KILESO 8
Samu na yinki Nzambi mebika nzila na yimbi mpe mpasi?
1. Wapi mutindu yimbi bandilaka?
Nzambi mebika bantu bakukiyadila mua ntangu ya yinda samu na kulakisa ti bakenunga ve kumanisa bampasi ya bantu
Yimbi bandaka awa na ntoto ntangu Satana tubaka luvunu ya ntete. Satana vuandaka mbasi ya kulunga, kansi yandi “kezingaka na mambu ya kieleka ve.” (Yoane 8:44) Yandi kudisaka nsatu ya kubaka nsambudulu yina fuana pesama kaka na Nzambi. Satana vunaka Eva, nketo ya ntete, mpe yandi ndimisaka Eva yandi zitisa yandi na kisika ya kuzitisa Nzambi. Adama mpe landaka Eva na kumanga kuzitisa Nzambi. Nzengolo ya Adama nataka mpasi mpe lufua.—Tanga Kubanda 3:1-6, 19.
Ntangu Satana tumisaka Eva yandi manga kuzitisa Nzambi, yandi bandisaka butomboki samu na kutelemina luyalu ya Nzambi, yazola tuba kiyekua na yandi ya kuvuanda Yina-Meluta-Nyonso. Bantu mingi melanda Satana mpe bau memanga Nzambi vuanda Mfumu na bau. Na yau, Satana mekumaka “mfumu ya nsi-ntoto.”—Tanga Yoane 14:30; 1 Yoane 5:19.
2. Bivangu ya Nzambi vuandaka ya kubeba?
Bima nyonso yina Nzambi salaka kele ya kulunga. Bantu mpe bambasi yina Nzambi salaka bau vuandaka na makoki ya kuzitisa Nzambi na mambu nyonso. (kulonga Misiku 32:4, 5) Nzambi vangaka beto na kimpuanza ya kusola kusala mbote to yimbi. Kimpuanza yango kepesaka beto diluaku ya kulakisa ti beto kezolaka Nzambi.—Tanga Zaki 1:13-15; 1 Yoane 5:3.
3. Samu na yinki Nzambi mebika nzila na bampasi tii bubu yayi?
Yehova mebika nzila ti bantu tombokila luyalu na yandi samu na mua ntangu. Samu na yinki? Samu na kulakisa ti ngolo nyonso bantu lenda sala samu na kukiyadila bau mosi kondua lutuadusu na yandi yau lenda natina bau mambote ve. (Longi 7:29; 8:9) Bamvula 6 000 yina bantu mekukiyadila bau mosi melakisa mbotembote ti banunga ve. Luyalu ya bantu nunga ve kumanisa bamvita, kimpumbulu, kukondua lunungu mpe maladi.—Tanga Yeremia 10:23; Baroma 9:17.
Na kusuasana na luyalu ya bantu, luyalu ya Nzambi kenanatina bayina mendima yau mambote. (Izaya 48:17, 18) Ntama ve, Yehova kesukisa baguvernema nyonso ya bantu. Kaka bantu yina kena ndimina luyalu ya Nzambi kevuanda na ntoto.—Izaya 11:9;Tanga Danyele 2:44.
Tala video Samu na yinki Nzambi me biká nzila na bampasi?
4. Wapi diluaku mvibudulu ya Nzambi mepesa beto?
Satana tubaka ti muntu mosi ve kesadila Yehova na luzolo ya kedika. Nge kendima kulakisa ti Satana tubaka luvunu? Ee, nge lenda lakisa yau! Mvibudulu ya Nzambi mepesa beto nyonso diluaku ya kulakisa kana beto kezola luyalu ya Nzambi to ya bantu. Mambu beto kesalaka na luzingu ya beto ni yina kelakisa yau.—Tanga Yobi 1:8-12; Bingana 27:11.
5. Wapi mutindu beto lenda sola Nzambi vuanda Mfumu na beto?
Mambu yina beto kesolaka kelakisaka kana beto mezola Nzambi vuanda Mfumu ya beto to ve
Beto lenda sola Nzambi vuanda Mfumu na beto kana beto kena kusosa mpe kukipesa na nsambudulu ya kedika yina mewisana na Biblia, Mpova ya Nzambi. (Yoane 4:23) Beto lenda lakisa ti beto memanga luyalu ya Satana kana beto memanga kukota na mambu ya politiki mpe na bamvita, mutindu Yesu salaka.—Tanga Yoane 17:14.
Satana kesadilaka ngolo na yandi samu na kutumisa bantu na bisalu ya nsoni mpe ya yimbi. Ntangu beto kena kumanga bisalu yina, bankundi ya beto mpe bampangi ya beto ya nkaka balenda seka to kuzonzila beto yimbi. (1 Piere 4:3, 4) Samu na yau, beto fuana sola: Beto kevuanda kisika mosi na bantu yina kezolaka Nzambi? Beto kezitisa bansiku na yandi ya nduenga mpe ya luzolo? Kana beto mesala mutindu yina, beto kelakisa ti Satana vunaka ntangu yandi tubaka ti muntu mosi ve kezitisa Nzambi kana yandi mekutana na banzomono.—Tanga 1 Bakorinto 6:9, 10; 15:33.
Luzolo yina Nzambi kele na yau samu na bantu mendimisa beto ti yandi kemanisa yimbi mpe bampasi. Bantu yina kelakisaka ti bau kendimaka yau bakebaka luzingu ya mvula na mvula awa na ntoto.—Tanga Yoane 3:16.
