Buku Masonoko samu na luzingu ya Bakristo ke sadisa nge na kutala ve mpasi samu na kuzwa masolo ya Biblia yina ke sadisa nge na kunwana na bamambu ya mpasi ya luzingu. Ya ke sadisa mpe nge na kuzwa baverse ya Biblia yina me lunga samu na kukindisa bampangi mpe kubakisa bawu na kubaka mikanu yina ke pesa Yehova lukumu. Soola kaka mambu yina nge ke na yawu nsatu, mpe nge ke kuzwa byuvu mpe masolo ya Biblia yina ke sadisa nge. (Tala Tablo “ Mutindu ya kusadila buku yayi.”) Nge ke kuzwa masonoko mingi ya mbote yina ke pesa nge malongi mpe ngolo yina nge ke na yawu nsatu. Nge ke kuzwa mpe malongi ya Biblia yina nge lenda sadila samu na kusadisa bampangi mpe kukindisa bawu.

Buku yayi ke na pesaka ve masonoko nyonso ya Biblia yina ke zonzilaka bamambu yina ba me zonzila na kati. Kasi ya ke sadisa nge na kuzwa baverse mingi ya mfunu. Mpe na manima, nge lenda sadila bima ya nkaka samu na kusosa dyaka kuzaba. (Bin 2:1-6) Samu na kuzaba mbote-mbote, nge lenda sadila bisoni yina ke nataka na baverse ya nkaka yina ke zonzilaka mambu ya faso mosi mpe banoti ya kulongoka ya La Bible. Traduction du monde nouveau na lumputu. Sadila mpe Buku ya kusosa samu na Bambangi ya Yehova to Index des Publications des Témoins de Jéhovah samu na kuzaba dyaka mingi nsasa ya baverse. Babuku yayi ke sadisa nge na kuzaba faso ya malu-malu ya kubakula baverse yina nge me soola, mpe na kutala mikanda ya malu-malu yina ke na zonzilaka yawu.

Bika ti buku Masonoko samu na luzingu ya Bakristo sadisa nge na kuzwa ndwenga, luzabu, mpe mayela yina ke na Biblia. Ntangu nge ke na sadilaka buku yayi, ya ke kulisa dyaka kundima ya nge ti “mambu ya Nzambi kele moyo mpe ngolo.”—Ebr 4:12.