KILESO 14
Samu na yinki Nzambi kele na nkubukulu?
1. Samu na yinki Nzambi kubikaka Israele ya ntama?
Nzambi kubikaka bantu ya dibuta ya Abrahami mpe yandi pesaka bau minsiku. Yandi bokidilaka dibuta yango “Israele” mpe yandi pesaka bau kiyekua ya kukengidila nsambudulu ya kedika mpe mpova na yandi. (Nkunga 147:19, 20) Na yau, bantu ya makanda nyonso lendaka zua mambote na nzila ya Israele.—Tanga Kubanda 22:18.
Nzambi solaka Baisraele samu bavuanda bambangi na yandi. Disolo ya dikanda yango kena lakisa ti kana dikanda mosi kena zitisa minsiku ya Nzambi, bazuaka mambote. (Kulonga Misiku 4:6) Na yau, na nzila ya Baisraele, bantu ya nkaka lendaka zaba Nzambi ya kedika.—Tanga Izaya 43:10, 12.
2. Samu na yinki baklisto ya kedika kele ya kukubama?
Na manima, Yehova Nzambi losaka Israele, mpe na kisika na bau, yandi salaka kimvuka ya buklisto. (Matayi 21:43; 23:37, 38) Bubu, na kisika ya Baisraele, baklisto ya kedika bakena kusadila Yehova mutindu bambangi na yandi.—Tanga Bisalu 15:14, 17.
Yesu kubikaka balongoki na yandi samu basamuna mpe bakumisa bantu balongoki na makanda nyonso. (Matayi 10:7, 11; 24:14; 28:19, 20) Na bilumbu yayi ya nsuka ya mambu ya ntangu yayi, kisalu yango kena salama na mutindu yau mesalaminaka ntete ve. Samu na mbala ya ntete banda muntu mesalaminaka, Yehova mevukisa bamilio ya bantu yina mekatuka na makanda nyonso na kati ya nsambudulu ya kedika. (Luzabusu 7:9, 10) Baklisto ya kedika mekubama samu na kukindasana mpe kusalasana. Na yinza ya mvimba, bau kevuandaka na manaka kaka mosi ya malongi ya Biblia na balukutakanu ya bau.—Tanga Baebre 10:24, 25.
3. Wapi mutindu nkubukulu ya Bambangi ya Yehova bandilaka na bilumbu ya beto?
Na bamvula 1870, mua bantu fioti yina vuandaka kulongoka Biblia babandaka kubakula diaka malongi ya kedika ya Biblia yina zimbanaka banda ntama. Bakuizaka kuzaba ti Yesu kubikaka kimvuka ya buklisto samu yau samuna nsangu ya mbote; yau yina bau bandaka kisalu ya nene ya kusamuna nsangu ya Kimfumu na makanda nyonso. Na 1931, bau bakaka nkumbu ya Bambangi ya Yehova.—Tanga Bisalu 1:8; 2:1, 4; 5:42.
4. Wapi mutindu nkubukulu ya Bambangi ya Yehova kena kutuadisama bubu yayi?
Na ntangu ya baklisto ya ntete, bimvuka ya buklisto na babuala mingi vuandaka tuadusua na kimvuka ya bantuadisi yina vuandaka ndima ti Yesu kele Mfumu ya kimvuka. (Bisalu 16:4, 5) Mutindu mosi mpe bubu, Bambangi ya Yehova na yinza mvimba bau metuadusua na Kimvuka ya Bantuadisi yina mesalama na bankulutu yina meyela. Kimvuka yango kena tuadisa babiro ya filiale ya Bambangi ya Yehova yina kesalaka kisalu ya kubangula mikanda yina ketubilaka Biblia na bandinga kuluta 700, kubasisa yau na masini mpe kukabula yau. Na mutindu yina, Kimvuka ya Bantuadisi kesadilaka Masonukua samu na kukindisa mpe kutuadisa bimvuka kuluta 110 000 na yinza ya mvimba. Na kimvuka mosimosi, babakala yina melungisa mambu yina kelombamaka, bau kevuandaka na kiyekua ya bankulutu, to bankengidi. Babakala yango kekengidilaka kimvuka ya Nzambi na luzolo nyonso.—Tanga 1 Piere 5:2, 3.
Bambangi ya Yehova mebongisama samu na kusamuna nsangu ya mbote mpe kukumisa bantu balongoki. Beto kesamunaka yinzo na yinzo, mutindu kaka bantumua salaka yau. (Bisalu 20:20) Beto kelombaka mpe bantu yina kezolaka malongi ya kedika ti beto longuka Biblia na bau. Kansi Bambangi ya Yehova kele kaka nkudukulu ve. Beto kele diaka dibuta ya Tata mosi yina kezolaka beto. Beto kele bampangi ya babakala mpe banketo yina ketulanaka dikebi. (2 Batesalonika 1:3) Mutindu Bambangi ya Yehova bamekubama samu na kuyangidika Nzambi mpe kusadisa bayankaka, bau mesala dibuta mosi yina melutila kiese na ntoto.—Tanga Nkunga 33:12; Bisalu 20:35.
