KILESO 9
Wapi mutindu dibuta na nge lenda vuanda na kiese?
1. Samu na yinki dikuela na nge fuana sonama na buku ya Leta samu dibuta na nge vuanda na kiese?
Nsangu ya mbote mekatuka na Yehova, Nzambi ya kiese, yina mezola ti mabuta vuanda na kiese. (1 Timote 1:11) Yandi bandisaka dikuela. Yau kele na mfunu dikuela sonama na buku ya Leta samu dibuta vuanda na kiese, samu yau kesalaka ti bana yunduka na kisika mosi yina kekengidila bau. Baklisto fuana zitisa minsiku ya buala na yina metala kusonikisa dikuela na buku ya Leta.—Tanga Luke 2:1, 4, 5.
Wapi mutindu Nzambi ketadilaka dikuela? Yandi kezolaka ti nketo na bakala yina mekuelana bavuanda mvimbamvimba. Yehova zola bakala na nketo bavuanda ya kukuikama mosi na mpangi ya yandi. (Baebre 13:4) Yandi keyinaka kufua dikuela. (Malaki 2:16) Kansi yandi mepesa baklisto yinsua ya kufua dikuela mpe kukuela diaka kaka kana nketo to bakala mesala kinsuza.—Tanga Matayi 19:3-6, 9.
2. Wapi mutindu bakala na nketo fuana salanina mambu?
Yehova salaka bakala na nketo samu basalasanaka na dikuela. (kulonga Misiku 2:18) Mutindu bakala kele mfumu ya dibuta, ni yandi kele na kiyekua ya kulungisa bansatu ya dibuta na yandi, mpe kulonga bau mambu ya Nzambi. Yandi fuana zola mpe kukipesa tsyeleka na nketo na yandi. Bakala na nketo fuana zolanaka mpe kupesanaka buzitu. Mutindu nketo na bakala bakele bantu ya kukondua kulunga, kuzaba kulemvukila ni yau kesadisa bau bavuanda na kiese na dibuta.—Tanga Baefeze 4:31, 32; 5:22-25, 33; 1 Piere 3:7.
3. Kana mambu kena tambula mbote ve, nge fuana bika dikuela na nge?
Kana beno kele na matata na dikuela na beno, beno nyonso zole lenda sala ngolo samu beno sadilanaka mambu na luzolo. (1 Bakorinto 13:4, 5) Mpova ya Nzambi mekindisa ve beno vambana samu na kumanisa matata yina kebasikaka na dikuela.—Tanga 1 Bakorinto 7:10-13.
4. Bana, yinki Nzambi mezola samu na beno?
Yehova zola beno vuanda na kiese. Yandi kepesaka beno malongi yina kesadisa beno beno vuanda na kiese na kintuenia ya beno. Yandi kezolaka beno baka mambote na nduenga mpe mambu yina bibuti na beno kutanaka na yau. (Bakolose 3:20) Yehova zola diaka ti beno tala kiese yina kekatukaka na kusadila Mvangi na beno na Muana na yandi.—Tanga Longi 11:9–12:1; Matayi 19:13-15; 21:15, 16.
5. Bibuti, wapi mutindu bana na beno lenda vuanda na kiese?
Beno fuana sala nyonso samu na kudikila, kuvuatisa, mpe kupesa bana na beno kisika ya kulala. (1 Timote 5:8) Kansi samu bana ya beno vuanda na kiese, beno fuana diaka longa bau bazola Nzambi mpe balonguka mambu na yandi. (Baefeze 6:4) Ntangu beno kena kupesa bau kifuani ya kuzola Nzambi, yau lenda simba ngolo bantima na bau. Kana beno kena kusadila Biblia samu na kulonga bana na beno, yau lenda bongisa tsyeleka bangindu na bau.—Tanga kulonga Misiku 6:4-7; Bingana 22:6.
Bana keyangalalaka kana beno kena kukindisa bau mpe kukumisa bau. Beno fuana diaka kusemba mpe kupesa bau disiplini. Kusala mutindu yina kekengidila bana na bikadulu yina lenda katula bau kiese. (Bingana 22:15) Kansi, ntangu nge kena kupesa bana disiplini, nge fuana nyokola bau ve to kusadila bau mambu ya ngolongolo.—Tanga Bakolose 3:21.
Bambangi ya Yehova kebasisaka mikanda ya mutindu na mutindu samu na kusadisa bibuti mpe bana. Bangindu kele na mikanda yango kekatukaka na Biblia.—Tanga Nkunga 19:7, 11.
