KILESO 5
Wapi kele luzolo ya Nzambi samu na ntoto?
1. Samu na yinki Nzambi salaka ntoto?
Yehova mepesaka bantu ntoto. Ntoto kele buala na beto. Na yau, bibuti na beto ya ntete, Adama na Eva, basalamaka ve samu na kuvuanda na dizulu; Nzambi manisaka sala bambasi samu bau vuanda na dizulu. (Yobi 38:4, 7) Nzambi tulaka nde bakala ya ntete na paladiso mosi ya kitoko, yina bavuandaka bokidila nsaba ya Edene. (Kubanda 2:15-17) Yehova pesaka yandi mpe nkuna na yandi kivuvu ya kuvuanda na luzingu mekondua nsuka awa na ntoto.—Tanga Nkunga 37:29; 115:16.
Na ntonono, kaka nsaba ya Edene vuandaka paladiso. Nketo na bakala ya ntete fuanaka fulusa ntoto na bana yina bakebuta. Na manima, bafuanaka tula ntoto ya mvimba na yinsi na bau mpe kukumisa yau paladiso. (Kubanda 1:28) Ntoto kesala kufua ata kilumbu mosi ve. Yau kevuanda ntangu nyonso buala yina bantu fuana vuanda.—Tanga Nkunga 104:5.
Tala video Samu na yinki Nzambi salá ntoto?
2. Samu na yinki ntoto kele paladiso ve bubu yayi?
Adama na Eva bazitisaka Nzambi ve; yau yina Yehova basisaka bau na nsaba ya Edene. Paladiso zimbanaka, mpe muntu ata mosi ve menunga kuvutula yau. Biblia metuba ti: “Ntoto mepesamaka na maboko ya muntu ya yimbi.”—Yobi 9:24, NW.—Tanga Kubanda 3:23, 24.
Yehova zimbakanaka luzolo yina yandi vuandaka na yau na mbandukulu samu na bantu? Ve! Yandi kele Nkua-Ngolo-Nyonso. Yandi kekondua ve kulungisa yau. (Izaya 45:18) Yandi kesala ti bantu zinga diaka mutindu yandi zodilaka na mbandukulu.—Tanga Nkunga 37:11, 34.
3. Wapi mutindu Nzambi kevutudila paladiso?
Ntoto kevutuka diaka paladiso ntangu Yesu, Mfumu yina Nzambi metula, keyadila. Na mvita ya Armagedoni, Yesu ketuadisa bambasi ya Nzambi samu na kufua bantu nyonso yina kena kutelemina Nzambi. Na manima, Yesu ketula Satana na boloko bamvula 1000. Bisadi ya Nzambi kevuka na mvita yango samu Yesu ketuadisa bau mpe yandi kekengidila bau. Bau kevuanda na luzingu ya mvula na mvula na paladiso awa na ntoto.—Tanga Luzabusu 20:1-3; 21:3, 4.
4. Wapi ntangu bampasi kemanisa?
Wapi ntangu Nzambi kekatula mambu ya yimbi awa na ntoto? Yesu pesaka “kidimbu” kelakisa ti nsuka mekuma pene. Mambu yina kena kuluta na yinza mpe yina kesosa kuzimbisa luzingu ya bantu melakisa ti beto mekuma na “nsuka ya mambu ya ntangu yayi.”—Tanga Matayi 24:3, 7-14, 21, 22.
Ntangu Yesu keyadila ntoto bamvula 1000 banda kuna na dizulu, yandi kemanisa bampasi nyonso awa na ntoto. (Izaya 9:6, 7; 11:9) Kaka Mfumu ve, Yesu kevuanda mpe Nganga-nzambi ya Nene, mpe yandi kekatula masumu ya bayina nyonso kezolaka Nzambi. Na yau, na nzila ya Yesu, Nzambi kekatula kimbevo, kununa, mpe lufua.—Tanga Izaya 25:8; 33:24.
5. Nani kevuanda na Paladiso?
Na Bayinzo ya Kimfumu, nge kekutana na bantu yina kezolaka Nzambi mpe kesosaka kuzaba wapi mutindu balenda kusepedisa yandi
Bantu yina kezitisaka Nzambi bakevuanda na Paladiso. (1 Yoane 2:17) Yesu tindaka balongoki na yandi basosa bantu ya kulembama mpe balonga bau yina bafuana sala samu Nzambi ndima bau. Bubu yayi, Yehova kena bongisa bamilio ya bantu samu na kuvuanda na Paladiso awa na ntoto. (Sofoni 2:3) Na Bayinzo ya Kimfumu ya Bambangi ya Yehova, bantu kelonguka kuvuanda babakala mpe batata ya mbote, banketo mpe bamama ya mbote. Bana na bibuti na bau kesambilaka kisika mosi mpe bau kelongukaka mutindu ya kubaka mambote na nzila ya nsangu ya mbote.—Tanga Michee 4:1-4.
