1, 2. Ba nani vanda bandiku ya Yehova?

NANI lenda vanda ndiku ya nge? Kaka muntu yina nge ke zola mingi, yina beno ke wisana mbote. Muntu yina ke na kimuntu ya mbote, mpe na bifu ya mbote.

² Ya ke na bantu yina Yehova sola na kukuma bandiku ya yandi. Na kifwani, Abraham vanda ndiku ya Nzambi. (Izaya 41:8; Zaki 2:23) David mpe vanda ndiku ya Yehova. Yandi nzonza ti ‘David ke muntu yina ke sala munu kilengi na ntima.’ (Bisalu 13:22) Profete Danyele vanda muntu “ya mfunu mingi” na meso ya Yehova.​—Danyele 9:23.

3. Samu na yinki Abraham, David, mpe Danyele vanda bandiku ya Yehova?

³ Yinki Abraham, David, mpe Danyele sala na kukuma bandiku ya Yehova? Yehova zonza na Abraham: “Nge me kuwa ndinga ya munu.” (Kubanda 22:18) Yehova ke kuma ndiku ya bayina ke kuwa mambu ya yandi. Bantu nyonso ya yinsi mosi lenda kuma bandiku ya yandi. Yehova zonza na bana ya Izraele: “Beno kuwa malongi ya munu, mpe mu ke kuma Tata ya beno, beno ke kuma bana ya munu.” (Yeremia 7:23) Si nge zola kukuma ndiku ya Yehova nge zola landa misiku ya yandi.

4, 5. Wapi faso Yehova ke bumba bandiku ya yandi?

⁴ Biblia ke zonza ti Yehova “ke lakisa ngolo ya yandi na ba yina ke tula ntima ya bawu nyonso na yandi.”  (2 Bansangu 16:9) Na Nkunga 32:8, Yehova me zonza: “Mu ke pesa nge mayela mpe ke longisa nge nzila yina nge ke landa. Mu ke longa nge, mpe disu ya munu ke vanda na zulu ya nge.”

⁵ Enemi mosi ya ngolo ke sosa kukanga beto nzila ya kindiku na Nzambi. Kasi Yehova lenda bumba beto. (Tanga Nkunga 55:22.) Samu ti beto ke bandiku ya Yehova, beto ke sadila yandi na ntima mosi. Beto ke kangama na yandi ata na ntangu ya mpasi. Beto lenda vanda na kivuvu yina vanda na David, ntangu yandi sonika: “Samu yandi ke na diboko ya munu ya kibakala, mu ke tala ata fioti ve boma.” (Nkunga 16:8; 63:8) Wapi faso Satana ke sosa kukanga beto nzila ya kukuma bandiku ya Nzambi?

6. Yinki Satana zonza samu na muntu nyonso yina ke ndiku ya Yehova?

⁶ Na kikapu 11 ya buku yayi, beto longaka ti Satana balukila Yehova, mpe zonza ti Yehova ke na luvunu. Yandi bwela dyaka ti Yehova ke na ntima ya yimbi samu yandi bika ve Adam na Eve, sola na bawu mosi yina ke mbote to yimbi. Buku ya Yobi, ke longa beto ti, Satana ke zonza luvunu na nkumbu ya bantu yina ke bandiku ya Yehova. Yandi zonza ti bantu ke sadila Nzambi na intere, kasi na luzolo ve. Satana zonza dyaka ti, yandi lenda nata muntu nyonso na kubalukila Nzambi. Yinki mambu yina kumina Yobi ke longa beto, mpe wapi faso Yehova bumba yandi?

7, 8. (a) Wapi dikanisi Yehova vanda na yawu na Yobi? (b) Yinki Satana zonza na nkumbu ya Yobi?

⁷ Yobi vanda nani? Yandi vanda muntu ya mbote yina zinga na ntoto bamvula kuluta 3600. Yehova  zonza ti, na ntangu yina ata muntu mosi vanda faso yandi na zulu ya ntoto. Yobi vanda na buzitu mingi na Nzambi, mpe vanda yiina mambu ya yimbi. (Yobi 1:8) Ya tsyeleka Yobi vanda ndiku ya Yehova.

⁸ Satana zonza ti Yobi vanda sadila Yehova samu yandi pesa Yobi bimvwama. Satana zonza na Yehova: “Nge tula ve lupangu na kubumba yandi, [. . .] yinzo ya yandi, mpe [. . .] bima nyonso yina ke ya yandi? Nge me sakumuna kisalu ya maboko ya yandi, mpe bibulu ya yandi me fuluka na ntoto nyonso. Kasi na kusoba, tula diboko ya nge, mpe bebisa nyonso yina ke na yandi, samu nge tala si yandi ke finga ve nge.”​—Yobi 1:10, 11.

9. Yehova bikila Satana nzila ya kusala yinki?

⁹ Satana zonza luvunu na nkumbu ya Yobi, ntangu yandi zonza ti, Yobi ke sambila Yehova kaka na intere. Satana zonza dyaka ti yandi lenda nata Yobi na kubika na kusadila Yehova. Yehova ndima ve luvunu ya Satana. Kasi Yehova bikila yandi nzila ya kumeka Yobi, samu na kuzaba si Yobi ke ya tsyeleka ndiku ya Yehova.

10. Wapi faso Satana meka Yobi, kasi yinki Yobi salaka?

¹⁰ Ya ntete, Satana sala ti bantu laba mpe kufwa bibulu nyonso ya Yobi. Mpe yandi sala ti bisadi mingi ya Yobi kufwa. Yobi bikana na ata kima. Na manima, Satana kufwa bana kumi ya Yobi na mupepe ya ngolo. Kasi Yobi kangama kaka na Yehova. “Na mambu nyonso yayi, Yobi sala ve disumu mpe finga ve Nzambi.”​—Yobi 1:12-19, 22.

11. (a) Wapi faso Satana meka dyaka yobi? (b) Kasi yinki Yobi sala dyaka?

¹¹ Satana suka ve kuna. Yandi zonza dyaka: “Yandi kuzwa kimbevo yina ke nata yandi pene-pene na lufwa, mpe beto tala si yandi ke finga ve nge. Bebisa musuni ya  yandi tii na mukwa, mpe ntembe ve, yandi ke finga nge na meso na nge.” Satana nyokola Yobi na maladi mosi ya mpasi. (Yobi 2:5, 7) Ata na kati ya maladi ya ngolo yina, Yobi kangama kaka na Yehova. Mpe yandi zonza: “Tii na lufwa, mu ke kangama kaka na Yehova!”​—Yobi 27:5.

12. Wapi faso Yobi lakisa ti Satana ke muntu ya luvunu?

¹² Yobi zaba ata kima mosi na nyonso yina Satana zonza na nkumbu ya yandi, na kisika vanda katuka bampasi ya yandi. Na yandi, bampasi yina katuka na Yehova. (Yobi 6:4; 16:11-14) Kasi, ata yandi vanda na dikanisi yina, Yobi balukila ve Yehova. Ntembe vanda dyaka ve, Yobi zola ve Yehova na intere, kasi yandi zola Yehova na ntima mosi. Nyonso Satana zonza vanda luvunu!

13. Kukangama ya Yobi lakisa yinki, mpe ya natina yandi yinki?

¹³ Ata yandi zaba ve mambu yina vanda luta na zulu, Yobi kangama na Yehova, mpe lakisa ti Satana ke muntu ya yimbi, ya luvunu. Yehova sakumuna Yobi samu ti yandi kangama na yandi.​—Yobi 42:12-17.

14, 15. Wapi luvunu Satana me zonza na nkumbu ya muntu nyonso?

¹⁴ Nyonso yina kumina Yobi ke longa beto bileso mingi. Bubu yayi mpe, Satana me zonza ti beto ke sadila Yehova samu na bima yina yandi ke pesa beto. Na Yobi 2:4, Satana me zonza: “Muntu ke pesa kima nyonso ke na yandi samu na kuvuukisa luzingu ya yandi.” Satana zonza yawu samu na bantu nyonso. Na yandi, muntu nyonso ke sadila Nzambi na intere. Bamvula mingi na manima ya lufwa ya Yobi, Satana ke kaka na sombola Yehova, mpe ke kaka na meka bisadi ya yandi. Na kifwani, na Bingana 27:11, Yehova me zonza: “Mwana ya munu, vanda na mayela, mpe pesa ntima ya munu  kilengi, samu mu kuzwa dyambu ya kuvutula na muntu yina ke na [sombola] munu.”

¹⁵ Nge lenda sola kuwa mpe kungama na kindiku ya nge na Yehova, samu na kulakisa ti Satana ke muntu ya luvunu. Na kukuma ndiku ya Yehova, ya ke mfunu na kusoba ndyatulu. Satana me zonza ti, nge ke manga Yehova na ntangu ya mpasi. Yandi ke meka beto samu beto bika kukangama na Nzambi. Na wapi faso?

16. (a) Ba nani Satana lenda sadila samu na kufwa kindiku ya beto na Yehova? (b) Wapi mutindu Satana lenda sosa kukanga nge nzila ya kusadila Yehova?

¹⁶ Satana ke sadila bima mingi na kufwa kindiku ya beto na Yehova. Yandi ke “mutindu nkosi yina [ke] na nsatu, mpe ke na kutambula bisika nyonso samu na kusosa muntu yina yandi ke kudya.” (1 Piere 5:8) kupamuka ve si bandiku ya nge, dikanda ya nge, to bantu ya nkaka ke sosa kunimina nge na kulongaka Biblia. Ntangu ya nkaka, ba lenda kwamisa nge. * (Yoane 15:19, 20) Satana ke sosa kutalana “mutindu ange yina ke [ngenga faso mwinda].” Na yina, yandi ke sosa kunata beto na kubalukila Yehova. (2 Bakorinto 11:14) Kima ya nkaka Satana ke sadilaka, ni kusosa beto kanisa ti, beto ke ve mfunu na meso ya Yehova.​—Bingana 24:10.

17. Samu na yinki beto ke sadila misiku ya Yehova?

¹⁷ Ntangu beto ke sadila misiku ya Yehova, beto ke lakisa ti Satana ke muntu ya luvunu. Yinki ke bakisa beto na kusadila misiku yango? Biblia ke zonza ti:  “Nge fwana zola Yehova Nzambi ya nge na ntima ya nge nyonso, na kimuntu ya nge nyonso, mpe na ngolo ya nge nyonso.” (Kulonga Misiku 6:5) Beto ke landa misiku ya Yehova samu beto zola yandi. Ntangu luzolo ya beto ke kula, ya ke pesa beto nsatu ya kusala nyonso yina Yehova me zola. Apotre Yoane sonika: “Ya tsyeleka kuzola Nzambi ni [kusadila] misiku ya yandi. Misiku ya yandi ke ve [kilo] samu na beto.”​—1 Yoane 5:3.

18, 19. (a) Wapi bima yina Yehova ke yiinaka? (b) Misiku ya Yehova ke ve mpasi. Yinki me lakisa yawu?

¹⁸ Kasi wapi bima yina Yehova me nimina beto? Na kuzaba yawu, beto tala enkadre “ Yiina bima yina Yehova ke yiinaka.” Na kubanda, bima ya nkaka ke talana ve ntete yimbi. Kasi, ntangu nge ke tanga baverse ya Biblia mpe ke kanisa mbote-mbote na yawu, nge ke zaba ti Yehova ke Nzambi ya mayela. Ntangu ya nkaka, ya ke lomba nge soba ndyatulu; kasi, kusoba ndyatulu lenda baka mwa  ntangu. Si nge lemba ve, nge ke kuzwa kizunu, na kyese yina Yehova ke pesaka na bandiku ya yandi. (Izaya 48:17, 18) Yinki me lakisa ti nge lenda soba ndyatulu ya nge?

¹⁹ Yehova lenda lomba ve kima yina beto ke ve na ngolo ya kusala. (Kulonga Misiku 30:11-14) Yandi me zaba beto mbote-mbote kulutila beto mosi, mpe kote ke suka ngolo ya beto. (Nkunga 103:14) Paul zonza ti: “[. . .] Bampasi yina ke kumina beno, ke bampasi yina ke kumina bantu [nyonso]. Nzambi ke zitisa bapromese ya yandi, mpe yandi lenda sala ve ti, bampasi yina ke kumina beno, lutila beno ngolo, kasi, ntangu bampasi ke kumina beno, Nzambi ke pesa beno ngolo ya [kukanga ntima].” (1 Bakorinto 10:13) Ntembe ve, Yehova ke pesa beto ngolo ya kusala ntangu nyonso mambu ya mbote. Na ntangu ya mpasi, Yehova ke pesa nge “ngolo yina me lutila ngolo ya bantu.” (2 Bakorinto 4:7, nwt-MK) Ntangu yandi tala faso Yehova sadisa yandi, Paul zonza: “Na  mambu nyonso, mu ke kuzwa ngolo na muntu yina ke pesa munu ngolo.”​—Bafilipi 4:13, nwt-MK.

20. Wapi bifu ya mbote ya Yehova yina nge ke landa, mpe samu na yinki?

²⁰ Si muntu me zola kukuma ndiku ya Yehova, yandi ke suka kaka ve na kuyina bima yina Yehova ke yinaka, kasi yandi zola sala kima ya nkaka. (Baroma 12:9) Ndiku ya Nzambi ke zola yina Nzambi ke zolaka mpe ke yiina yina Nzambi ke yiinaka, faso ke zonza Nkunga 15:1-5. Bandiku ya Yehova ke landa bifu ya yandi ya mbote mutindu “luzolo, nsayi, kizunu, [ntima ya yinda], bumbote, kusalasana, kiminu, [ntima ya kulemba], mpe kuzaba kukutika-nzutu.”​—Bagalate 5:22, 23.

21. Yinki nge ke sala na kulanda bifu ya Yehova?

²¹ Wapi faso nge lenda sadila bifu yina? Longoka Biblia ntangu nyonso na kuzaba yina Yehova ke zolaka. (Izaya 30:20, 21) Ni yawu ke kulisa luzolo ya nge na Yehova. Mpe nyonso luzolo ya nge na yandi na kula, ya ke vanda dyaka ve mpasi na kulanda misiku ya yandi.

22. Yinki Yehova ke pesa na bandiku yandi?

²² Kusoba ndyatulu ya nge ke mutindu kukatula bilele ya ntama samu na kulwata bilele ya malu-malu. Ni yina Biblia me zonza ti “Beno katula kimuntu ya ntama,” mpe beno lwata “kimuntu ya malu-malu.” (Bakolose 3:9, 10, nwt-MK) Ya ke vanda mwa mpasi na kusoba kimuntu ya beto samu na kusala luzolo ya Yehova. Kasi zaba ti na mantwala, Yehova me bumba “bambote mingi” samu na nge. (Nkunga 19:11) Ya tsyeleka, kusola Yehova mutindu mfumu ya beto, ke lakisa ti Satana ke muntu ya luvunu. Sadila Yehova na luzolo mpe na ntima mosi, kasi ya vanda ve samu na bima yina yandi lenda pesa nge. Faso yina, nge ke kuma ndiku ya Yehova!