1, 2. Na wapi kisika beto lenda bumbama bubu yayi?

KANISA na dyambu yayi: nge ke ntama na yinzo, mpe zulu me kuma ndombe. Zulu ke na duma, mupepe ya ngolo ke na sala, mpe mvula me banda kunoka. Nge ke na kuzwa ve kisika ya kubumbama. Na manima, nge me kuzwa yawu. Kanisa na kilengi ya ke sala nge!

² Bubu yayi mpe, beto ke mutindu muntu yina. Bamambu ke na lutila kubeba na yinza. Nge lenda yufula, ‘Wapi kisika mu lenda bumbama?’ Mosi ya ba yina sonika buku ya Bankunga, zonza: “Mu ke zonza na Yehova: ‘Mu ke bumbama na kisika ya nge ya ngolo, Nzambi ya munu yina mu me tula ntima.’” (Nkunga 91:2) Ya tsyeleka, Yehova lenda sadisa beto na mambu nyonso yina ke kumina beto, mpe yandi me pesa beto kivuvu ya mbote samu na bilumbu ke kwiza.

3. Yinki beto lenda sala samu Yehova kuma kisika yina beto lenda bumbama?

³ Wapi faso Yehova lenda bumba beto? Yandi lenda sadisa beto na mambu nyonso ke kwamisa beto, samu ti yandi ke muntu yina me lutila ngolo. Na yina, ata mambu ya yimbi kumina beto bubu yayi, beto zaba ti na mantwala, yandi ke katula yawu. Biblia ke zonza na beto: “Beno kangama na luzolo ya Nzambi.” (Yude 21, nwt-MK) Beto vanda pene-pene na Yehova, samu yandi ke sadisa beto na ntangu ya mpasi. Kasi, wapi faso beto lenda kuma pene-pene na Nzambi?

4, 5. Wapi faso Yehova ke lakisaka luzolo ya yandi na beto?

⁴ Si beto kangama na luzolo ya Yehova, beto zaba ti yandi ke zola beto mingi. Kanisa na nyonso yina Yehova ke sala samu na beto. Yandi pesa beto ntoto ya kitoko, yina me fuluka na bima ya kitoko, mutindu bayinti na bibulu. Yandi me pesa dyaka beto bima ya kitoko ya kudya, mpe maza ya kunwa. Na kati ya Biblia, yandi me lakisa beto nkumbu ya yandi na bifu ya yandi ya mbote. Na makabu nyonso yina yandi pesa beto, yina me lutila mfunu, ni ntangu yandi filisa Mwana ya yandi yina yandi ke zola mingi: Yesu, samu na kupesa luzingu ya yandi samu na beto. (Yoane 3:16) Munkayulu ya Yesu me pesa beto kivuvu ya mbote samu na bilumbu ya mantwala.

⁵ Na kukatula bampasi nyonso, Yehova tula Yesu Mfumu ya Kimfumu ya mazulu. Kimfumu yango ke kumisa ntoto nyonso paradis, kisika yina muntu nyonso ke zinga na kizunu, mpe na nsayi. (Nkunga 37:29) Yehova ke lakisaka dyaka luzolo ya yandi na beto, ntangu yandi ke longaka beto. Yandi me pesa beto bweso ya kusambila yandi samu ti yandi ke zolaka kuwa lusambu ya beto. Yandi ke lakisaka luzolo yango pwelele.

6. Wapi faso nge lenda lakisa luzolo ya nge na Yehova?

⁶ Yinki nge lenda pesa na Yehova na luzolo ya yandi samu na nge? Pesa yandi matondo na nyonso yina yandi me sala samu na nge. Kasi bubu yayi, bantu mingi ke vutula ve yandi matondo. Mingi mpe, vanda faso yina na ntangu ya Yesu. Kilumbu mosi, Yesu belusa bantu 10 yina vanda na lepre, kasi mosi kaka na bawu vutula yandi matondo. (Luke 17:12-17) Beto mpe zola vanda faso muntu yina. Beto zola vutula ntangu nyonso matondo na Yehova.

7. Wapi faso luzolo ya beto na Yehova zola vanda?

⁷ Beto mpe zola lakisa luzolo ya beto na Yehova. Yesu  zonza na bilandi ya yandi: Zola Yehova na ntima ya nge nyonso, na luzingu ya nge nyonso, mpe na mayela ya nge nyonso. (Tanga Matayi 22:37.) Yinki ya zola zonza?

8, 9. Wapi faso beto lenda lakisa ti beto me zola Yehova?

⁸ Na nge, ya me lunga kaka na kuzonza na yinwa ti beto zola Yehova? Ve. Si beto me zola Yehova na ntima ya beto nyonso, na kimuntu mpe na mayela ya beto nyonso, beto zola lakisa yawu na ndyatulu ya beto. (Matayi 7:16-20) Kima ke lakisa pwelele ti beto me zola Yehova, ni ntangu beto ke sadila misiku ya yandi, samu ti, “misiku ya Nzambi ke ve [kilo] samu na beto.”​—Tanga 1 Yoane 5:3.

⁹ Kusadila misiku ya Yehova ke pesa beto luzingu ya nsayi. (Izaya 48:17, 18) Kasi, yinki ke sadisa beto na kukangama na Yehova? Beto zonzila yawu.

10. Samu na yinki nge zola lemba ve na kulongaka na kuzaba Yehova?

¹⁰ Yinki nge ke sala samu na kukuma ndiku ya Yehova? Kulongaka ya Biblia me sadisa nge na kuzaba Yehova mbote-mbote, mpe na kutunga kindiku na yandi. Kindiku yango ke faso tiya yina beto zola tula bankuni ntangu nyonso, samu ya bika kufwa. Na yawu, beto lemba ve na kulongaka na kuzaba yandi.​—Bingana 2:1-5.

11. Yinki malongi ya Biblia lenda sala nge?

¹¹ Si nge lemba ve na kulongaka Biblia, nge ke bakula mambu mingi ya mfunu yina nge ke bumba. Tala yinki ya sala na bantima ya bilandi zole ya Yesu, ntangu yandi vanda lakisa bawu pwelele baprofesi ya Biblia. Ba zonza na manima: “Ya tsyeleka, bantima ya beto vanda ve tiya ntangu yandi vanda zonzila beto mambu ya nzambi?”​—Luke 24:32.

12, 13. (a) Yinki lenda kumina na luzolo ya nge na Yehova? (b) yinki beto lenda sala samu luzolo ya beto na Yehova kula?

 ¹² Faso mosi na bilandi zole ya Yesu yina, ntima ya nge kuma tiya, ntangu nge banda kulongaka Biblia. Na yawu, nge zola ata fioti ve, kubika luzolo ya nge na Yehova kota madidi.​—Matayi 24:12.

¹³ Na kubumba kindiku ya nge na Yehova, ya ke lomba bangolo mingi. Na yina, kulemba ve na kulongaka na kuzaba Yehova na Yesu, kanisa na malongi yango, mpe bumba yawu. (Yoane 17:3) Ntangu nge ke tanga, mpe ke longaka Biblia, nge zola yufula: ‘Yinki mambu mu me longaka, ke longa munu na yina me tadila Yehova? Samu na yinki mu zola zola Yehova na ntima ya munu nyonso, mpe na kimuntu ya munu nyonso?’​—1 Timote 4:15.

14. Wapi faso lusambu lenda sadisa beto na kubumba luzolo ya beto na Yehova?

¹⁴ Samu kindiku ya nge vanda ngolo na mpangi ya nge ya ntima, beno ke solola ntangu nyonso. Faso mosi mpe,  samu luzolo ya beto na Yehova vanda kaka ngolo, beto me bonga na kusambila yandi ntangu nyonso. (Tanga 1 Batesalonika 5:17.) Lusambu ke dikabu mosi ya mbote yina Tata ya beto ya mazulu me pesa beto. Beto zola zonzila yandi mambu yina beto ke na yawu na kati ya ntima. (Nkunga 62:8) Beto vutukila ve kaka mambu mosi na kati ya lusambu. Kasi beto zonzila yandi yina ke katuka na kati ya ntima ya beto. Ntembe ve, si beto lemba ve na kulongaka Biblia, mpe na kusambila na ntima ya beto nyonso, luzolo ya beto na Yehova ke vanda kaka ngolo.

15, 16. Na nge, samu na yinki kisalu ya kusamuna ke mfunu?

¹⁵ Na kukangama na luzolo ya Yehova, beto zola mpe kulonga na bantu ya nkaka bamambu yina beto ke na kwikila. Kulonga bampangi mambu ya Yehova ke bweso ya nene. (Luke 1:74) Ya ke kisalu ya nene yina Yesu pesa na bakrito ya tsyeleka. Muntu nyonso zola samuna nsangu ya mbote ya Kimfumu ya Nzambi. Nge mpe ke sala kisalu yayi?​—Matayi 24:14; 28:19, 20.

¹⁶ Samu kisalu ya kusamuna vanda mfunu na meso ya yandi, Apotre Paul bokila yawu, “kimvwama.” (2 Bakorinto 4:7, nwt-MK) Kulonga bampangi na kuzaba Yehova na dikanisi ya yandi, ke kisalu ya mfunu yina beto lenda sola. Yayi ni faso ya mbote ya kusadila Yehova, mpe yandi ke sepelaka ntangu nge ke salaka yawu. (Baebre 6:10) Kusamuna nsangu ya Kimfumu ke mbote samu na nge, mpe samu na ba yina ke kuwa nge, samu ti ya ke sadisa nge na bawu na kukangama na Yehova. Na nsuka, beno ke kuzwa luzingu ya ntangu nyonso. (Tanga 1 Bakorinto 15:58.) Na nge, ya ke dyaka na kisalu ya nkaka yina lenda pesa nge nsayi ya kulutila?

17. Samu na yinki kusamuna ke kisalu ya kusala na mbangu?

¹⁷ Ntangu fioti kaka me bikana na kusamuna nsangu ya  Kimfumu. Beto “longisa mambu ya Nzambi,” mpe beto “lemba ve na kusamuna yawu.” (2 Timote 4:2) Bantu ke na nsatu ya kuwa nsangu ya Kimfumu ya Nzambi. Biblia ke zonza: “Kilumbu ya nene ya Yehova me kuma pene-pene! Ya me kuma pene-pene, ya ke na kwiza na mbangu nyonso!” Nsuka “ke kwiza kilumbu ya yawu!” (Sofoni 1:14; Abakuki 2:3) Ntangu fioti kaka me bikana, Yehova ke mwangisa yinza yayi, mpe ke kufwa Satana. Avant mambu yayi lungana, beto zola sadisa bantu na kusola kusadila Yehova.

18. Samu na yinki ya ke mbote na kusambila Yehova kintwadi na bakristo ya tsyeleka?

¹⁸ Yehova zola ti beto sambila yandi kintwadi na ba Kristo ya tsyeleka. Biblia ke zonza: “Mpe beto tula ba ya nkaka dikebi samu na kupuse bawu na kulakisa luzolo, mpe na kusala mambu ya mbote. Beto bika ve kifu ya kuvukana na bampangi ya dibundu, faso ba ya nkaka me kuma na kifu ya kusala yawu. Kasi, mosi na mosi na kati ya beto zola kindisa bampangi. Ya me bonga na kusala mutindu yina samu beno ke na tala ti, kilumbu ya Mfumu me kuma pene-pene (Baebre 10:24, 25, nwt-MK) Beto sala bangolo nyonso samu na kuvukana na bampangi. Ntangu beto ke vukana na bampangi, ya ke pesa beto bweso ya kukindisa bawu, mpe ya kupesa bawu ngolo.

19. Yinki lenda sadisa beto na kuzola bampangi bakristo?

¹⁹ Ntangu nge ke vukanaka na bampangi bakristo, nge ke kuzwa bandiku ya mbote yina ke sadisa nge na kuvanda pene-pene na Yehova. Kuna, nge ke kutana bakento na babakala yina ke sala bangolo mingi na kusadila yandi. Mutindu nge, bawu mpe ke bantu ya masumu, ba lenda tengama. Na yawu, zaba kulemvokila bawu. (Tanga Bakolose 3:13.) Beto kanisa na bambote yina ba ke sala beto. Ni yina ke sadisa beno na kukwenda kintwadi pene-pene na Yehova.

20, 21. “Luzingu ya tsyeleka” ke yinki?

²⁰ Yehova zola ti bisadi ya yandi vanda na luzingu ya kulutila kitoko. Na yina, Biblia ke zonza ti luzingu ya beto na bilumbu ke kwiza ke vanda ve mutindu mosi na luzingu ya bubu yayi.

²¹ Bubu yayi beto lenda zinga bamvula 70 to 80, kasi na bilumbu ke kwiza, beto ke zinga ntangu nyonso. Beto ke sepela na kuvanda na “luzingu ya ntangu nyonso,” na nzutu ya kulunga, mpe na kizunu, na zulu ya ntoto yina ke kuma paradis. Ni yawu Biblia ke bokilaka “luzingu ya tsyeleka.” Yehova zonza ti, yandi ke pesa beto luzingu ya tsyeleka. Kasi, beto zola sala bangolo “na kuzwa yawu.”​—1 Timote 6:12, 19, nwt-MK.

22. (a) Wapi mutindu beto lenda “kuzwa luzingu ya tsyeleka”? (b) Samu na yinki ya ke dikabu ya pamba yina Yehova me pesa beto?

²² Wapi mutindu beto lenda “kuzwa luzingu ya tsyeleka”? Beto zola “sala mambu ya mbote,” mpe “kufuluka na mavanga ya mbote.” (1 Timote 6:18, nwt-MK) Ya zola zonza ti, beto zola sadila nyonso yina beto ke longaka na Biblia. Ni bangolo ya beto ve ke sala ti beto kuzwa luzingu ya tsyeleka. Ya ke ve difuta to mbuma ya bangolo ya beto. Kasi, ya ke dikabu yina Yehova ke pesa na bisadi yina ke ya kukangama na yandi. Ya ke “bweso yina yandi ke pesa beto ya pamba.” (Baroma 5:15) Yehova me zola kupesa dikabu yayi na bisadi ya yandi.

23. Samu na yinki ya ke mfunu na kubaka mikanu ya mbote bubu yayi?

²³ Yufula ntete: ‘Mu ke sambila Nzambi na mutindu yina yandi ke zolaka?’ Kuvingila ve mingi samu na kusoba ndyatulu ya nge. Si beto me kangama na Yehova bubu yayi, mpe beto lemba ve na kusala luzolo ya yandi, Yehova ke vanda mutindu kisika yina beto lenda bumbama. Yandi ke bumba bantu yina ke kwikila na yandi ntangu  yandi ke kufwa yinza yayi. Mutindu yandi zonza yawu, Yehova ke kotisa beto na kati ya paradis kisika yina beto ke zinga ntangu nyonso. Ntembe ve, nge lenda kuzwa luzingu ya tsyeleka si nge baka mikanu ya mbote bubu yayi!