NTANGU nge ke tanga journal, ke tala tele to ke kuwa radio, ba ke zonzila mingi bubandi, ba-guerre mpe terorisme. Ntangu ya nkaka, nge mosi ke na maladi yina ke na kwamisa nge, to muntu yina nge ke zola me kufwa.

Byuvu yayi lenda kwizila nge na ntima:

• Ni mambu yayi Nzambi zola samu na munu mpe dikanda ya munu?

• Wapi kisika mu lenda kuzwa lubakusu na bamambu ya munu?

• Ya ke kwandi na kilumbu yina ntoto nyonso ke vanda na kizunu?

Biblia ke pesa bamvutu ya kulunga na byuvu yayi.

• Bantu ke tala dyaka ve mpasi, ke nuna dyaka ve mpe ke kufwa dyaka ve.​—Luzabusu 21:4

• “Bantu ya makulu ya maladi ke kima mbangu.”​—Izaya 35:6

• “Bantu yina ke na meso ya kufwa ke tala.”​—Izaya 35:5

•  Bantu ya kufwa ke vutuka na luzingu.​—Yoane 5:28, 29

• Ata muntu mosi ke bela dyaka.​—Izaya 33:24

• Ntoto ke fuluka na madya, muntu nyonso ke kudya faso yandi me zola.​—Nkunga 72:16

Nge lenda kanisa ti, mambu ya kitoko yina me zonzila bapaje ya ntete ya buku yayi, ke kaka bandosi. Kasi, Nzambi zola kunata bambote yina beto me tala. Na mwa ntangu fioti, yandi ke sala yawu mpe Biblia me lakisa beto faso ya ke salama.

Biblia ke suka ve kaka kuna. Ya ke zonzila faso ya kuvanda na luzingu ya nsayi. Kanisa fioti na mambu yina ke sala nge mpasi na ntima: Ya lenda vanda buprovrete, bakwamusu na dikanda, sante ya yimbi to lufwa ya muntu yina nge ke zola. Biblia lenda bakisa nge na bamambu nyonso yina ke kwamisa nge. Na Biblia nge lenda kuzwa bamvutu na byuvu yayi:

• Samu na yinki bampasi ke kumina beto?

• Yinki ke sadisa munu na kuyidika bamambu yina ke kwamisa munu?

• Dikwela mpe dikanda ya munu lenda vanda na nsayi?

• Yinki ke kumina beto na manima ya lufwa?

• Beto lenda tala dyaka bampangi ya beto yina fwaka?

• Samu na yinki beto lenda kwikila ti Nzambi ke lungisa bapromese ya yandi?

 Si nge zola kuzaba Biblia mbote-mbote, tanga buku yayi. Na kati ya baparagrafe ya yawu, ya ke na byuvu yina ke sadisa nge na kuzaba yina Biblia ke longoka. Nge lenda vanda mosi ya bamilion ya bantu yina ke sepela kulongoka Biblia na Batemwe ya Yehova. Bika Nzambi sakumuna nge, nyonso yina nge ke na zaba fioti-fioti mambu yina Biblia ke longa!