote-mbote, mpe me zaba yinki zola zonza kuvanda na nzutu ya kinsuni mpe kutala mpasi. Paul zonza ti, Yesu me zaba bampasi ya beto, “Yandi ke tala beto mawa samu na bamambu yina ke lembisa beto,” samu ti “yandi mosi mpe mekaka bampasi yango.” (Baebre 4:15; 5:8) Ba 144 000 mpe me zaba mpasi ya kuvanda muntu. Ba nwanaka na disumu mpe bimbevo. Ntembe ve, Yesu na ba 144000 me zaba ve kaka  bampasi ya beto, kasi ba me zaba mpe ba mambu yina ke kwamisa beto.

11. Samu na yinki Yesu longa bilandi ya yandi ba sambila samu luzolo ya Nzambi salama na zulu?

¹¹ Yesu longa na bilandi ya yandi na kusambila samu luzolo ya Nzambi salama na zulu. Samu na yinki? Na kikapu 3, beto longaka ti Satana Dyabulu, balukila Yehova. Na manima, Yehova bika Satana na bilandi ya yandi, bademon, ba zinga mwa ntangu fioti na zulu. Na ntangu yina, beto lenda zonza ti ba-ange nyonso ve na zulu vanda sala luzolo ya Yehova. Na kikapu 10, beto ke longaka mambu mingi yina me tadila Satana na bademon.

12. Wapi bamambu zole ya mfunu yina Luzabusu 12:10 ke zonzilaka?

¹² Beto ke tanga na Biblia ti, ntangu Yesu kuma mfumu ya Kimfumu ya Nzambi, yandi nwana na Satana. (Tanga Luzabusu 12:7-10.) Verse 10 ke zonzila mambu zole ya mfunu mingi. Ya ntete, Yesu banda na kuyala na Kimfumu ya mazulu, ya zole yandi losa Satana na bademon na ntoto. Beto ke longaka na mantwala ti mambu yango salamaka.

13. Yinki salama na zulu ntangu ba losa Satana na ntoto?

¹³ Biblia ke zonzila kilengi yina ba-ange tala na zulu, ntangu Yesu losa Satana na bilandi ya yandi na ntoto. Beto ke tanga: “Beno [sepela], mazulu mpe beno nyonso yina ke zinga kuna!” (Luzabusu 12:12) Kizunu na bumosi, me kuma na zulu samu ti ba-ange nyonso ke na sala luzolo ya Yehova.

14. Yinki kumina bantu ntangu ba losa Satana na ntoto?

¹⁴ Kasi luzingu ke faso ya nkaka na ntoto. Mambu  ya yimbi ke na kuma mingi, “samu ti Satana me kwiza na ntoto,” mpe yandi [ke] na nkele ya kulutila, samu ti yandi me zaba ti kaka ntangu fioti me bikana na yandi.” (Luzabusu 12:12) Satana ke ya kufuluka na nkele. Ba bingisa yandi na zulu, mpe yandi me zaba ti mwa ntagu fioti kaka me bikana, avant ba kufwa yandi. Na yina, yandi ke na sala muvusu, ke na kwamisa bantu, mpe ke na tadisa bawu mpasi.

15. Yinki ke luzolo ya Nzambi samu na ntoto?

¹⁵ Kasi luzolo ya Nzambi samu na ntoto, me soba ve. Tii bubu yayi, Yandi ke zola kaka ti bantu ya kulunga zinga ntangu nyonso na paradis, awa na ntoto. (Nkunga 37:29) Wapi faso Kimfumu ya Nzambi ke sala ti luzolo ya yandi salama?

16, 17. Danyele 2:44 ke zonza yinki samu na Kimfumu ya Nzambi?

¹⁶ Biblia ke zonza na Danyele 2:44: “Na bilumbu ya ba mfumu yina, Nzambi ya zulu ke tula kimfumu yina ke kufwa ata fioti ve. Kimfumu yina ke kwenda ve na bantu ya nkaka. [Ya ke mwangisa] mpe ke sukisa bimfumu yina nyonso, mpe kaka yawu ke bikana [ntangu nyonso].” Baprofesi yayi ke longa beto yinki na kimfumu ya Nzambi?

¹⁷ Ya ntete, ya ke longa beto ti Kimfumu ya Nzambi ke banda kuyala “na bilumbu ya ba mfumu yina.” Ya ke lakisa ti Kimfumu yango ke banda kuyala ntangu yina baguvernema ya nkaka ke ntete na kuyala na ntoto. Ya zole, ya ke lakisa ti kaka Kimfumu ya Nzambi ke yala ya ntangu nyonso, mpe ata guvernema lenda katula yawu. Ya tatu, Kimfumu ya Nzambi ke nwana guerre na ba guvernema nyonso ya ntoto. Na manima, ya ke nunga, mpe kaka yawu ke yala ntoto  nyonso. Ni kuna, guvernema ya Nzambi ke yala mbote na zulu ya bantu kulutila baguvernema ya bubu yayi.

18. Nkumbu ya guerre yina kimfumu ya Nzambi ke nwana na biMfumu ya yinza ke yinki?

¹⁸ Wapi faso Kimfumu ya Nzambi ke baka luyalu ya ntoto? Avant guerre ya nsuka, yina ba ke bokilaka Armagedon, bademon ke vuna “bamfumu nyonso ya yinza samu na kuvukisa bawu kisika mosi na kunwana [guerre] ya nene ya Nzambi, Muntu-ya-Ngolo-Nyonso.” Ntembe ve, baguvernema ya bantu ke nwana na Kimfumu ya Nzambi.​—Luzabusu 16:14, 16; tala note 10 ya nsuka.

19, 20. Samu na yinki beto ke na nsatu ti Kimfumu ya Nzambi yala ntoto nyonso?

¹⁹ Samu na yinki beto ke na nsatu ya Kimfumu ya Nzambi? Samu na bima tatu. Ya ntete, beto ke bantu ya masumu, beto ke bela mpe ke fwaka. Ntangu Kimfumu ya Nzambi ke yala, beto ke zinga ntangu nyonso. Na Yoane 3:16 beto ke tanga: “Nzambi zola mingi bantu, ni yina, yandi filisa mwana ya yandi ya kubutuka kaka mosi, samu ti muntu [nyonso yina] ke tula kiminu na yandi, kufwa ve, kasi yandi kuzwa luzingu ya ntangu nyonso.”

²⁰ Ya zole, ntoto me fuluka na bantu ya yimbi. Bantu ke vuna, ke laba, ke sala bunsuza ya mutindu na mutindu. Beto ke ve na ngolo ya kukatula bawu, na bamambu ya yimbi. Kasi ni Nzambi muntu ke na ngolo yina. Ba yina ke bika ve kusala yimbi ke kufwa na Armagedon. (Tanga Nkunga 37:10.) Ya tatu, baguvernema ya bantu ke ve na ngolo, ba ke na ntima ya yimbi mpe ba zola madeso-ya-bana. Ba ke  sadisa ve bantu na kusala luzolo ya Nzambi. Na yina Biblia ke zonza: “Muntu ke yala mpangi muntu samu na kutadisa yandi mpasi.”​—Longi 8:9.

21. Wapi faso Kimfumu ya Nzambi ke lungisa luzolo ya yandi?

²¹ Na manima ya Armagedon, Kimfumu ya Nzambi ke sala ti luzolo ya yandi salama na ntoto. Na kifwani, Yandi ke katula Satana na bademon ya yandi. (Luzabusu 20:1-3) Ata muntu mosi ke bela to ke kufwa dyaka. Mosi ya bambote yina munkayulu ke nata kele, bantu nyonso ya kukangama na Nzambi ke zinga na Paradis. (Luzabusu 22:1-3) Kimfumu ke kumisa santu, ke sukula nkumbu ya Nzambi. Yinki ya zola zonza? Ya zola zonza ti, ntangu Kimfumu ya Nzambi ke yala ntoto, bantu nyonso ke zitisa nkumbu ya Yehova.​—Tala note 21 ya nsuka.

22. Wapi faso beto me zaba ti, Yesu kuma ve mfumu ntangu yandi vanda na ntoto, to mbala mosi ve ntangu yandi kuma na zulu?

²² Yesu longa bilandi ya yandi na kusambila mutindu yayi: “Bika Kimfumu ya nge kwiza.” Ya tsyeleka, Kimfumu ya Nzambi ke kwiza na bilumbu ya mantwala. Yehova ke tula ntete Kimfumu ya yandi mpe  ke tula Yesu Mfumu ya yawu. Beto lenda zonza ti, Yesu bakaka kimfumu mbala mosi ntangu yandi vutuka na zulu? Ve, yandi vingila mwa fioti. Na manima ya yandi, ba-apotre Piere na Paul zonza ti profesi ya Nkunga 110:1 lungana na Yesu. Na profesi yango Yehova me zonza: ‘Vanda na diboko ya munu ya bakala tii ntangu mu ke tula ba-enemi ya nge na yisi ya makulu ya nge mutindu tapi.’ (Bisalu 2:32-35; Baebre 10:12, 13) Bantangu yikwa Yesu zola vingila kimfumu yango?

23. (a) Na wapi ntangu Yesu banda kuyala na guvernema ya Nzambi? (b) Yinki beto ke longaka na kikapu yina ke landa?

²³ Avant 1914, bakristo ya tsyeleka bakula ti, mvula yina ke vanda mfunu mingi na kulungana ya profesi ya Biblia. Bamambu yina me salama banda 1914 me lakisa ti baprofesi yango vanda ya tsyeleka. Ni na mvula yina Yesu banda kuyala mutindu Mfumu na zulu. (Nkunga 110:2) Na manima, Yesu losa Satana na ntoto, mpe bubu yayi, “kaka ntangu fioti me bikana na yandi.” (Luzabusu 12:12) Kikapu yina ke landa, ke lakisa beto pwelele ti beto ke na zinga na bantangu yango. Beto ke longaka mpe ti, ntangu fioti kaka me bikana, Kimfumu ya Nzambi ke sala ti luzolo ya yandi salama na ntoto nyonso.​—Tala note 22 ya nsuka.