KILESO 7
Yinki kele Kimfumu ya Nzambi?
1. Yinki kele Kimfumu ya Nzambi?
Yinki mesala ti Yesu vuanda Mfumu yina mefuanana?—MARKE 1:40-42.
Kimfumu ya Nzambi kele guvernema ya dizulu. Yau kebaka kisika ya baguvernema nyonso ya nkaka mpe yau kesala ti luzolo ya Nzambi salama na dizulu mpe awa na ntoto. Nsangu yina metala Kimfumu ya Nzambi kele nsangu mosi ya mbote. Ntama ve, Kimfumu ya Nzambi kelungisa nsatu yina bantu kevuandaka na yau ya kuvuanda na guvernema ya mbote. Yau kesala ti bantu nyonso vuanda na bumosi awa na ntoto.—Tanga Danyele 2:44; Matayi 6:9, 10; 24:14.
Kimfumu nyonso kevuandaka na mfumu na yau. Yehova mesola Muana na yandi Yesu Klisto vuanda Mfumu ya Kimfumu na yandi.—Tanga Luzabusu 11:15.
Tala video Kimfumu ya Nzambi ke yinki?
2. Samu na yinki Yesu kele Mfumu yina mefuana?
Muana ya Nzambi kele Mfumu yina mefuana samu yandi kele na bumbote mpe yandi kekangamaka na yina kele mbote. (Matayi 11:28-30) Mpe, yandi kele na ngolo mingi ya kusadisa bantu samu yandi keyala ntoto banda kuna na dizulu. Na manima ya kufutumuka na yandi, Yesu kuendaka na dizulu mpe yandi vuandaka na diboko ya kibakala ya Yehova samu na kuvingila. (Baebre 10:12, 13) Nsukansuka, Nzambi pesaka yandi ngolo samu na kuyala.—Tanga Danyele 7:13, 14.
3. Banani keyadila kintuadi na Yesu?
Nzambi mesola kimvuka mosi ya bantu bamebokila “basantu” samu na kuyadila kintuadi na Yesu na mazulu. (Danyele 7:27) Basantu ya ntete yina solamaka vuandaka bantumua ya Yesu ya kukuikama. Tii na bilumbu ya beto, Yehova kena tatamana kusola babakala mpe banketo ya kukuikama samu bavuanda basantu. Mutindu mosi na Yesu, basantu yango kefutumukaka na nzutu ya kimpeve.—Tanga Yoane 14:1-3; 1 Bakorinto 15:42-44.
Bantu yikua kekuenda na mazulu? Yesu bokilaka bau “kibuka ya fioti.” (Luke 12:32, NW) Nsukansuka bau nyonso kevuanda bantu 144 000. Bau keyala ntoto kintuadi na Yesu.—Tanga Luzabusu 14:1.
4. Yinki salamaka ntangu Yesu bandaka kuyadila?
Kimfumu ya Nzambi bandaka kuyadila na 1914. * Diambu ya ntete Yesu salaka ntangu yandi kumaka Mfumu yau kele kulosa Satana na bademo na yandi awa na ntoto. Satana kumaka na nganzi ya ngolo mpe yandi bandaka kubasisa mpasi na ntoto ya mvimba. (Luzabusu 12:7-10, 12) Kubanda kuna, mpasi ya bantu kena kubuelama kaka. Bamvita, nsatu, maladi, kuningana ya ntoto, yakele mosi ya mambu yina kele “kidimbu” kena lakisa ti ntama ve Kimfumu yango kebaka mambu nyonso ya ntoto na maboko.—Tanga Luke 21:7, 10, 11, 31.
5. Wapi mambu Kimfumu ya Nzambi kena kulungisa?
Na nzila ya kisalu ya kusamuna yina kena kusalama na ntoto ya mvimba, Kimfumu ya Nzambi kena kuvukisa bantu mingi ya mabuta nyonso. Bamilio ya bantu ya kulembama kena ndima luyalu ya Yesu. Kimfumu ya Nzambi kekengidila bau ntangu yau kebebisa yinza yayi ya yimbi. Yau yina bantu nyonso yina zola baka mambote na Kimfumu ya Nzambi bafuana longuka kuzitisa luyalu ya Yesu.—Tanga Luzabusu 7:9, 14, 16, 17.
Na kuzingila bamvula 1 000, Kimfumu ya Nzambi kelungisa luzolo yina Nzambi vuandaka na yau na mbandukulu samu na bantu. Ntoto ya mvimba kekuma paladiso. Nsukansuka, Yesu kevutula Kimfumu na Tata na yandi. (1 Bakorinto 15:24-26) Nge mezaba muntu mosi yina nge kesepela kuzabisa nsangu metala Kimfumu ya Nzambi?—Tanga Nkunga 37:10, 11, 29.
^ par. 6 Samu na kuzaba mbotembote mutindu bambikudulu ya Biblia metuba samu na mvula 1914, tala mukanda Inki Biblia Ke Longa Beto? na paje 215-218. [Yau mebasisama na Lingala mpe Français]
