KILESO 01

Wapi bambote Biblia lenda natina nge?

KUWA NA

Beto mingi ke yufulá byuvu na yina me tadila luzingu, bampasi, lufwa, mpe bilumbu ke kwiza. Dyaka, beto ke nwaná na basusi ya bilumbu nyonso, faso kusosa kisalu, mpe kusala ti dikanda ya beto vanda na kilengi. Bantu mingi me kwiza tala ti, Biblia ke suká ve kaka na kupesa bawu bamvutu na byuvu ya nene ya luzingu, kasi ya ke pesá mpe bawu malongi ya mbote yina ke sadisá bawu bilumbu nyonso. Nge me kanisa ti Biblia lenda sadisa muntu mosi yina nge zaba?

1. Na wapi byuvu Biblia ke pesá bamvutu?

Biblia ke pesá bamvutu na byuvu ya nene yayi: Wa’ faso luzingu bandaka? Samu na yinki beto ke awa na ntoto? Samu na yinki bantu yina me sala ata kima ke talá mpasi? Yinki ke kuminá muntu na manima ya lufwa? Kana bantu nyonso ke zolá kizunu, samu na yinki muvusu ke mingi? Yinki ke kumina yinza yayi na bilumbu ke kwiza? Biblia ke zonzá na beto na kusosa bamvutu na byuvu yayi. Bantu mingi kwizá tala ti bamvutu yina Biblia ke pesá, ke mbote mingi.

2. Wa’ faso Biblia lenda sadisa beto na kuvanda na kilengi bilumbu nyonso?

Biblia ke pesá beto malongi ya mbote. Beto lenda zonzila malongi yina ya ke pesá na makanda, samu ba kuzwa kilengi ya tsyeleka. Dyaka, ya ke pesá malongi na kuzaba faso ya kunwana na basusi ya luzingu mpe na kuzwa kilengi na kisalu ya beto. Ntangu beto ke na sololá na nge na mukanda yayi, nge ke longoka yina Biblia ke zonzá na bamambu yayi, mpe mingi ya nkaka. Nge ke tala mpe ti “mambu nyonso yina kele ya kusonama [na kati ya Biblia] [. . .] kele mfunu” samu na beto bubu yayi.—2 Timote 3:16.

Buku yayi ke ve Biblia. Kasi, ya ke kaka samu na kusadisa nge na kuzaba Biblia nge mosi. Na yawu, beto ke lomba na nge na kutanga baverse nyonso yina ke na kati ya yawu; mpe na kutala kana mambu ya Biblia ke faso mosi na yina nge ke longoka na kati ya buku yayi.

SOSA KUZABA MBOTE-MBOTE

Tala faso Biblia sadisá bantu ya nkaka, faso nge lenda kuzwa kilengi ya kutanga yawu, mpe samu na yinki ya ke mbote bantu sadisa nge na kulongoka yawu.

3. Biblia lenda twadisa luzingu ya beto

Biblia ke faso lumière mosi ya ngolo. Ya lenda sadisa beto na kubaka mikanu ya mbote, mpe ya lenda zonzila beto mambu yina ke kwiza na mantwala.

Tanga Nkunga 119:105, mpe na manima, beto zonzila byuvu yayi:

Waʼ faso muntu yina soniká verse yayi vandá tadilá Biblia?
Waʼ faso nge ke tadilá Biblia?

4. Biblia lenda pesa bamvutu na byuvu ya beto

Kento mosi kwizá tala ti, Biblia pesá bamvutu na byuvu yina kwamisaka yandi na kati ya bamvula mingi. Tala VIDEO, mpe na manima, beto zonzila byuvu yina ke landa.

VIDEO: Beno bika ata fioti ve espwar ya beno manisa! (1:48)

Wapi byuvu yina vandá na kento yina beto me tala?
Waʼ faso kulongoka Biblia sadisaka yandi?

Biblia ke zonzá na beto na kubika ve kuyufula byuvu. Tanga Matayi 7:7, mpe na manima, beto zonzila kyuvu yayi:

Wapi byuvu ke na nge, yina Biblia lenda pesa bamvutu?

5. Nge lenda kuzwa kilengi ya kutanga Biblia

Bantu mingi ke kuzwá kilengi ya kutanga Biblia, mpe ba ke talá faso ya ke sadisá bawu. Tala VIDEO, mpe na manima, beto zonzila byuvu yayi.

VIDEO: Kutanga Biblia (2:05)

Na video yayi, yinki bantwenya ke kanisá na yina me tadila kutanga?
Ata ti ba zola ve kutanga, samu na yinki ba ke zolá kutanga Biblia?

Biblia ke zonzá ti malongi ya yawu lenda pesa beto ngolo mpe kivuvu. Tanga Baroma 15:4, mpe na manima, beto zonzila kyuvu yayi:

Nsilulu (promesse) ya Biblia ya kupesa beto ngolo mpe kivuvu ke na sepelisá kwandi nge?

6. Bantu ya nkaka lenda sadisa beto na kuzaba mambu ya Biblia

Ata ba ke tangá Biblia bawu mosi, bantu mingi kwizá tala ti ya ke mbote bantu ya nkaka sadisa bawu. Tanga Bisalu 8:26-31, mpe na manima, beto zonzila kyuvu yayi:

Yinki lenda sadisa beto na kuzaba Biblia?—Tala baverse 30 mpe 31.

Bakala mosi ya bwala ya Etiopi vandá na nsatu ba sadisa yandi samu na kuzaba Biblia. Bubu yayi mpe, bantu mingi ke talá ti ya ke mbote bantu ya nkaka sadisa bawu na kuzaba mambu ya Biblia

BANTU YA NKAKA KE ZONZAKA: “Kulongoka Biblia ke kaka kulutisa ntangu ya mpamba.”