Mvangi na beto kele na nduenga kulutila beto. Mutindu yandi kele Tata ya luzolo, yandi kekukibanzaka samu na beto. Kaka yina ve, yandi salaka beto ve samu beto kukituadisa beto mosi. (Yeremia 10:23) Mutindu muana fioti kevuandaka na nsatu bibuti tuadisa yandi, beto mpe beto kevuandaka na nsatu Nzambi tuadisa beto. (Izaya 48:17, 18) Minsiku ya Biblia ketuadisaka beto, mpe yau kele dikabu ya Nzambi.​—Tanga 2 Timote 3:16.

Bansiku mpe minsiku ya Yehova kelongaka beto mutindu ya luzingu yina melutila mbote bubu yayi, mpe yau kelakisaka beto mutindu beto lenda bakila dikabu ya luzingu ya mvula na mvula na bilumbu kena kuiza. Mutindu Nzambi salaka beto, yau mefuana beto landa lutuadusu na yandi na ntima mosi.​—Tanga Nkunga 19:7, 11; Luzabusu 4:11.

Minsiku yina kele na Biblia kele malongi ya kedika ya mfunu mingi. Kansi, minsiku kepesamaka samu na diambu mosi to na ntangu mosi mutindu yina. (Kulonga Misiku 22:8) Samu na kuzaba mutindu ya kusadila munsiku mosi ya Biblia samu na diambu mosi, yau kelombaka kuyindula. (Bingana 2:10-12) Na kifuani, Biblia kelongaka ti luzingu kele dikabu ya Nzambi. Munsiku yango ya mfunu mingi lenda tuadisa beto ntango beto kele na kisalu, na yinzo mpe na vuayaje. Yau ketumisa beto beto zaba mutindu ya kusadila samu na kutina mambu ya mpasi.​—Tanga Bisalu 17:28.

Yesu tubilaka minsiku zole yina melutila mfunu. Ya ntete kelakisaka samu na yinki Nzambi salaka bantu: samu bazaba yandi, bazola yandi mpe basadila yandi na kukuikama. Ntangu beto kena baka banzengolo, beto fuana zimbakana ve munsiku yina ya ntete. (Bingana 3:6) Bantu yina kezitisaka munsiku yina bakekumaka bankundi ya Nzambi, bakezuaka kiese ya kedika, mpe bau kezua luzingu ya mvula na mvula.​—Tanga Matayi 22:36-38.

Munsiku ya zole lenda sadisa beto beto vuanda na kiyenge na bayankaka. (1 Bakorinto 13:4-7) Kusadila munsiku yango melomba kulanda kifuani ya Nzambi na mutindu yandi kesadilaka bantu mambu.​—Tanga Matayi 7:12; 22:39, 40.

Minsiku ya Biblia kelongaka mabuta wapi mutindu luzolo lenda sadisa bau bavuanda na bumosi. (Bakolose 3:12-14) Kaka yina ve, Mpova ya Nzambi kekengidilaka mabuta na mutindu yau kelongaka bau munsiku yayi: dikuela fuana zingila mvimbamvimba.​—Tanga Kubanda 2:24.

Kana beto kena kulanda minsiku ya Biblia, yau lenda sadisa beto beto kengidila bima ya beto mpe bangindu ya beto. Na kifuani, mbala mingi bapatro kesepelaka na bisadi yina kezitisaka minsiku ya Biblia ya kuvuanda bantu yina kevunaka ve mpe kele ngolo na kisalu. (Bingana 10:4, 26; Baebre 13:18) Mpova ya Nzambi kelombaka beto diaka beto yangalala na bima yina kele na mfunu mingi mpe kikundi na beto na Nzambi vuanda na kisika ya ntete kulutila bima ya yinza.​—Tanga Matayi 6:24, 25, 33; 1 Timote 6:8-10.

Kusadila munsiku ya Biblia lenda sadisa beto beto vuanda na mavimpi ya mbote. (Bingana 14:30; 22:24, 25) Na kifuani, kulanda nsiku ya Nzambi yina menimina kukolua malafu yau kekengidilaka beto na bimbevo ya yimbi mpe mambu ya mpasi. (Bingana 23:20) Yehova mepesa beto nzila beto kunua malafu, kansi beto lutisa ve. (Nkunga 104:15; 1 Bakorinto 6:10) Minsiku ya Nzambi kesadisaka beto mutindu yau kelongaka beto beto keba kaka na bisalu na beto ve, kansi mpe na bangindu ya beto. (Nkunga 119:97-100) Kansi, baklisto ya kedika kezitisaka minsiku ya Nzambi kaka samu na mambote ya bau mosi ve. Bau kesalaka yau samu na kukumisa Yehova.​—Tanga Matayi 5:14-16.