KILESO 10
Wapi mutindu nge lenda zabila nsambudulu ya kedika?
1. Dibundu ya kedika kele kaka mosi?
‘Beno keba na bantu yina ketuba mambu ya luvunu na nkumbu ya Nzambi.’—MATAYI 7:15.
Yesu longaka balongoki na yandi nsambudulu mosi kaka ya kedika. Yau kele mutindu nzila yina kenataka na luzingu ya mvula na mvula. Yesu tubaka mutindu yayi ti ‘bantu fioti kaka ketalaka yau.’ (Matayi 7:14) Nzambi kendimaka kaka nsambudulu yina kelandaka Mpova na yandi yina kele kedika. Bansambidi nyonso ya kedikakedika bau kele na kiminu mosi.—Tanga Yoane 4:23, 24; 14:6; Baefeze 4:4, 5.
Tala video Nzambi ke ndima kwandi mabundu nyonso?
2. Yinki Yesu tubaka samu na baklisto ya luvunu?
“Bau ke tubaka ti bau ke ndimaka Nzambi, kansi mambu yina ya bau ke salaka yau ke songaka ti bau ke mangaka yandi.”—TITE 1:16.
Yesu tubaka ti bansamuni ya luvunu bau kebebisa Kimvuka ya baklisto. Na meso, baketalanaka mutindu bansambidi ya kedika. Mabundu na bau ketubaka ti bakele baklisto. Kansi nge lenda zaba bantu ya mutindu yina na bisalu na bau. Na wapi mutindu? Kaka nsambudulu ya kedika kebasisaka baklisto ya kedika bayina mezabana na bikadulu na bau mpe na mambu bau kesalaka.—Tanga Matayi 7:13-23.
3. Wapi mutindu nge lenda zabila bansambidi ya kedika?
Tadila mambu tanu yayi melanda:
-
Bansambidi ya kedika bakezitisaka Biblia samu bau ketalaka yau Mpova ya Nzambi. Bau kesalaka ngolo bazitisa minsiku ya Biblia na luzingu na bau. Yau yina bansambidi ya kedika mesuasana na mabundu yina kelongaka bangindu ya bantu. (Matayi 15:7-9) Bansambidi ya kedika kesadilaka mambu yina bau kelongaka?.—Tanga Yoane 17:17; 2 Timote 3:16, 17.
-
Balongoki ya Yesu ya kedika kekumisaka nkumbu ya Nzambi, Yehova. Yesu kumisaka nkumbu ya Nzambi na mutindu yandi lakisaka bantu nkumbu yango. Yandi sadisaka bantu bazaba Nzambi mpe yandi longaka bau basambilaka ti nkumbu ya Nzambi yavuanda santu. (Matayi 6:9) Na kisika nge kevuandaka, wapi dibundu ketubilaka bantu nkumbu ya Nzambi?—Tanga Yoane 17:26; Baroma 10:13, 14.
-
Baklisto ya kedika kesamunaka Kimfumu ya Nzambi. Nzambi tindaka Yesu yandi samuna nsangu ya mbote ya Kimfumu. Kimfumu ya Nzambi kele kivuvu kaka mosi samu na bantu. Yesu tatamanaka kutubila yau tii na kilumbu ya lufua na yandi. (Luke 4:43; 8:1; 23:42, 43) Yandi tubaka ti balongoki na yandi diaka kesamuna Kimfumu yango. Kana muntu mosi mekuiza zabisa nge nsangu ya Kimfumu ya Nzambi, nge ketuba ti yandi kele muntu ya wapi dibundu?—Tanga Matayi 24:14.
-
Balongoki ya Yesu bau kele ve bantu ya yinza yayi ya yimbi. Nge lenda zaba bau na mutindu bau kemangaka kukota na mambu ya politiki to na matata kebasikaka na buala. (Yoane 17:16; 18:36) Mpe, bau kelandaka ve bikadulu mpe bisalu ya bantu ya yinza yayi ya yimbi.—Tanga Zaki 4:4.
-
Baklisto ya kedika bakezolanaka tsyeleka. Mpova ya Nzambi kelongaka bau ti bafuana zitisa bantu ya makanda nyonso. Ata ti mabundu mingi ya luvunu kekotaka na bamvita ya makanda mbala mingi, bansambidi ya kedida bakemangaka kusala mutindu yina. (Mika 4:1-3) Kutu, baklisto keyangalalaka kusadila ntangu na bima na bau samu na kusadisa mpe kukindisa bayankaka.—Tanga Yoane 13:34, 35; 1 Yoane 4:20.
4. Nge lenda zaba dibundu ya kedika?
Wapi dibundu yina malongi na yau nyonso kekatukaka na Mpova ya Nzambi, kezitisaka Nkumbu ya Nzambi, mpe kesamunaka ti Kimfumu ya Nzambi yau kele kivuvu kaka mosi samu na bantu? Wapi dibundu yina bankuikisi na yau kezolanaka mpe bakemangaka mvita? Nge mekanisa yinki?—Tanga 1 Yoane 3:10-12.
