KILESO 07

Wapi mutindu ya muntu Yehova kele?

KUWA NA

Ntangu nge ke kanisá na Yehova Nzambi, yinki ke kwizilá nge na yintu? Ti yandi ke nene kulutila bima nyonso mpe yandi ke ntama mingi na nge faso bambwetete? To yandi ke ve na bumuntu, samu yandi ke kaka kima faso mupepe ya ngolo? Kasi, wapi mutindu Yehova kele? Biblia ke zonzilá beto bifu ya mbote ya Yehova. Ya ke zonzá mpe ti Yehova ke kipeke nge.

1. Samu na yinki beto lenda tala ve Nzambi?

“Nzambi kele Mpeve.” (Yoane 4:24) Yehova ke ve na nzutu ya kisuni faso bantu. Yandi ke muntu yina beto lenda tala ve, mpe ata muntu lenda tala kisika yina yandi ke vandaka na mazulu.

2. Wapi yina ke bifu ya mbote ya Yehova?

Beto lenda tala ve Yehova. Kasi ntangu beto ke longoka kuzaba yandi, beto ke zola yandi samu yandi ke na bifu ya mbote. Biblia ke zonzaka: “Yehova ke zolaka lunungu, mpe yandi ke bika ve bantu ya yandi ya kukwikama.” (Nkunga 37:28) Mpe yandi ke ya “kufuluka na mbote mpe na kyadi,” mingi-mingi samu na bantu yina ke na talá mpasi. (Zaki 5:11) “Yehova kele pene-pene ya bantu yina kele na mawa; Yandi ke vuukisaka bantu yina me lemba.” (Nkunga 34:18, note na yinsi ya paje) Kasi nge me zaba ti beto lenda sala ti Yehova vanda na kilengi to beto lenda nyongisa yandi? Muntu yina ke solá kusala mambu ya yimbi ke pesaka yandi mpasi na ntima mpe ke nyongisaka yandi. (Nkunga 78:40, 41) Mpe muntu yina ke salá mambu ya mbote ke pesaka yandi kilengi.—Tanga Bingana 27:11.

3. Wa’ faso Yehova ke lakisá ti yandi ke zolá beto?

Kifu ya ntete ya mbote ya Yehova ke luzolo. Na yawu, biblia ke zonzá ve kaka ti Nzambi ke na luzolo, kasi ti “Nzambi kele luzolo.” (1 Yoane 4:8) Yehova ke lakisá ve beto luzolo ya yandi kaka na nzila ya biblia, kasi mpe na nzila ya bima yina yandi yidikaka. (Tanga Bisalu 14:17.) Na kifwani, tala faso yandi yidiká beto. Yandi yidiká beto na makoki ya kutala mpe kuzola ba couleurs ya kitoko, ya kuwa banzimbu ya kitoko, mpe ya kuzola madya ya kitoko. Yandi pesá beto nyonso yayi samu beto sepela na luzingu.

SOSA KUZABA MBOTE-MBOTE

Longoka yinki Yehova ke sadilá samu na kusala bima ya nene. Mpe tala wapi mutindu Yehova ke zonzilá mpe ke lakisá beto bifu ya yandi ya mbote.

4. Mpeve ya santu kele ngolo yina Nzambi ke sadilá samu na kulungisa mambu

Beto ke sadilá maboko ya beto samu na kusala bima. Faso mosi mpe, Yehova ke sadilá mpeve ya yandi ya santu. Biblia ke lakisá ti mpeve ya santu kele ve Nzambi. Kasi ya kele ngolo yina Nzambi ke sadilá samu na kulungisa mambu yina yandi zola. Tanga Luke 11:13 na Bisalu 2:17, mpe na manima beto zonzila byuvu yayi:

Nzambi ke “mwangisa” mpeve ya yandi ya santu na ba yina ke lombaka yandi yawu. Na yawu, samu na nge, mpeve ya santu ke Nzambi to ya kele ngolo ya kisalu ya Nzambi? Samu na yinki nge me zonza faso yina?

Yehova ke sadilá mpeve ya yandi ya santu samu na kusala bima ya nene. Tanga Nkunga 33:6 na 2 Piere 1:20, 21, mpe na manima beto zonzila kyuvu yayi:

Na ntama, wa’ faso Yehova sadilá mpeve ya yandi ya santu?

5. Yehova ke na bifu ya mbote yina ke sepelisá beto

Moyize vandá sadila Nzambi, kasi yandi sosá kuzaba Nzambi mbote-mbote. Na yawu, Moyize zonzá na yandi: “Lakisa munu banzila ya nge, samu mu zaba nge.” (Kubasika 33:13) Yehova kuwaka yandi mpe yandi zonzá na Moyize wapi bifu ya mbote yandi ke na yawu. Tanga Kubasika 34:4-6, mpe na manima beto zonzila byuvu yayi:

Wapi bifu ya mbote ya yandi, Yehova zonzá na Moyize?
Na bifu ya mbote ya Yehova, wapi yina nge me zola mingi?

6. Yehova ke kipeke bantu

Bisadi ya Nzambi ya ntama, Baebre, vandá bangamba na Ezipte. Yinki bampasi ya bawu vandá sala Yehova na ntima? Kuwa AUDIO to tanga Kubasika 3:1-10. Mpe na manima beto zonzila byuvu yina ke landa.

AUDIO: Bampasi ya bawu vandá sala Yehova mpasi na ntima (2:45)

Na disolo yayi, yinki me lakisa nge ti ya ke nyongisá Yehova ntangu bantu ke talá mpasi?—Tala baverse 7 na 8.
Nge me ndima kwandi ti Yehova zola na ntima nyonso kusadisa bantu, mpe ti yandi lenda sala yawu? Samu na yinki nge me zonza faso yina?

7. Bima yina Yehova yidiká ke longá beto bifu ya yandi ya mbote

Yehova me lakisa bifu ya yandi ya mbote na nzila ya bima yina yandi yidikaka. Tala VIDEO. Mpe tanga Baroma 1:20, mpe na manima beto zonzila kyuvu yina ke landa.