1. Nani lenda lakisa beto faso ya mbote ya kusambila Nzambi?

MABUNDU mingi ke zonza ti, ni bawu ke longa mambu ya Nzambi na butsyeleka nyonso. Kasi ya ke faso yina ve, samu ti ba ke longa ve mambu mosi na nkumbu ya Nzambi, mpe na faso ya kusambila yandi. Wapi faso beto lenda zaba mutindu ya mbote ya kusambila Nzambi? Kaka ni Yehova lenda lakisa beto faso ya mbote ya kusambila yandi.

2. Yinki lenda sadisa nge na kuzaba faso ya mbote ya kusambila Nzambi?

² Yehova pesa beto Biblia, samu beto longaka faso ya mbote ya kusambila yandi mpe beto zaba yandi mbote-mbote. Biblia ke lakisa nge ti yandi ke zola nge mingi.​—Izaya 48:17.

3. Yinki Yesu zonzaka?

³ Mingi ke zonza ti Nzambi ke ndima mabundu nyonso. Kasi, ni yina ve Yesu longaka. Yandi zonza: “[Ya ke ve] bantu nyonso yina ke bokila munu ‘Mfumu, Mfumu’ ke kota na Kimfumu ya mazulu. Kasi, kaka ba yina ke sala mambu yina ke zola Tata ya munu, yina ke na mazulu.” Na yina, longaka luzolo ya Nzambi mpe sadila yawu. Yesu zonza ti bantu yina ke waka ve Nzambi ke faso “bantu yina ke zitisa ve misiku.”​—Matayi 7:21-23, nwt-MK.

4. Wapi kifwani Yesu baka, na kuzonzila mutindu ya kusambila Nzambi?

⁴ Yesu zonza ti, ya ke vanda mwa mpasi na kusala luzolo  ya Nzambi. Yandi zonza: “Beno kota na porte ya fioti. Samu ti, porte mpe nzila ya nene ke nata bantu na lufwa, mpe mingi ke kota kuna; Kasi, porte mpe nzila ya fioti ke mpasi na kukota. Ya ke nata bantu na luzingu. Mpe bantu fioti ke zwaka yawu.” (Matayi 7:13, 14, nwt-MK) Nzila ya fioti, ke ni mutindu ya mbote ya kusambila Nzambi, ya ke nata na luzingu ya ntangu nyonso. Mpe nzila ya nene, ke ni mutindu ya yimbi ya kusambila Nzambi, ya ke nata na lufwa. Kasi, Yehova zola ve ti bantu kufwa. Yandi me pesa bantu nyonso bweso ya kulongaka na kuzaba yandi.​—2 Piere 3:9.

5. Wapi faso beto lenda zaba ba yina ke sambila Nzambi na butsyeleka?

⁵ Yesu zonza ti beto lenda zaba ba yina ke sambila Nzambi na butsyeleka, na ndyatulu ya bawu ya mbote. Beto ke zaba bawu na mambu yina ba ke kwikila mpe na yina ba ke sala. Yandi zonza: “Beno ke zaba bawu na ndyatulu ya bawu.” Yandi bwelaka: “Yinti ya mbote ke buta bambuma ya mbote.” (Matayi 7:16, 17) Ya zola zonza ve ti, bakristo ya tsyeleka ke sala ve masumu. Ba ke sala bangolo na kusala mambu ya mbote. Beto tala yinki ke bakisa beto na kuzaba bawu.

6, 7. Samu na yinki malongi ya dibundu ya tsyeleka ke katuka kaka na Biblia? Yesu vanda sadila bitini ya Biblia. Yinki ya me longa beto?

⁶ Malongi ya bawu ke katuka na Biblia. Biblia ke zonza: “Mambu nyonso yina ke na [Biblia], katuka na Nzambi, mpe ke mfunu samu na kulongisa, kungala, [kuvutula mambu na nzila, kupesa disipline]. Na yina, muntu ya kukangama na Nzambi ke vanda ya kukubama, mpe ya kulunga na kusala kisalu nyonso ya mbote.” (2 Timote 3:16, 17) Paul sonika na bakristo: “Beto ke na lemba ve na kutonda Nzambi samu ti, ntangu  beto zonzila beno mambu ya Nzambi, beno ndimaka ve yawu mutindu mambu mpamba yina me katuka na bantu, kasi mutindu mambu ya Nzambi.” (1 Batesalonika 2:13, nwt-MK) Malongi nyonso ya dibundu ya matsyeleka ke katuka kaka na Biblia. Dibundu yango, ke longa ve makanisi ya bantu, bifu ya bakoko (tradision), to kima ya nkaka.

⁷ Yesu sadila bitini ya Biblia yina vanda na ntangu ya yandi na kulonga. (Tanga Yoane 17:17.) Ntangu nyonso yandi vanda sadila bitini yango. (Matayi 4:4, 7, 10) Bisadi ya Nzambi ya tsyeleka, ke landa kifwani ya Yesu. Mutindu Yesu, malongi ya bawu mpe ke katuka kaka na Biblia.

8. Yinki Yesu longa na faso ya kusambila Yehova?

⁸ Ba ke sambila kaka Yehova. Nkunga 83:18 ke zonza: “Nge, yina nkumbu ke Yehova, kaka nge muntu ke ya kuzangama kulutila zulu na ntoto.” Yesu zola ti bantu zaba Nzambi ya tsyeleka, mpe yandi lakisa bawu nkumbu ya Nzambi. (Tanga Yoane 17:6.) Yesu zonza: “Nge ke sambila Yehova Nzambi ya nge, mpe kaka ni na yandi nge ke sadila kisalu ya santu.” (Matayi 4:10, nwt-MK) Na kifwani ya Yesu, bakristo ya tsyeleka ke sadila nkumbu ya Yehova. Beto ke longa yawu na bantu ya nkaka, mpe ke zonzila yina yandi ke sala samu na beto.

9, 10. Wapi faso beto ke lakisa ti beto ke zolasanaka?

⁹ Beto ke lakisa luzolo ya tsyeleka na bantu. Yesu longa na bilandi ya yandi na kuzolasana. (Tanga Yoane 13:35.) Beto lakisa luzolo ya beto na bantu ya bisika nyonso, bandinga nyonso, ya vanda muntu ya mbongo, to bapovre. Luzolo ke nata bumosi na kati ya beto. (Bakolose 3:14) Na yawu, beto ke simba ve minduki na kufwa bampangi. Biblia ke zonza: “Tala wapi [faso] beto  lenda zaba bana ya Nzambi mpe bana ya Satana: Muntu nyonso yina ke sala ve mambu [ya mbote], to ke zola ve mpangi ya yandi, ke ve mwana ya Nzambi.” Biblia me bwela dyaka: “Beto zolasana beto na beto; beto vanda ve mutindu Kayin, yandi vanda [muntu] ya yimbi, mpe yandi kufwa leki ya yandi.”​—1 Yoane 3:10-12; 4:20, 21.

¹⁰ Beto ke sadila ntangu, bangolo, bimvwama, mpe bima ya beto ya ntalu, na kusadisa bampangi. (Baebre 10:24, 25) Biblia me zonza: “Beto sala mambu ya mbote na bantu nyonso.”​—Bagalate 6:10.

11. Yinki me lakisa ti Yesu ke nzila yina ke nata na Nzambi?

¹¹ Beto ke waka Yesu, samu yandi ke nzila ke nataka na Tata. Biblia ke zonza ti: “Kaka ni yandi mosi lenda vuukisa beto, samu ti na yinza nyonso, Nzambi pesa ve muntu ya kaka na bantu samu na kuvuukisa beto.” (Bisalu 4:12) Na kikapu 5 ya buku yayi, beto longaka ti Yehova filisa Yesu na kupesa luzingu ya yandi na munkayulu, samu na ba yina ke sala luzolo ya Nzambi. (Matayi 20:28) Yehova sola Yesu na kuvanda mfumu yina ke yala ntoto. Biblia ke zonza ti, na kuzwa luzingu ya ntangu nyonso, beto kwikila na Yesu.​—Tanga Yoane 3:36.

12. Samu na yinki beto ke kota ve mpe ke sala ve politike?

¹² Beto ke sala ve, mpe ke kota ve mambu ya politike. Yesu sala ve politike. Na ntangu, ba kanga yandi, Yesu zonza na Pilate mfumu mosi ya Baroma: “Kimfumu ya munu ke ve ya yinza yayi.” (Tanga Yoane 18:36.) Mutindu Yesu, beto mpe ke ya kukangama na Kimfumu ya Nzambi. Na yawu, na kisika beto ke vanda, beto ke kota ve mambu ya politike. Kasi, Biblia ke longa beto na “kuzitisa bamfumu ya luyalu,” bantu ya Guvernema. (Baroma 13:1, nwt-MK) Beto ke landa  misiku ya bwala yina beto ke vandaka. Kasi, ntangu misiku ya luyalu ke wisana ve na misiku ya Nzambi, beto ke landa kifwani ya ba-apotre, yina zonza: “Beto ke sala luzolo ya Nzambi, kasi ya bantu ve.”​—Bisalu 5:29; Marke 12:17.

13. Beto ke longa yinki na yina me tadila Kimfumu ya Nzambi?

¹³ Beto ke ndima ti, ni Kimfumu ya Nzambi ke manisa bampasi nyonso ya yinza. Yesu zonza ti “nsangu ya mbote ya Kimfumu ya Nzambi” ke mwangana na ntoto nyonso. (Tanga Matayi 24:14.) Ata guvernema mosi ya bantu lenda sala yina Kimfumu ya Nzambi ke sala samu na beto. (Nkunga 146:3) Yesu longa na kusambila samu na Kimfumu ya Nzambi, mutindu yayi: “Bika Kimfumu ya nge kwiza. Bika luzolo ya nge salama na ntoto faso na zulu.” (Matayi 6:10) Biblia ke zonza ti, Kimfumu ya Nzambi ke mwangisa baguvernema nyonso ya ntoto, mpe “kaka yawu ke bikana bamvula na bamvula.”​—Danyele 2:44.

14. Na nge, ba nani ke sambila Nzambi na butsyeleka?

¹⁴ Yina beto me zaba nyonso yayi, ya ke mbote na kuyufula: ‘Ba nani ke longa kaka mambu yina ke na kati ya Biblia? Ba nani ke longa bantu nkumbu ya Nzambi? Ba nani ke lakisa luzolo ya kulutila na bampangi? Ba nani ke longa ti Nzambi filisa Yesu samu na kukuula beto? Ba nani ke kota ve na mambu ya politike?’ Ba nani ke longa ti, Kimfumu ya Nzambi ke katula bampasi ya bantu? Si nge tala mbote-mbote, ya ke kaka Batemwe ya Yehova.​—Izaya 43:10-12.

15. Yinki beto zola sala samu Nzambi ndima mutindu ya beto ya kusambila?

¹⁵ Beto suka ve na kundima ti Nzambi kele. Bademon mpe ke ndima ti Nzambi kele, kasi ba ke sala  ve luzolo ya yandi. (Zaki 2:19) Si beto zola ti Nzambi ndima mutindu ya beto ya kusambila, beto sadila nyonso yina yandi ke longa beto.

16. Samu na yinki ya ke mbote na kubasika na mabundu ya luvunu?

¹⁶ Samu Nzambi ndima mutindu ya beto ya kusambila, beto zola basika na mabundu ya luvunu. Profete Izaya sonika: “Beno basika na kati ya yawu, beno vanda mvindu ve.” (Izaya 52:11; 2 Bakorinto 6:17) Ni na yawu, beto zola losa nyonso yina me katuka na mabundu ya luvunu.

17, 18. Yinki ke “Babilone ya nene,” mpe samu na yinki ya ke mfunu na kubasika kuna na mbangu?

¹⁷ Dibundu ya luvunu ke yinki? Ya ke ni dibundu nyonso yina ke na malongi yina ke ve na Biblia. Biblia ke bokila mabundu nyonso ya luvunu: “Babilone ya Nene.” (Luzabusu 17:5) Samu na yinki? Na manima ya mvula ya nene ya ntangu ya Noe, malongi mingi ya mabundu ya luvunu butama na bwala ya Babilone. Malongi yango mwangana na ntoto nyonso. Na kifwani, bantu ya Babilone vanda na kifu ya kusambila nzambi na bayintu tatu. Bubu yayi mpe, mabundu mingi ke longa ti Nzambi ke butatu to Trinité. Kasi, Biblia ke lakisa pwelele ti Nzambi ya tsyeleka ke kaka mosi, Yehova. Yesu ke Mwana ya yandi. (Yoane 17:3) Bantu ya Babilone vanda kanisa mpe ti, ntangu muntu ke fwaka, kima mosi ke basika na yandi samu na kukwenda zinga kisika ya nkaka, to ke kwenda na difelo. Kasi, ya ke luvunu.​—Tala note 14, 17, 18 ya nsuka.

¹⁸ Nzambi me zonza ti na bilumbu fioti, yandi ke kufwa mabundu nyonso ya luvunu. (Luzabusu 18:8) Na nge, samu na yinki kubasika na mbangu na dibundu ya luvunu? Ya ke samu nge kufwa ve, ntangu yandi ke kufwa yawu.​—Luzabusu 18:4.

19. Ntangu nge ke banda kusambila Yehova, wapi mutindu yandi lenda sadisa nge?

 ¹⁹ Ntangu nge ke sosa kubasika na dibundu ya luvunu samu na kusadila Yehova, bandiku mpe bantu ya dikanda ya nge lenda dasuka, mpe ba lenda nyokola nge. Kasi Yehova ke bika ve nge. Nge ke kota na dikanda ya nene ya yinza nyonso, ya bantu yina ke zolanaka. Nge ke kuzwa kivuvu ya kuzinga ntangu nyonso na yinza ya malu-malu. (Marke 10:28-30) Bandiku to bantu ya dikanda ya nge, yina ke ntete ve bisadi ya Yehova, na bilumbu ke kwiza, lenda ndima kulongaka Biblia.

20. Samu na yinki ya ke mbote na kusambila Nzambi na dibundu ya tsyeleka?

²⁰ Na mwa ntangu fioti, Nzambi ke katula mambu nyonso ya yimbi, mpe Kimfumu ya yandi ke yala ntoto nyonso. (2 Piere 3:9, 13) Ya ke vanda kilengi mingi! Bantu nyonso ke sambila Yehova faso yandi ke zolaka. Na yina, sala nyonso bubu yayi, na kusambila Nzambi na dibundu ya tsyeleka.